13 shlokas
- 1
ब्रह्मोवाच
श्रवणद्वादशीं वक्ष्ये भुक्तिमुक्तिप्रदायिनीम्
एकादशी द्वादशी च श्रवणेन च संयुता
brahmovāca
śravaṇadvādaśīṃ vakṣye bhuktimuktipradāyinīm
ekādaśī dvādaśī ca śravaṇena ca saṃyutā
- 2
विजया सा तिथिः प्रोक्ता हरिपूजादि चाक्षयम्
एकभक्तेन नक्तेन तथैवायाचितेन च
vijayā sā tithiḥ proktā haripūjādi cākṣayam
ekabhaktena naktena tathaivāyācitena ca
- 3
उपवासेन भैक्ष्येण नैवाद्बादशिको भवेत्
कांस्यं मांसं तथा क्षौद्रं लोभं वितथभाषणम्
upavāsena bhaikṣyeṇa naivādbādaśiko bhavet
kāṃsyaṃ māṃsaṃ tathā kṣaudraṃ lobhaṃ vitathabhāṣaṇam
- 4
व्यायामं च व्यवायं च दिवास्वप्नमथाञ्जनम्
शिलापिष्टं मसूरं च द्वादश्यां वर्जयेन्नरः
vyāyāmaṃ ca vyavāyaṃ ca divāsvapnamathāñjanam
śilāpiṣṭaṃ masūraṃ ca dvādaśyāṃ varjayennaraḥ
- 5
मासि भाद्रपदे शुक्ला द्वादशी श्रवणान्विता
महती द्वादशी ज्ञेया उपवासे महाफला
māsi bhādrapade śuklā dvādaśī śravaṇānvitā
mahatī dvādaśī jñeyā upavāse mahāphalā
- 6
संगमसरितां स्नानं बुधयुक्ता महाफला
कुंभे सरत्ने सजले यजेत्स्वर्णं तु वामनम्
saṃgamasaritāṃ snānaṃ budhayuktā mahāphalā
kuṃbhe saratne sajale yajetsvarṇaṃ tu vāmanam
- 7
सितवस्त्रयुगच्छन्नं छत्रोपानद्युगान्वितम्
ॐ नमो वासुदेवाय शिरः सम्पूजयेत्ततः
sitavastrayugacchannaṃ chatropānadyugānvitam
oṃ namo vāsudevāya śiraḥ sampūjayettataḥ
- 8
श्रीधराय मुखं तद्वत्कण्ठं कृष्णाय वै नमः
नमः श्रीपतये वक्षो भुजौ सर्वास्त्रधारिणे
śrīdharāya mukhaṃ tadvatkaṇṭhaṃ kṛṣṇāya vai namaḥ
namaḥ śrīpataye vakṣo bhujau sarvāstradhāriṇe
- 9
व्यापकाय नमः कुक्षौ केशवायोदरं बुधः
त्रैलोक्यपतये मेढ्रं जङ्घे सर्वभृते नमः
vyāpakāya namaḥ kukṣau keśavāyodaraṃ budhaḥ
trailokyapataye meḍhraṃ jaṅghe sarvabhṛte namaḥ
- 10
सर्वात्मने नमः पादौ नैवेद्यं घृतपायसम्
कुम्भांश्च मोदकान्दद्याज्जागरं कारयेन्निशि
sarvātmane namaḥ pādau naivedyaṃ ghṛtapāyasam
kumbhāṃśca modakāndadyājjāgaraṃ kārayenniśi
- 11
स्नात्वाचान्तो ऽर्चयित्वा तु कृतपुष्पाञ्जलिर्वदेत्
नमोनमस्ते गोविन्द बुध श्रवणसंज्ञक
snātvācānto 'rcayitvā tu kṛtapuṣpāñjalirvadet
namonamaste govinda budha śravaṇasaṃjñaka
- 12
अघौघसंक्षयं कृत्वा सर्वसौख्यप्रदो भव
प्रीयतां देवदेवेशो विप्रेभ्यः कलशान्ददेत्
नद्यस्तीरे ऽयः वा कुर्यात्सर्वान्कामानवाप्नुयात्
aghaughasaṃkṣayaṃ kṛtvā sarvasaukhyaprado bhava
prīyatāṃ devadeveśo viprebhyaḥ kalaśāndadet
nadyastīre 'yaḥ vā kuryātsarvānkāmānavāpnuyāt
- 13
इति श्रीगारुडे महापुराणे पूर्वखण्डे प्रथमांशाख्ये आचारकाण्डे श्रवणद्वादशीव्रतनिरूपणं नाम षट्त्रिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe śravaṇadvādaśīvratanirūpaṇaṃ nāma ṣaṭtriṃśaduttaraśatatamo 'dhyāyaḥ

