12 shlokas
- 1
हरिरुवाच
न्यासादिकं प्रवक्ष्यामि गायत्र्याः शृणु शङ्कर
विश्वामित्रर्षिश्चैव सविता चाथ देवता
hariruvāca
nyāsādikaṃ pravakṣyāmi gāyatryāḥ śṛṇu śaṅkara
viśvāmitrarṣiścaiva savitā cātha devatā
- 2
ब्रह्मशीर्षा रुद्रशिखा विष्णोर्हृदयसंश्रिता
विनियोगैकनयना कात्यायनसगोत्रजा
brahmaśīrṣā rudraśikhā viṣṇorhṛdayasaṃśritā
viniyogaikanayanā kātyāyanasagotrajā
- 3
त्रैलोक्यचरणा ज्ञेया पृथिवीकुक्षिसंस्थिता
एवं ज्ञात्वा तु गायत्त्रीं जपेद्द्वादशलक्षकम्
trailokyacaraṇā jñeyā pṛthivīkukṣisaṃsthitā
evaṃ jñātvā tu gāyattrīṃ japeddvādaśalakṣakam
- 4
त्रिपदाष्टाक्षरा ज्ञेया चतुष्पादा षडक्षरा
जपे च त्रिपदा प्रोक्ता अर्चने च चतुष्पदा
tripadāṣṭākṣarā jñeyā catuṣpādā ṣaḍakṣarā
jape ca tripadā proktā arcane ca catuṣpadā
- 5
न्यासे जपे तथा ध्याने अग्निकार्ये तथार्चने
गायत्त्रीं विन्यसेन्नित्यं सर्वपापप्रणाशिनीम्
nyāse jape tathā dhyāne agnikārye tathārcane
gāyattrīṃ vinyasennityaṃ sarvapāpapraṇāśinīm
- 6
पादांगुष्ठे गुल्फमध्ये जङ्घयोर्विद्धि जानुनोः
ऊर्वोर्गुह्ये च वृषणे नाड्यां नाभौ तनूदरे
pādāṃguṣṭhe gulphamadhye jaṅghayorviddhi jānunoḥ
ūrvorguhye ca vṛṣaṇe nāḍyāṃ nābhau tanūdare
- 7
स्तनयोर्हृदि कण्ठौष्ठमुखे तालुनि चांसयोः
नेत्रे भुवार्ललाटे च पूर्वस्यां दक्षिणोत्तरे
stanayorhṛdi kaṇṭhauṣṭhamukhe tāluni cāṃsayoḥ
netre bhuvārlalāṭe ca pūrvasyāṃ dakṣiṇottare
- 8
पश्चिमे मूर्ध्नि चाकारं न्यसेद्वर्णान्वदाम्यहम्
इन्द्रनीलं च वह्निं च पीतं श्यामं च कापिलम्
paścime mūrdhni cākāraṃ nyasedvarṇānvadāmyaham
indranīlaṃ ca vahniṃ ca pītaṃ śyāmaṃ ca kāpilam
- 9
श्वेतं विद्युत्प्रभं तारं कृष्णं रक्तं क्रमेण तत्
श्यामं शुक्लं तथा पीतं श्वेतं वै पद्मरागवत्
śvetaṃ vidyutprabhaṃ tāraṃ kṛṣṇaṃ raktaṃ krameṇa tat
śyāmaṃ śuklaṃ tathā pītaṃ śvetaṃ vai padmarāgavat
- 10
शङ्खवर्णं पाण्डुरं च रक्तं चासवसन्निभम्
अर्कवर्णसमं सौम्यं शङ्खाभं श्वेतमेव च
śaṅkhavarṇaṃ pāṇḍuraṃ ca raktaṃ cāsavasannibham
arkavarṇasamaṃ saumyaṃ śaṅkhābhaṃ śvetameva ca
- 11
यद्यत्स्पृशति हस्तेन यच्च पश्यति चक्षुषा
पूतं भवति तत्सर्वं गायत्त्र्या न परं विदुः
yadyatspṛśati hastena yacca paśyati cakṣuṣā
pūtaṃ bhavati tatsarvaṃ gāyattryā na paraṃ viduḥ
- 12
इति श्रीगारुडे महापुराणे पूर्वखण्डे प्रथमांशाख्ये आचारकाण्डे गायत्रीन्यासनिरूपणं नाम पञ्चत्रिंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe gāyatrīnyāsanirūpaṇaṃ nāma pañcatriṃśo 'dhyāyaḥ

