18 shlokas
- 1
सूत उवाच
शिवार्चनं प्रवक्ष्यामि भुक्तिमुक्तिकरं परम्
शान्तं सर्वगतं शून्यं मात्राद्वादशके स्थितम्
sūta uvāca
śivārcanaṃ pravakṣyāmi bhuktimuktikaraṃ param
śāntaṃ sarvagataṃ śūnyaṃ mātrādvādaśake sthitam
- 2
पञ्च वक्त्राणि ह्रस्वानि दीर्घाण्यङ्गानि बिन्दुना
सविसर्गं वदेदस्त्रं शिव ऊर्ध्वं तथा पुनः
pañca vaktrāṇi hrasvāni dīrghāṇyaṅgāni bindunā
savisargaṃ vadedastraṃ śiva ūrdhvaṃ tathā punaḥ
- 3
षष्ठेनाधो महामन्त्रो हौमित्येवाखिलार्थदः
हस्ताभ्यां संस्पृशेत्पादाव् ऊर्ध्वं पादान्मस्तकम्
ṣaṣṭhenādho mahāmantro haumityevākhilārthadaḥ
hastābhyāṃ saṃspṛśetpādāv ūrdhvaṃ pādānmastakam
- 4
महामुद्रा हि सर्वेषां कराङ्गन्यासमाचरेत्
तालहस्तेन पृष्ठं च अस्त्रमन्त्रेण शोधयेत्
mahāmudrā hi sarveṣāṃ karāṅganyāsamācaret
tālahastena pṛṣṭhaṃ ca astramantreṇa śodhayet
- 5
कनिष्ठामादितः कृत्वा तर्जन्यङ्गानि विन्यसेत्
पूजनं सम्प्रवक्ष्यामि कर्णिकायां हृदम्बुजे
kaniṣṭhāmāditaḥ kṛtvā tarjanyaṅgāni vinyaset
pūjanaṃ sampravakṣyāmi karṇikāyāṃ hṛdambuje
- 6
धर्मं ज्ञानं च वैराग्यमैश्वर्यादि हृदार्चयेत्
आवाहनं स्थापनं च पाद्यमर्घ्यं हृदार्पयेत्
dharmaṃ jñānaṃ ca vairāgyamaiśvaryādi hṛdārcayet
āvāhanaṃ sthāpanaṃ ca pādyamarghyaṃ hṛdārpayet
- 7
आचामं स्नपनं पूजाम् एकाधारणतुल्यकम्
अग्निकार्यविधिं वक्ष्ये अस्त्रेणोल्लेखनं चरेत्
ācāmaṃ snapanaṃ pūjām ekādhāraṇatulyakam
agnikāryavidhiṃ vakṣye astreṇollekhanaṃ caret
- 8
वर्मणाभ्युक्षणं कार्यं शक्तिन्यासं हृदा चरेत्
हृदि वा शक्तिगर्ते च प्रक्षिपेज्जातवेदसम्
varmaṇābhyukṣaṇaṃ kāryaṃ śaktinyāsaṃ hṛdā caret
hṛdi vā śaktigarte ca prakṣipejjātavedasam
- 9
गर्भाधानादिकं कृत्वा निष्कृतिं चारस्य पश्चिमाम्
हृदा कृत्वा सर्वकर्म शिवं साङ्गं तु होमयेत्
garbhādhānādikaṃ kṛtvā niṣkṛtiṃ cārasya paścimām
hṛdā kṛtvā sarvakarma śivaṃ sāṅgaṃ tu homayet
- 10
पूजयेन्मण्डले शम्भुं पद्मगर्भे गराङ्कितम्
चतुःषष्ट्यन्तम् अष्टादि खाक्षि खाद्य् आदिमण्डलम्
pūjayenmaṇḍale śambhuṃ padmagarbhe garāṅkitam
catuḥṣaṣṭyantam aṣṭādi khākṣi khādy ādimaṇḍalam
- 11
खाक्षीन्द्रसूर्यगं सर्वखादिवेदेन्दु वर्तनम्
आग्नेय्यां कारयेत्कुण्डम् अर्धचन्द्रनिभं शुभम्
khākṣīndrasūryagaṃ sarvakhādivedendu vartanam
āgneyyāṃ kārayetkuṇḍam ardhacandranibhaṃ śubham
- 12
अग्निशास्त्रपरायुस्थो हृदयादिगणोच्यते
अस्त्रं दिशा सुपद्मस्य कर्णिकायां सदाशिवः
agniśāstraparāyustho hṛdayādigaṇocyate
astraṃ diśā supadmasya karṇikāyāṃ sadāśivaḥ
- 13
दीक्षां वक्ष्ये पञ्चतत्त्वे स्थितां भूम्यादिकां परे
निवृत्तिर्भूप्रतिष्ठाद्यैर्विद्याग्निः शान्तिवन्निजः
dīkṣāṃ vakṣye pañcatattve sthitāṃ bhūmyādikāṃ pare
nivṛttirbhūpratiṣṭhādyairvidyāgniḥ śāntivannijaḥ
- 14
शान्त्यतीतं भवेद्व्योम तत्परं शान्तमव्ययम्
एकैकस्य शतं होमा हत्येवं पञ्च होमयेत्
śāntyatītaṃ bhavedvyoma tatparaṃ śāntamavyayam
ekaikasya śataṃ homā hatyevaṃ pañca homayet
- 15
पश्चात्पूर्णाहुतिं दत्त्वा प्रासोदन शिवं स्मरेत्
प्रायश्चित्तविशुद्ध्यर्थम् एकैकाष्टाहुतिं क्रमात्
paścātpūrṇāhutiṃ dattvā prāsodana śivaṃ smaret
prāyaścittaviśuddhyartham ekaikāṣṭāhutiṃ kramāt
- 16
होमयेदस्त्रबीजेन एवं दीक्षां समापयेत्
यजनव्यतिरेकेण गोप्यं संस्कारमुत्तमम्
homayedastrabījena evaṃ dīkṣāṃ samāpayet
yajanavyatirekeṇa gopyaṃ saṃskāramuttamam
- 17
एवं संस्कारशुद्धस्य शिवत्वं जायते ध्रुवम्
evaṃ saṃskāraśuddhasya śivatvaṃ jāyate dhruvam
- 18
इति श्रीगारुडे महापुराणे पूर्वखण्डे प्रथमांशाख्ये आचारकाण्डे शिवार्चनप्रकारो नाम द्वाविंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe śivārcanaprakāro nāma dvāviṃśo 'dhyāyaḥ

