20 shlokas
- 1
रुद्र उवाच
विष्णोर्ध्यानं पुनर्ब्रूहि शङ्खचक्रगदाधर
येन विज्ञातमात्रेण कृतकृत्यो भवेन्नरः
rudra uvāca
viṣṇordhyānaṃ punarbrūhi śaṅkhacakragadādhara
yena vijñātamātreṇa kṛtakṛtyo bhavennaraḥ
- 2
हरिरुवाच
प्रवक्ष्यामि हरेर्ध्यानं मायातन्त्रविमर्दकम्
मूर्तामूर्तादिभेदेन तद्ध्यानं द्विविधं हर
hariruvāca
pravakṣyāmi harerdhyānaṃ māyātantravimardakam
mūrtāmūrtādibhedena taddhyānaṃ dvividhaṃ hara
- 3
अमूर्तं रुद्र कथितं हन्त मूर्तं ब्रवीम्यहम्
सूर्यकोटिप्रतीकाशो जिष्णुर्भ्राजिष्णुर् एकतः
amūrtaṃ rudra kathitaṃ hanta mūrtaṃ bravīmyaham
sūryakoṭipratīkāśo jiṣṇurbhrājiṣṇur ekataḥ
- 4
कुन्दगोक्षीरधवलो हरिर्ध्येयो मुमुक्षुभिः
विशालेन सुसौम्येन शङ्खेन च समन्वितः
kundagokṣīradhavalo harirdhyeyo mumukṣubhiḥ
viśālena susaumyena śaṅkhena ca samanvitaḥ
- 5
सहस्रादित्यतुल्येन ज्वालामालोग्ररूपिणा
चक्रेण चान्वितः शान्तो गदाहस्तः शुभाननः
sahasrādityatulyena jvālāmālograrūpiṇā
cakreṇa cānvitaḥ śānto gadāhastaḥ śubhānanaḥ
- 6
किरीटेन महार्हेण रत्नप्रज्वलितेन च
सायुधः सर्वगो देवः सरोरुहधरस्तथा
kirīṭena mahārheṇa ratnaprajvalitena ca
sāyudhaḥ sarvago devaḥ saroruhadharastathā
- 7
वनमालाधरः शुभ्रः समांसो हेमभूषणः
सुवस्त्रः शुद्धदेहश्च सुकर्णः पद्मसंस्थितः
vanamālādharaḥ śubhraḥ samāṃso hemabhūṣaṇaḥ
suvastraḥ śuddhadehaśca sukarṇaḥ padmasaṃsthitaḥ
- 8
हिरण्मयशरीरश्च चारुहारी शुभाङ्गदः
केयूरेण समायुक्तो वनमालासमन्वितः
hiraṇmayaśarīraśca cāruhārī śubhāṅgadaḥ
keyūreṇa samāyukto vanamālāsamanvitaḥ
- 9
श्रीवत्सकौस्तुभयुतो लक्ष्मीवन्द्येक्षणान्वितः
अणिमादिगुणैर्युक्तः सृष्टिसंहारकारकः
śrīvatsakaustubhayuto lakṣmīvandyekṣaṇānvitaḥ
aṇimādiguṇairyuktaḥ sṛṣṭisaṃhārakārakaḥ
- 10
मुनिध्येयो ऽसुरध्येयो देवध्येयो ऽतिसुन्दरः
ब्रह्मादिस्तम्बपर्यन्तभूतजातहृदिस्थितः
munidhyeyo 'suradhyeyo devadhyeyo 'tisundaraḥ
brahmādistambaparyantabhūtajātahṛdisthitaḥ
- 11
सनातनो ऽव्ययो मेध्यः सर्वानुग्रहकृत्प्रभुः
नारायणो महादेवः स्फुरन्मकरकुण्डलः
sanātano 'vyayo medhyaḥ sarvānugrahakṛtprabhuḥ
nārāyaṇo mahādevaḥ sphuranmakarakuṇḍalaḥ
- 12
सन्तापनाशनो ऽभ्यर्च्यो मङ्गल्यो दुष्टनाशनः
सर्वात्मा सर्वरूपश्च सर्वगो ग्रहनाशनः
santāpanāśano 'bhyarcyo maṅgalyo duṣṭanāśanaḥ
sarvātmā sarvarūpaśca sarvago grahanāśanaḥ
- 13
चार्वङ्गुलीयसंयुक्तः सुदीप्तनख एव च
शरण्यः लसुखकारी च सौम्यरूपो महेश्वरः
cārvaṅgulīyasaṃyuktaḥ sudīptanakha eva ca
śaraṇyaḥ lasukhakārī ca saumyarūpo maheśvaraḥ
- 14
सर्वालङ्कारसंयुक्तश्चारुचन्दनचर्चितः
सर्वदेवसमायुक्तः सर्वदेवप्रियंकरः
sarvālaṅkārasaṃyuktaścārucandanacarcitaḥ
sarvadevasamāyuktaḥ sarvadevapriyaṃkaraḥ
- 15
सर्वलोकहितैषी च सर्वेशः सर्वभावनः
आदित्यमण्डले संस्थो ऽग्निस्थो वारिसंस्थितः
sarvalokahitaiṣī ca sarveśaḥ sarvabhāvanaḥ
ādityamaṇḍale saṃstho 'gnistho vārisaṃsthitaḥ
- 16
वासुदेवो जगद्धाता ध्येयो विष्णुर्मुमुक्षुभिः
वासुदेवो ऽहमस्मीति आत्मा ध्येयो हरिहरिः
vāsudevo jagaddhātā dhyeyo viṣṇurmumukṣubhiḥ
vāsudevo 'hamasmīti ātmā dhyeyo harihariḥ
- 17
ध्यायन्त्येवं च ये विष्णुं ते यान्ति परमां गतिम्
याज्ञवल्क्यः पुरा ह्येवं ध्यात्वा विष्णुं सुरेश्वरम्
dhyāyantyevaṃ ca ye viṣṇuṃ te yānti paramāṃ gatim
yājñavalkyaḥ purā hyevaṃ dhyātvā viṣṇuṃ sureśvaram
- 18
धर्मोपदेशकर्तृत्वं सम्प्राप्यागात्परं पदम्
तस्मात्त्वमपि देवेश विष्णुं चिन्तय शङ्कर
dharmopadeśakartṛtvaṃ samprāpyāgātparaṃ padam
tasmāttvamapi deveśa viṣṇuṃ cintaya śaṅkara
- 19
विष्णुध्यानं पठेद्यस्तु प्राप्नोति परमां गतिम्
viṣṇudhyānaṃ paṭhedyastu prāpnoti paramāṃ gatim
- 20
इति श्रीगारुडे महापुराणे पूर्वखण्डे प्रथमांशाख्ये आचारकाण्डे विष्णुध्यानं नाम द्विनवतितमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe viṣṇudhyānaṃ nāma dvinavatitamo 'dhyāyaḥ

