24 shlokas
- 1
ब्रह्मोवाच
शिवरात्रिव्रतं वक्ष्ये कथां वै सर्वकामदाम्
यथा च गौरी भूतेशं पृच्छति स्म परं व्रतम्
brahmovāca
śivarātrivrataṃ vakṣye kathāṃ vai sarvakāmadām
yathā ca gaurī bhūteśaṃ pṛcchati sma paraṃ vratam
- 2
ईश्वर उवाच
माघफाल्गुनयोर्मध्ये कृष्णा या तु चतुर्दशी
तस्यां जागरणाद्रुद्रः पूजितो भुक्तिमुक्तिदः
īśvara uvāca
māghaphālgunayormadhye kṛṣṇā yā tu caturdaśī
tasyāṃ jāgaraṇādrudraḥ pūjito bhuktimuktidaḥ
- 3
कामयुक्तो हरः पूज्यो द्वादश्यामि केशवः
उपोषितैः पूजितः सन्नरकात्तरयेत्तथा
kāmayukto haraḥ pūjyo dvādaśyāmi keśavaḥ
upoṣitaiḥ pūjitaḥ sannarakāttarayettathā
- 4
निषादश्चर्बुदे राजा पापी सुन्दरसेनकः
स कुक्कुरैः समायुक्तो मृगान्हन्तुं वनं गतः
niṣādaścarbude rājā pāpī sundarasenakaḥ
sa kukkuraiḥ samāyukto mṛgānhantuṃ vanaṃ gataḥ
- 5
मृगादिकम् असम्प्राप्य क्षुत्पिपासार्दितो गिरौ
रात्रौ तडागतीरेषु निकुञ्जे जाग्रदास्थितः
mṛgādikam asamprāpya kṣutpipāsārdito girau
rātrau taḍāgatīreṣu nikuñje jāgradāsthitaḥ
- 6
तत्रास्ति लिङ्गं स्वं रक्षञ्छरीरं चाक्षिपत्ततः
पर्णानि चापतन्मूर्ध्नि लिङ्गस्यैव न जानतः
tatrāsti liṅgaṃ svaṃ rakṣañcharīraṃ cākṣipattataḥ
parṇāni cāpatanmūrdhni liṅgasyaiva na jānataḥ
- 7
तेन धूलिनिरोधाय क्षिप्तं नीरं च लिङ्गके
शरः प्रमादेनैकस्तु प्रच्युतः करपल्लवात्
tena dhūlinirodhāya kṣiptaṃ nīraṃ ca liṅgake
śaraḥ pramādenaikastu pracyutaḥ karapallavāt
- 8
जानुभ्यामवनीं गत्वा लिङ्गं स्पृष्ट्वा गृहीतवान्
एवं स्नानं स्पर्शनं च पूजनं जागरो ऽभवत्
jānubhyāmavanīṃ gatvā liṅgaṃ spṛṣṭvā gṛhītavān
evaṃ snānaṃ sparśanaṃ ca pūjanaṃ jāgaro 'bhavat
- 9
प्रातर्गृहागतो भार्यादत्तान्नं भुक्तवान्स च
काले मृतो यमभटैः पाशैर्बद्ध्वा तु नीयते
prātargṛhāgato bhāryādattānnaṃ bhuktavānsa ca
kāle mṛto yamabhaṭaiḥ pāśairbaddhvā tu nīyate
- 10
तदा मम गणैर्युद्धे जित्वा मुक्तीकृतः स च
कुक्कुरेण सहैवाभूद्गणो मत्पार्श्वगो ऽमलः
tadā mama gaṇairyuddhe jitvā muktīkṛtaḥ sa ca
kukkureṇa sahaivābhūdgaṇo matpārśvago 'malaḥ
- 11
एवमज्ञानतः पुण्यं ज्ञानात्पुण्यम् अथाक्षयम्
त्रयोदश्यां शिवं पूज्य कुर्यात्त नियमं व्रती
evamajñānataḥ puṇyaṃ jñānātpuṇyam athākṣayam
trayodaśyāṃ śivaṃ pūjya kuryātta niyamaṃ vratī
- 12
प्रातर्देव चतुर्दश्यां जागरिष्याम्यहं निशि
पूजां दानं तपो होमं करिष्याम्यात्मशक्तितः
prātardeva caturdaśyāṃ jāgariṣyāmyahaṃ niśi
pūjāṃ dānaṃ tapo homaṃ kariṣyāmyātmaśaktitaḥ
- 13
चतुर्दश्यां निराहारो भूत्वा शम्भो परे ऽहनि
भोक्ष्ये ऽहं भुक्तिमुक्त्यर्थं शरणं मे भवेश्वर
caturdaśyāṃ nirāhāro bhūtvā śambho pare 'hani
bhokṣye 'haṃ bhuktimuktyarthaṃ śaraṇaṃ me bhaveśvara
- 14
पञ्चगव्यामृतैः स्नाप्य तत्काले गुरुं श्रितः
ॐ नमो नमः शिवाय गन्धाद्यः पूजयेद्धरम्
pañcagavyāmṛtaiḥ snāpya tatkāle guruṃ śritaḥ
oṃ namo namaḥ śivāya gandhādyaḥ pūjayeddharam
- 15
तिलतण्डुलव्रीहींश्च जुहुयात्सघृतं चरुम्
हुत्वा पूर्णाहुतिं दत्त्वा शृणुयाद्गीतसत्कथाम्
tilataṇḍulavrīhīṃśca juhuyātsaghṛtaṃ carum
hutvā pūrṇāhutiṃ dattvā śṛṇuyādgītasatkathām
- 16
अर्धरात्रे त्रियामे च चतुर्थे च पुनयर्जत्
मूलमन्त्रं तथा जप्त्वा प्रभाते तु क्षमापयेत्
ardharātre triyāme ca caturthe ca punayarjat
mūlamantraṃ tathā japtvā prabhāte tu kṣamāpayet
- 17
अविघ्नेन व्रतं देव त्वत्प्रसादान्मयार्चितम्
क्षमस्व जगतां नाथ त्रैलोक्याधिपते हर
avighnena vrataṃ deva tvatprasādānmayārcitam
kṣamasva jagatāṃ nātha trailokyādhipate hara
- 18
यन्मयाद्य कृतं पुण्यं यद्रुद्रस्य निवेदितम्
त्वत्प्रसादान्मया देव व्रतमद्य समापितम्
yanmayādya kṛtaṃ puṇyaṃ yadrudrasya niveditam
tvatprasādānmayā deva vratamadya samāpitam
- 19
प्रसन्नो भव मे श्रीमन्गृहं प्रति च गम्यताम्
त्वदालोकनमात्रेण पवित्रो ऽस्मि न संशयः
prasanno bhava me śrīmangṛhaṃ prati ca gamyatām
tvadālokanamātreṇa pavitro 'smi na saṃśayaḥ
- 20
भोजयेद्ध्याननिष्ठांश्च वस्त्रच्छत्रादिकं ददेत्
देवादिदेव भूतेश लोकानुग्रहकारक
bhojayeddhyānaniṣṭhāṃśca vastracchatrādikaṃ dadet
devādideva bhūteśa lokānugrahakāraka
- 21
यन्मया श्रद्धया दत्तं प्रीयतां तेन मे प्रभुः
इति क्षमाप्य च व्रती कुर्याद्वादशवार्षिकम्
yanmayā śraddhayā dattaṃ prīyatāṃ tena me prabhuḥ
iti kṣamāpya ca vratī kuryādvādaśavārṣikam
- 22
कीर्तिश्रीपुत्रराज्यादि प्राप्य शैवं पुरं व्रजेत्
द्वादशेष्वपि मासेषु प्रकुर्यादिह जागरम्
kīrtiśrīputrarājyādi prāpya śaivaṃ puraṃ vrajet
dvādaśeṣvapi māseṣu prakuryādiha jāgaram
- 23
व्रती द्वादश संभोज्य दीपदः स्वर्गम् आप्नुयात्
vratī dvādaśa saṃbhojya dīpadaḥ svargam āpnuyāt
- 24
इति श्रीगारुडे महापुराणे पूर्वखण्डे प्रथमांशाख्ये आचारकाण्डे शिवरात्रिव्रतं नाम चतुर्विंशत्युत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe śivarātrivrataṃ nāma caturviṃśatyuttaraśatatamo 'dhyāyaḥ

