20 shlokas
- 1
रुद्र उवाच
पुनर्ध्यानं समाचक्ष्व शङ्खचक्रगदाधर
विष्णोरीशस्य देवस्य शुद्धस्य परमात्मनः
rudra uvāca
punardhyānaṃ samācakṣva śaṅkhacakragadādhara
viṣṇorīśasya devasya śuddhasya paramātmanaḥ
- 2
हरिरुवाच
शृणु रुद्र हरेर्ध्यानं संसारतरुनाशनम्
दृशिरूपमनन्तं च सर्वव्याप्य् अजम् अव्ययम्
hariruvāca
śṛṇu rudra harerdhyānaṃ saṃsāratarunāśanam
dṛśirūpamanantaṃ ca sarvavyāpy ajam avyayam
- 3
अक्षरं सर्वगं नित्यं महद्ब्रह्मास्ति केवलम्
सर्वस्य जगतो मूलं सर्वगं परमेश्वरम्
akṣaraṃ sarvagaṃ nityaṃ mahadbrahmāsti kevalam
sarvasya jagato mūlaṃ sarvagaṃ parameśvaram
- 4
सर्वभूतहृदिस्थं वै सर्वभूतमहेश्वरम्
सर्वाधारं निराधारं सर्वकारणकारणम्
sarvabhūtahṛdisthaṃ vai sarvabhūtamaheśvaram
sarvādhāraṃ nirādhāraṃ sarvakāraṇakāraṇam
- 5
अलेपकं तथा मुक्तं मुक्तयोगिविचिन्तितम्
स्थूलदेहविहीनं च चक्षुषा परिवर्जितम्
alepakaṃ tathā muktaṃ muktayogivicintitam
sthūladehavihīnaṃ ca cakṣuṣā parivarjitam
- 6
वागिन्द्रियविहीनं च प्राणिधर्मविवर्जितम्
पादेन्द्रियविहीनं च वाग्धर्मपरिवर्जितम्
पायूपस्थविहीनं च सर्वैन्द्रियविवर्जितम्
vāgindriyavihīnaṃ ca prāṇidharmavivarjitam
pādendriyavihīnaṃ ca vāgdharmaparivarjitam
pāyūpasthavihīnaṃ ca sarvaindriyavivarjitam
- 7
मनोविरहितं तद्वन्मनोधर्मविवर्जितम्
बुद्ध्या विहीनं देवेशं चेतसा परिवर्जितम्
manovirahitaṃ tadvanmanodharmavivarjitam
buddhyā vihīnaṃ deveśaṃ cetasā parivarjitam
- 8
अहङ्कारविहीनं वै बुद्धिधर्मविवर्जितम्
प्राणेन रहितं चैव ह्यपानेन विवर्जितम्
ahaṅkāravihīnaṃ vai buddhidharmavivarjitam
prāṇena rahitaṃ caiva hyapānena vivarjitam
- 9
व्यानाख्यवायुहीनं वै प्राणधर्मविवर्जितम्
हरिरुवाच
पुनः सूर्यर्चनं वक्ष्ये यदुक्तं भृगवे पुरा
vyānākhyavāyuhīnaṃ vai prāṇadharmavivarjitam
hariruvāca
punaḥ sūryarcanaṃ vakṣye yaduktaṃ bhṛgave purā
- 10
ॐ खखोल्काय नमः
सूर्यस्य मूलमन्त्रो ऽयं भुक्तिमुक्तिप्रदायकः
oṃ khakholkāya namaḥ
sūryasya mūlamantro 'yaṃ bhuktimuktipradāyakaḥ
- 11
ॐ खखोल्काय त्रिदशाय नमः
ॐ विचि ठठ शिरसे नमः
ॐ ज्ञानिने ठठ शिखायै नमः
ॐ सहस्ररश्मये ठठ कवचाय नमः
oṃ khakholkāya tridaśāya namaḥ
oṃ vici ṭhaṭha śirase namaḥ
oṃ jñānine ṭhaṭha śikhāyai namaḥ
oṃ sahasraraśmaye ṭhaṭha kavacāya namaḥ
- 12
ॐ सर्वतेजोऽधिपतये ठठ अस्त्राय नमः
ॐ ज्वल ज्वल प्रज्वल प्रज्वल ठठ नमः
oṃ sarvatejo'dhipataye ṭhaṭha astrāya namaḥ
oṃ jvala jvala prajvala prajvala ṭhaṭha namaḥ
- 13
अग्निप्राकारमन्त्रो ऽयं सूर्यस्याघविनाशनः
ॐ आदित्याय विद्महे विश्वभावाय धीमहि तन्नः सूर्य प्रचोदयात्
agniprākāramantro 'yaṃ sūryasyāghavināśanaḥ
oṃ ādityāya vidmahe viśvabhāvāya dhīmahi tannaḥ sūrya pracodayāt
- 14
सकलीकरणं कुर्याद्गायत्र्या भास्करस्य च
धर्मात्मने च पूर्वस्मिन्यमायेति च दक्षिणे
sakalīkaraṇaṃ kuryādgāyatryā bhāskarasya ca
dharmātmane ca pūrvasminyamāyeti ca dakṣiṇe
- 15
दण्डनायकाय ततो दैवतायेति चोत्तरे
श्यामपिङ्गलमैशान्यामाग्नेय्यां दीक्षितं यजेत्
daṇḍanāyakāya tato daivatāyeti cottare
śyāmapiṅgalamaiśānyāmāgneyyāṃ dīkṣitaṃ yajet
- 16
वज्रपाणिं च नैरृत्यां भूर्भुवः स्वश्च वायवे
ॐ चन्द्राय नक्षत्राधिपतये नमः
ॐ अङ्गारकाय क्षितिसुताय नमः
ॐ बुधाय सोमसुताय नमः
ॐ वागीश्वराय सर्वविद्याधिपतये नमः
ॐ शुक्राय महर्षये भृगुसुताय नमः
ॐ शनैश्चराय सूर्यात्मजाय नमः
ॐ राहवे नमः
ॐ केतवे नमः
vajrapāṇiṃ ca nairṛtyāṃ bhūrbhuvaḥ svaśca vāyave
oṃ candrāya nakṣatrādhipataye namaḥ
oṃ aṅgārakāya kṣitisutāya namaḥ
oṃ budhāya somasutāya namaḥ
oṃ vāgīśvarāya sarvavidyādhipataye namaḥ
oṃ śukrāya maharṣaye bhṛgusutāya namaḥ
oṃ śanaiścarāya sūryātmajāya namaḥ
oṃ rāhave namaḥ
oṃ ketave namaḥ
- 17
पूर्वादीशानपर्यन्ता एते पूज्या वृषध्वज
ॐ अनूकाय नमः
ॐ प्रथमनाथाय नमः
ॐ बुद्धाय नमः
pūrvādīśānaparyantā ete pūjyā vṛṣadhvaja
oṃ anūkāya namaḥ
oṃ prathamanāthāya namaḥ
oṃ buddhāya namaḥ
- 18
ॐ भगवन्नपरिमितमयूखमालिन्सकलजगत्पते सप्ताश्ववाहन चतुर्भुज परमसिद्धिप्रद विस्फुलिङ्गपिङ्गल तत एह्येहि इदमर्घ्यं मम शिरसि गतं गृह्ण गृह्ण तेजोग्ररूपम् अनग्न ज्वल ज्वल ठठ नमः
oṃ bhagavannaparimitamayūkhamālinsakalajagatpate saptāśvavāhana caturbhuja paramasiddhiprada visphuliṅgapiṅgala tata ehyehi idamarghyaṃ mama śirasi gataṃ gṛhṇa gṛhṇa tejograrūpam anagna jvala jvala ṭhaṭha namaḥ
- 19
अनेनावाह्य मन्त्रेण ततः सूर्यं विसर्जयेत्
ॐ नमो भगवते आदित्याय सहस्रकिरणाय गच्छ सुखं पुनरागमनायेति
anenāvāhya mantreṇa tataḥ sūryaṃ visarjayet
oṃ namo bhagavate ādityāya sahasrakiraṇāya gaccha sukhaṃ punarāgamanāyeti
- 20
इति श्रीगारुडे महापुराणे पूर्वखण्डे प्रथमांशाख्ये आचारकाण्डे हरिध्यानसूर्यार्चनयोर्निरूपणं नाम षोडशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe haridhyānasūryārcanayornirūpaṇaṃ nāma ṣoḍaśo 'dhyāyaḥ

