19 shlokas
- 1
ब्रह्मोवाच
अशोककलिका ह्यष्टौ ये पिबन्ति पुनर्वसौ
चैत्रे मासि सिताष्टम्यां न ते शोकमवाप्नुयुः
brahmovāca
aśokakalikā hyaṣṭau ye pibanti punarvasau
caitre māsi sitāṣṭamyāṃ na te śokamavāpnuyuḥ
- 2
त्वामशोक हराभीष्ट मधुमाससमुद्भव
पिबामि शोकसंतप्तो मामशोकं सदा कुरु
tvāmaśoka harābhīṣṭa madhumāsasamudbhava
pibāmi śokasaṃtapto māmaśokaṃ sadā kuru
- 3
ब्रह्मोवाच
शुक्लाष्टम्यामाश्वयुजे उत्तराषाढया युता
सा महानवमीत्युक्ता स्नानदानादि चाक्षयम्
brahmovāca
śuklāṣṭamyāmāśvayuje uttarāṣāḍhayā yutā
sā mahānavamītyuktā snānadānādi cākṣayam
- 4
नवमी केवला चापि दुर्गां चैव तु पूजयेत्
महाव्रतं महापुण्यं शङ्कराद्यैरनुष्ठितम्
navamī kevalā cāpi durgāṃ caiva tu pūjayet
mahāvrataṃ mahāpuṇyaṃ śaṅkarādyairanuṣṭhitam
- 5
अयाचितादि षष्ठ्यादौ राजा शत्रुजयाया च
जपहोमसमायुक्तः कन्यां वा भोजयेत्सदा
ayācitādi ṣaṣṭhyādau rājā śatrujayāyā ca
japahomasamāyuktaḥ kanyāṃ vā bhojayetsadā
- 6
दुर्गे दुर्गे रक्षिणि स्वाहा मन्त्रो ऽयं पूजनादिषु
दीर्घाकारादिमात्राभिर्नव देव्यो नमोऽन्तिकाः
durge durge rakṣiṇi svāhā mantro 'yaṃ pūjanādiṣu
dīrghākārādimātrābhirnava devyo namo'ntikāḥ
- 7
षड्भिः पदैर्नमः स्वाहा वषडादिहृदादिकम्
अङ्गुष्ठादिकनिष्ठान्तं न्यस्य वै पूजयेच्छिवाम्
ṣaḍbhiḥ padairnamaḥ svāhā vaṣaḍādihṛdādikam
aṅguṣṭhādikaniṣṭhāntaṃ nyasya vai pūjayecchivām
- 8
अष्टम्यां नव गेहानि दारुजान्येकमेव वा
तस्मिन्देवी प्रकर्तव्या हैमी वा राजतापि वा
aṣṭamyāṃ nava gehāni dārujānyekameva vā
tasmindevī prakartavyā haimī vā rājatāpi vā
- 9
शूले खड्गे पुस्तके वा पटे वा मण्डले यजेत्
कपालं खेटकं घण्टां दर्पणं तर्जनीं धनः
śūle khaḍge pustake vā paṭe vā maṇḍale yajet
kapālaṃ kheṭakaṃ ghaṇṭāṃ darpaṇaṃ tarjanīṃ dhanaḥ
- 10
ध्वजं डमरुकं पाशं वामहस्तेषु बिभ्रती
शक्तिं च मुद्गरं शूलं वज्रं खड्गं तथाङ्कुशम्
dhvajaṃ ḍamarukaṃ pāśaṃ vāmahasteṣu bibhratī
śaktiṃ ca mudgaraṃ śūlaṃ vajraṃ khaḍgaṃ tathāṅkuśam
- 11
शरं चक्रं शलाकां च दुर्गामायुधसंयुताम्
शेषाः षोडशहस्तां स्युरञ्जनं डमरुं विना
śaraṃ cakraṃ śalākāṃ ca durgāmāyudhasaṃyutām
śeṣāḥ ṣoḍaśahastāṃ syurañjanaṃ ḍamaruṃ vinā
- 12
रुद्रचण्डा प्रचण्डा च चण्डोग्रा चण्डनायिका
चण्डा चण्डवती चैव चण्डरूपातिचण्डिका
rudracaṇḍā pracaṇḍā ca caṇḍogrā caṇḍanāyikā
caṇḍā caṇḍavatī caiva caṇḍarūpāticaṇḍikā
- 13
नवमी चोग्रचण्डा च मध्यमाग्निप्रभाकृतिः
रोचना त्वरुणा कृष्णा नीलं धूम्रा च शुक्रका
navamī cogracaṇḍā ca madhyamāgniprabhākṛtiḥ
rocanā tvaruṇā kṛṣṇā nīlaṃ dhūmrā ca śukrakā
- 14
पाता च पाण्डुरा प्रोक्ता आलीढं हरितं तथा
म हिषो ऽस्य स खड्गाग्रप्रकचग्रहमुष्टिकः
pātā ca pāṇḍurā proktā ālīḍhaṃ haritaṃ tathā
ma hiṣo 'sya sa khaḍgāgraprakacagrahamuṣṭikaḥ
- 15
जप्त्वा दशाक्षरीं विद्यां नासौ केनापि बध्यते
पञ्चदशाङ्गुलं खड्गं त्रिशूलं च ततो यजेत्
लिङ्गस्यां पूजयेद्वापि पादुके ऽथ जले ऽपि वा
japtvā daśākṣarīṃ vidyāṃ nāsau kenāpi badhyate
pañcadaśāṅgulaṃ khaḍgaṃ triśūlaṃ ca tato yajet
liṅgasyāṃ pūjayedvāpi pāduke 'tha jale 'pi vā
- 16
विचित्रां रक्षयेत्पूजामष्टम्यामुपवासयेत्
पञ्चाब्दं महिषं बस्तं रात्रिशेषे च घातयेत्
vicitrāṃ rakṣayetpūjāmaṣṭamyāmupavāsayet
pañcābdaṃ mahiṣaṃ bastaṃ rātriśeṣe ca ghātayet
- 17
विधिवत्कालि कालीति तदुत्थरुधिरादिकम्
नैरृत्यां पूतनां चैव वायव्यां पापराक्षसीम्
vidhivatkāli kālīti taduttharudhirādikam
nairṛtyāṃ pūtanāṃ caiva vāyavyāṃ pāparākṣasīm
- 18
दद्याच्चरक्यै चैशान्यामाग्नेय्यां च विदारिकाम्
dadyāccarakyai caiśānyāmāgneyyāṃ ca vidārikām
- 19
इति श्रीगारुडे महापुराणे पूर्वखण्डे प्रथमांशाख्ये आचारकाण्डे महानवमीव्रतं नाम त्रयस्त्रिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe mahānavamīvrataṃ nāma trayastriṃśaduttaraśatatamo 'dhyāyaḥ

