66 shlokas
- 1
हरिरुवाच
चतुर्दश मनून्वक्ष्ये तत्सुताश्च सुकादिकान्
मनुः स्वायम्भुवः पूर्वम् अग्निघ्राद्याश्च तत्सुताः
hariruvāca
caturdaśa manūnvakṣye tatsutāśca sukādikān
manuḥ svāyambhuvaḥ pūrvam agnighrādyāśca tatsutāḥ
- 2
मरीचिरत्र्यङ्गिरसौ पुलस्त्यः पुलहः क्रतुः
वसिष्ठश्च महातेजा ऋषयः सप्त कीर्तिताः
marīciratryaṅgirasau pulastyaḥ pulahaḥ kratuḥ
vasiṣṭhaśca mahātejā ṛṣayaḥ sapta kīrtitāḥ
- 3
जयाख्याशाचमिताख्याश्च शुक्रा यामास्तथैव च
गणा द्वादशकाश्चेति चत्वारः सोमपायिनः
jayākhyāśācamitākhyāśca śukrā yāmāstathaiva ca
gaṇā dvādaśakāśceti catvāraḥ somapāyinaḥ
- 4
विश्वभुग्वामदेवेन्द्रो बाष्कलिस्तदरिर्ह्यभूत्
स हतो विष्णुना दैत्यश्चक्रेण सुमहात्मना
viśvabhugvāmadevendro bāṣkalistadarirhyabhūt
sa hato viṣṇunā daityaścakreṇa sumahātmanā
- 5
मनुः स्वारोचिषश्चाथ तत्पुत्रो मण्डलेश्वरः
चित्रको विनतश्चैव कर्णान्तो विद्युतो रविः
manuḥ svārociṣaścātha tatputro maṇḍaleśvaraḥ
citrako vinataścaiva karṇānto vidyuto raviḥ
- 6
बृहद्गुणो नभश्चैव महाबलपराक्रमः
ऊर्जस्तम्बस्तथा प्राण ऋषभो निश्चलस्तथा
bṛhadguṇo nabhaścaiva mahābalaparākramaḥ
ūrjastambastathā prāṇa ṛṣabho niścalastathā
- 7
दत्तोलिश्चावरीवांश्च ऋष्यः सप्त कीर्तिताः
तुषिता द्वादश प्रोक्तास्तथा पारावताश्च ये
dattoliścāvarīvāṃśca ṛṣyaḥ sapta kīrtitāḥ
tuṣitā dvādaśa proktāstathā pārāvatāśca ye
- 8
इन्द्रो विपश्चिद्देवानां तद्रिपुः पुरुकृत्सरः
जघान हस्तिरूपेण भगवान्मधुसूदनः
indro vipaściddevānāṃ tadripuḥ purukṛtsaraḥ
jaghāna hastirūpeṇa bhagavānmadhusūdanaḥ
- 9
औत्तमस्य मनोः पुत्रा आजश्च परशुस्तथा
विनीतश्च सुकेतुश्च सुमित्रः सुबलः शुचिः
auttamasya manoḥ putrā ājaśca paraśustathā
vinītaśca suketuśca sumitraḥ subalaḥ śuciḥ
- 10
देवो देवावृधो रुद्र महोत्साहो जितस्तथा
रथौजा ऊर्ध्वबाहुश्च शरणश्चानघो मुनिः
devo devāvṛdho rudra mahotsāho jitastathā
rathaujā ūrdhvabāhuśca śaraṇaścānagho muniḥ
- 11
सुतपाः शङ्कुरित्येते ऋषयः सप्त कीर्तिताः
वशवर्तिस्वधामानः शिवाः सत्याः प्रतर्दनाः
sutapāḥ śaṅkurityete ṛṣayaḥ sapta kīrtitāḥ
vaśavartisvadhāmānaḥ śivāḥ satyāḥ pratardanāḥ
- 12
पञ्च देवगणाः प्रोक्ताः सर्वे द्वादशकास्तु ते
इन्द्रः स्वशान्तिस्तच्छुक्रः प्रलम्बो नाम दानवः
pañca devagaṇāḥ proktāḥ sarve dvādaśakāstu te
indraḥ svaśāntistacchukraḥ pralambo nāma dānavaḥ
- 13
मत्स्यरूपी हरिर्विष्णुस्तं जघान च दानवम्
तामसस्य मनोः पुत्रा जानुजङ्घो ऽथ निर्भयः
matsyarūpī harirviṣṇustaṃ jaghāna ca dānavam
tāmasasya manoḥ putrā jānujaṅgho 'tha nirbhayaḥ
- 14
नवख्यातिर्नयश्चैव प्रियभृत्यो विविक्षिपः
दृढेषुधिः प्रस्तलाक्षः कृबन्धुः कृतस्तथा
navakhyātirnayaścaiva priyabhṛtyo vivikṣipaḥ
dṛḍheṣudhiḥ prastalākṣaḥ kṛbandhuḥ kṛtastathā
- 15
ज्योतिर्धामा पृथुः काव्यश्चैत्रश्चेताग्निहेमकाः
मुनयः कीर्तिताः सप्त सुरागाः सुधियस्तथा
jyotirdhāmā pṛthuḥ kāvyaścaitraścetāgnihemakāḥ
munayaḥ kīrtitāḥ sapta surāgāḥ sudhiyastathā
- 16
हरयो देवतामां च चत्वारः पञ्चविंशकाः
गणा इन्द्रः शिबिस्तस्य शत्रुर्भीमरथाः स्मृताः
harayo devatāmāṃ ca catvāraḥ pañcaviṃśakāḥ
gaṇā indraḥ śibistasya śatrurbhīmarathāḥ smṛtāḥ
- 17
हरिणा कूर्मरूपेण हतो भीमरथो ऽसुरः
रैवतस्य मनोः पुत्रो महाप्राणश्च साधकः
hariṇā kūrmarūpeṇa hato bhīmaratho 'suraḥ
raivatasya manoḥ putro mahāprāṇaśca sādhakaḥ
- 18
वनबन्धुर्निरमित्रः प्रत्यङ्गः परहा शुचिः
दृढव्रतः केतुशृगं ऋषयस्तस्य वर्ण्यते
vanabandhurniramitraḥ pratyaṅgaḥ parahā śuciḥ
dṛḍhavrataḥ ketuśṛgaṃ ṛṣayastasya varṇyate
- 19
वेदश्रीर्वेदबाहुश्च ऊर्ध्वबाहुस्तथैव च
हिरण्यरोमा पर्जन्यः सत्यनेत्रः स्वधाम च
vedaśrīrvedabāhuśca ūrdhvabāhustathaiva ca
hiraṇyaromā parjanyaḥ satyanetraḥ svadhāma ca
- 20
अभूतरजसश्चैव तथा देवाश्वमेधसः
वैकुण्ठश्चामृतश्चैव चत्वारो देवतागणाः
abhūtarajasaścaiva tathā devāśvamedhasaḥ
vaikuṇṭhaścāmṛtaścaiva catvāro devatāgaṇāḥ
- 21
गणे चतुर्दश सुरा विभुर् इन्द्रः प्रतापवान्
शान्तः शत्रुर्हतो दैत्यो हंसरूपेण विष्णुना
gaṇe caturdaśa surā vibhur indraḥ pratāpavān
śāntaḥ śatrurhato daityo haṃsarūpeṇa viṣṇunā
- 22
चाक्षुषस्य मनोः पुत्रा उरुः पुरुर्महाबलः
शतद्युम्नस्तपस्वी च सत्यबाहुः कृतिस्तथा
cākṣuṣasya manoḥ putrā uruḥ pururmahābalaḥ
śatadyumnastapasvī ca satyabāhuḥ kṛtistathā
- 23
अग्निष्णुर् अतिरात्रश्च सुद्युम्नश्च तथा नरः
हविष्मानुत्तमः श्रीमान्स्वधामा विरजस्तथा
agniṣṇur atirātraśca sudyumnaśca tathā naraḥ
haviṣmānuttamaḥ śrīmānsvadhāmā virajastathā
- 24
अभिमानः सहिष्णुश्च मधुश्रीर् ऋषयः स्मृताः
आर्याः प्रभूता भाव्याश्च लेखाश्च पृथुकास्तथा
abhimānaḥ sahiṣṇuśca madhuśrīr ṛṣayaḥ smṛtāḥ
āryāḥ prabhūtā bhāvyāśca lekhāśca pṛthukāstathā
- 25
अष्टकस्य गणाः पञ्च तथा प्रोक्ता दिवौकसाम्
इन्द्रो मनोजवः शत्रुर्महाकालो महाभजः
aṣṭakasya gaṇāḥ pañca tathā proktā divaukasām
indro manojavaḥ śatrurmahākālo mahābhajaḥ
- 26
अश्वरूपेण स हतो हरिणा लोकधारिणा
मनोर्वैवस्वतस्यैते पुत्रा विष्णुपरायणाः
aśvarūpeṇa sa hato hariṇā lokadhāriṇā
manorvaivasvatasyaite putrā viṣṇuparāyaṇāḥ
- 27
इक्ष्वाकुरथ नाभागो धृष्टः शर्यातिरेव च
नरिष्यन्तस्तथा पांसुर्नभो नेदिष्ठ एव च
ikṣvākuratha nābhāgo dhṛṣṭaḥ śaryātireva ca
nariṣyantastathā pāṃsurnabho nediṣṭha eva ca
- 28
करूषश्च पृषध्रश्च सुद्युम्नश्च मनोः सुताः
अत्रिर्वसिष्ठो भगवाञ्जमदग्निश्च कश्यपः
karūṣaśca pṛṣadhraśca sudyumnaśca manoḥ sutāḥ
atrirvasiṣṭho bhagavāñjamadagniśca kaśyapaḥ
- 29
गौतमश्च भरद्वाजो विश्वामित्रो ऽथ सप्तमः
तथा ह्येकोनपञ्चाशन्मरुतः परिकीर्तिताः
gautamaśca bharadvājo viśvāmitro 'tha saptamaḥ
tathā hyekonapañcāśanmarutaḥ parikīrtitāḥ
- 30
आदित्या वसवः साध्यागणा द्वादशकास्त्रयः
एकादशा तथा रुद्रा वसवो ऽष्टौ प्रकीर्तिताः
ādityā vasavaḥ sādhyāgaṇā dvādaśakāstrayaḥ
ekādaśā tathā rudrā vasavo 'ṣṭau prakīrtitāḥ

