9 shlokas
- 1
ब्रह्मोवाच
एवं भाद्रपदे मासि कार्तिकेयं प्रपूजयेत्
स्नानदानादिकं सर्वमस्यामक्षय्यमुच्यते
brahmovāca
evaṃ bhādrapade māsi kārtikeyaṃ prapūjayet
snānadānādikaṃ sarvamasyāmakṣayyamucyate
- 2
सप्तम्यां प्राशयेच्चापि भोज्यं विप्रान्रविं यजेत्
ॐ खखोल्कायामृतत्वं प्रियसङ्गमो भव सदा स्वाहा
saptamyāṃ prāśayeccāpi bhojyaṃ viprānraviṃ yajet
oṃ khakholkāyāmṛtatvaṃ priyasaṅgamo bhava sadā svāhā
- 3
अष्टम्यां पारणं कुर्यान्मरीचं प्राश्य स्वर्गभाक्
सप्तम्यां नियतः स्नात्वा पूजयित्वा दिवाकरम्
aṣṭamyāṃ pāraṇaṃ kuryānmarīcaṃ prāśya svargabhāk
saptamyāṃ niyataḥ snātvā pūjayitvā divākaram
- 4
दद्यात्फलानि विप्रेभ्यो मार्तण्डः प्रीयतामिति
खर्जूरं नारिकेलं वा प्राशयेन्मातुलुङ्गकम्
dadyātphalāni viprebhyo mārtaṇḍaḥ prīyatāmiti
kharjūraṃ nārikelaṃ vā prāśayenmātuluṅgakam
- 5
सर्वे भवन्तु सफला मम कामाः समन्ततः
सम्पूज्य देवं सप्तम्यां पायसेनाथ भोजयेत्
sarve bhavantu saphalā mama kāmāḥ samantataḥ
sampūjya devaṃ saptamyāṃ pāyasenātha bhojayet
- 6
विप्रांश्च दक्षिणां दत्त्वा स्वयं चाथ पयः पिबेत्
भक्ष्यं चोष्यं तथा लेह्यं ओदनं चेति कीर्तितम्
viprāṃśca dakṣiṇāṃ dattvā svayaṃ cātha payaḥ pibet
bhakṣyaṃ coṣyaṃ tathā lehyaṃ odanaṃ ceti kīrtitam
- 7
धनपुत्रादिकामस्तु त्यजेद् एतद् अनोदनः
वाय्वाशी विजयेत्क्षुच्च कुर्याद्विजयसप्तमीम्
अद्यादर्कं च कामेच्छुरुपवासे तरेन्मदम्
dhanaputrādikāmastu tyajed etad anodanaḥ
vāyvāśī vijayetkṣucca kuryādvijayasaptamīm
adyādarkaṃ ca kāmecchurupavāse tarenmadam
- 8
गोधूममाषयवषष्टिककांस्यपात्रं पाषाणपिष्टमधुमैषुनमद्यमांसम्
अभ्यञ्जनाञ्जनतिलांश्च विवर्जयेद्यः तस्येषितं भवति सप्तसु सप्तमीषु
godhūmamāṣayavaṣaṣṭikakāṃsyapātraṃ pāṣāṇapiṣṭamadhumaiṣunamadyamāṃsam
abhyañjanāñjanatilāṃśca vivarjayedyaḥ tasyeṣitaṃ bhavati saptasu saptamīṣu
- 9
इति श्रीगारुडे महापुराणे पूर्वखण्डे प्रथमांशाख्ये आचारकाण्डे सप्तमीव्रतनिरूपणं नाम त्रिंशोत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe saptamīvratanirūpaṇaṃ nāma triṃśottaraśatatamo 'dhyāyaḥ

