22 shlokas
- 1
ब्रह्मोवाच
ब्रह्मन्भाद्रपदे मासि शुक्लाष्टम्यामुपोषितः
दूर्वां सौरीं गणेशं च फलपुष्पैः शिवं यजेत्
brahmovāca
brahmanbhādrapade māsi śuklāṣṭamyāmupoṣitaḥ
dūrvāṃ saurīṃ gaṇeśaṃ ca phalapuṣpaiḥ śivaṃ yajet
- 2
फलव्रीह्यादिभिः सर्वैः शम्भवे नमः शिवाय च
त्वं दूर्वे ऽमृजन्मासि ह्यष्टमी सर्वकामभाक्
phalavrīhyādibhiḥ sarvaiḥ śambhave namaḥ śivāya ca
tvaṃ dūrve 'mṛjanmāsi hyaṣṭamī sarvakāmabhāk
- 3
अनग्निपक्वम् अश्नीयान्मुच्यते ब्रह्महत्यया
कृष्णाष्टम्यां च रोहिण्याम् अर्धरात्रे ऽर्चनं हरेः
anagnipakvam aśnīyānmucyate brahmahatyayā
kṛṣṇāṣṭamyāṃ ca rohiṇyām ardharātre 'rcanaṃ hareḥ
- 4
कार्या विद्धापि सप्तम्या हन्ति पापं त्रिजन्मनः
उपोषितो ऽर्चयेन्मन्त्रैस्तिथिभान्ते च पारणम्
kāryā viddhāpi saptamyā hanti pāpaṃ trijanmanaḥ
upoṣito 'rcayenmantraistithibhānte ca pāraṇam
- 5
योगाय योगपतये योगेश्वराय योगसम्भवाय गोविन्दाय नमोनमः
यज्ञाय यज्ञेश्वराय यज्ञपतये गोविन्दाय नमोनमः
yogāya yogapataye yogeśvarāya yogasambhavāya govindāya namonamaḥ
yajñāya yajñeśvarāya yajñapataye govindāya namonamaḥ
- 6
विश्वाय विश्वेश्वराय विश्वपतये गोविन्दाय नमोनमः
सर्वाय सर्वेश्वराय सर्वेताय सर्वसम्भवाय गोविन्दाय नमोनमः
viśvāya viśveśvarāya viśvapataye govindāya namonamaḥ
sarvāya sarveśvarāya sarvetāya sarvasambhavāya govindāya namonamaḥ
- 7
स्थण्डिले पूजयेद्देवं सचन्द्रां रोहिणीं तथा
शङ्खे तोयं समादाय सपुष्पफलचन्दनम्
sthaṇḍile pūjayeddevaṃ sacandrāṃ rohiṇīṃ tathā
śaṅkhe toyaṃ samādāya sapuṣpaphalacandanam
- 8
जानुभ्यामवनीं गत्वा चन्द्रायार्घ्यं निवेदयेत्
क्षीरोदार्णवसम्भूत अत्रिनेत्रसमुद्भव
jānubhyāmavanīṃ gatvā candrāyārghyaṃ nivedayet
kṣīrodārṇavasambhūta atrinetrasamudbhava
- 9
गृहाणार्घ्यं शशाङ्केश रोहिण्या सहितो मम
श्रियै च वसुदेवाय नन्दाय च बलाय च
gṛhāṇārghyaṃ śaśāṅkeśa rohiṇyā sahito mama
śriyai ca vasudevāya nandāya ca balāya ca
- 10
यशोदायै ततो दद्यादर्घ्यं फलसमन्वितम्
अनन्तं वामनं शौरिं वैकुण्ठं पुरुषोत्तमम्
yaśodāyai tato dadyādarghyaṃ phalasamanvitam
anantaṃ vāmanaṃ śauriṃ vaikuṇṭhaṃ puruṣottamam
- 11
वासुदेवं हृषीकेशं माधवं मधुसूदनम्
वराहं पुण्डरीकाक्षं नृसिंहं दैत्यसूदनम्
vāsudevaṃ hṛṣīkeśaṃ mādhavaṃ madhusūdanam
varāhaṃ puṇḍarīkākṣaṃ nṛsiṃhaṃ daityasūdanam
- 12
दामोदरं पद्मनाभं केशवं गारुडध्वजम्
गोविन्दमच्युतं देवम् अनन्तमपराजितम्
dāmodaraṃ padmanābhaṃ keśavaṃ gāruḍadhvajam
govindamacyutaṃ devam anantamaparājitam
- 13
अधोक्षजं जगद्बीजं सर्गस्थित्यन्तकारणम्
अनादिनिधनं विष्णुं त्रिलोकेशं त्रिविक्रमम्
adhokṣajaṃ jagadbījaṃ sargasthityantakāraṇam
anādinidhanaṃ viṣṇuṃ trilokeśaṃ trivikramam
- 14
नारायणं चतुर्बाहुं शङ्खचक्रगदाधरम्
पीताम्बरधरं दिव्यं वनमालाविभूषितम्
nārāyaṇaṃ caturbāhuṃ śaṅkhacakragadādharam
pītāmbaradharaṃ divyaṃ vanamālāvibhūṣitam
- 15
श्रीवत्साङ्कं जगद्धाम श्रीपतिं श्रीधरं हरिम्
यं देवं देवकी देवी वसुदेवादजीजनत्
śrīvatsāṅkaṃ jagaddhāma śrīpatiṃ śrīdharaṃ harim
yaṃ devaṃ devakī devī vasudevādajījanat
- 16
भौमस्य ब्रह्मणो गुप्त्यै तस्मै ब्रह्मात्मने नमः
नामान्येतानि संकीर्त्य गत्यर्थं प्रार्थयेत्पुनः
bhaumasya brahmaṇo guptyai tasmai brahmātmane namaḥ
nāmānyetāni saṃkīrtya gatyarthaṃ prārthayetpunaḥ
- 17
त्राहि मां देवदेवेश हरे संसारसागरात्
त्राहि मां सर्वपापघ्न दुःखशोकार्णवात्प्रभो
trāhi māṃ devadeveśa hare saṃsārasāgarāt
trāhi māṃ sarvapāpaghna duḥkhaśokārṇavātprabho
- 18
देवकीनन्दन श्रीश हरे संसारसागरात्
दुर्वृत्तांस्त्रायसे विष्णो ये स्मरन्ति सकृत्सकृत्
devakīnandana śrīśa hare saṃsārasāgarāt
durvṛttāṃstrāyase viṣṇo ye smaranti sakṛtsakṛt
- 19
सो ऽहं देवातिदुर्वृत्तस्त्राहि मां शोकसागरात्
पुष्कराक्ष निमग्नो ऽहं महत्यज्ञानसागरे
so 'haṃ devātidurvṛttastrāhi māṃ śokasāgarāt
puṣkarākṣa nimagno 'haṃ mahatyajñānasāgare
- 20
त्राहि मां देवदेवेश त्वामृते ऽन्यो न रक्षिता
स्वजन्म वासुदेवाय गोब्राह्मणहिताय च
trāhi māṃ devadeveśa tvāmṛte 'nyo na rakṣitā
svajanma vāsudevāya gobrāhmaṇahitāya ca
- 21
जगद्धिताय कृष्णाय गोविन्दाय नमोनमः
शान्तिरस्तु शिवं चास्तु धनविख्यातिराज्यभाक्
jagaddhitāya kṛṣṇāya govindāya namonamaḥ
śāntirastu śivaṃ cāstu dhanavikhyātirājyabhāk
- 22
इति श्रीगारुडे महापुराणे पूर्वखण्डे प्रथमांशाख्ये आचारकाण्डे कृष्णाष्टमीव्रतनिरूपणं नामैकत्रिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe kṛṣṇāṣṭamīvratanirūpaṇaṃ nāmaikatriṃśaduttaraśatatamo 'dhyāyaḥ

