16 shlokas
- 1
हरिरुवाच
पूजयित्वा पवित्राद्यैर्ब्रह्म ध्यात्वा हरिर्भवेत्
ब्रह्मध्यानं प्रवक्ष्यामि मायायन्त्रप्रमर्दकम्
hariruvāca
pūjayitvā pavitrādyairbrahma dhyātvā harirbhavet
brahmadhyānaṃ pravakṣyāmi māyāyantrapramardakam
- 2
यच्छेद्वाङ्मनसं प्राज्ञस्तं यजेज्ज्ञानमात्मनि
ज्ञानं महति संयच्छेद्य इच्छेज्ज्ञानम् आत्मनि
yacchedvāṅmanasaṃ prājñastaṃ yajejjñānamātmani
jñānaṃ mahati saṃyacchedya icchejjñānam ātmani
- 3
देहेन्द्रियमनोबुद्धिप्राणाहङ्कारवर्जितम्
वर्जितं भूततन्मात्रैर्गुणजन्माशनादिभिः
dehendriyamanobuddhiprāṇāhaṅkāravarjitam
varjitaṃ bhūtatanmātrairguṇajanmāśanādibhiḥ
- 4
स्वप्रकाशं निराकारं सदानं दमनादि यत्
नित्यं शुद्धं बुद्धमृद्धं सत्यमानन्दमद्वयम्
svaprakāśaṃ nirākāraṃ sadānaṃ damanādi yat
nityaṃ śuddhaṃ buddhamṛddhaṃ satyamānandamadvayam
- 5
तुरीयमक्षरं ब्रह्म अहमस्मि परं पदम्
अहं ब्रह्मेत्यवस्थानं समाधिरपि गीयते
turīyamakṣaraṃ brahma ahamasmi paraṃ padam
ahaṃ brahmetyavasthānaṃ samādhirapi gīyate
- 6
आत्मानं रथिनं विद्धि शरीरं रथमेव तु
बुद्धिं च सारथिं विद्धि मनः प्रग्रहमेव च
इन्द्रियाणि हयानाहुर्विषयास्तेषु गोचराः
ātmānaṃ rathinaṃ viddhi śarīraṃ rathameva tu
buddhiṃ ca sārathiṃ viddhi manaḥ pragrahameva ca
indriyāṇi hayānāhurviṣayāsteṣu gocarāḥ
- 7
आत्मेन्द्रियमनोयुक्तो भोक्तेत्यार्मनीषिणः
यस्तु विज्ञानबाह्मेन युक्तेन मनसा सदा
ātmendriyamanoyukto bhoktetyārmanīṣiṇaḥ
yastu vijñānabāhmena yuktena manasā sadā
- 8
स तु तत्पदमाप्नोति स हि भूयो न जायते
विज्ञानसारथिर्यस्तु मनःप्रग्रहवान्नरः
sa tu tatpadamāpnoti sa hi bhūyo na jāyate
vijñānasārathiryastu manaḥpragrahavānnaraḥ
- 9
स्वर्धुन्याः पारमाप्नोति तद्विष्णोः परमं पदम्
अहिंसादिर्यमः प्रोक्तः शौचादिर्नियमः स्मृतः
svardhunyāḥ pāramāpnoti tadviṣṇoḥ paramaṃ padam
ahiṃsādiryamaḥ proktaḥ śaucādirniyamaḥ smṛtaḥ
- 10
आसनं पद्मकाद्युक्तं प्राणायामो मरुज्जयः
प्रत्याहारो जयः प्रोक्तो ध्यानमीश्वरचिन्तनम्
āsanaṃ padmakādyuktaṃ prāṇāyāmo marujjayaḥ
pratyāhāro jayaḥ prokto dhyānamīśvaracintanam
- 11
मनोधृतिर्धारणा स्यात्समाधिर्ब्रह्मणि स्थितिः
पूर्वं चेतः स्थिरं न स्यात्ततोमूर्तिं विचिन्तयेत्
manodhṛtirdhāraṇā syātsamādhirbrahmaṇi sthitiḥ
pūrvaṃ cetaḥ sthiraṃ na syāttatomūrtiṃ vicintayet
- 12
हृत्पद्मकर्णिकामध्ये शङ्खचक्रगदाब्जवान्
श्रीवत्सकौस्तुभयुतो वनमालाश्रिया युतः
hṛtpadmakarṇikāmadhye śaṅkhacakragadābjavān
śrīvatsakaustubhayuto vanamālāśriyā yutaḥ
- 13
नित्यः शुद्धो भूतियुक्तः सत्यानन्दाह्वयः परः
आत्माहं परमं ब्रह्म परमं ज्योतिरेव तु
nityaḥ śuddho bhūtiyuktaḥ satyānandāhvayaḥ paraḥ
ātmāhaṃ paramaṃ brahma paramaṃ jyotireva tu
- 14
चतुर्विंशतिमूर्तिः स शालग्रामशिलास्थितः
द्वारकादिशिलासंस्थो ध्येयः पूज्यो ऽप्यहं च सः
caturviṃśatimūrtiḥ sa śālagrāmaśilāsthitaḥ
dvārakādiśilāsaṃstho dhyeyaḥ pūjyo 'pyahaṃ ca saḥ
- 15
मनसो ऽभीप्सितं प्राप्य देवो वैमानिको भवेत्
निष्कामो मुक्तिमाप्नोति मूर्तिं ध्यायंस्तुवञ्जपन्
manaso 'bhīpsitaṃ prāpya devo vaimāniko bhavet
niṣkāmo muktimāpnoti mūrtiṃ dhyāyaṃstuvañjapan
- 16
इति श्रीगारुडे महापुराणे पूर्वखण्डे प्रथमांशाख्ये आचारकाण्डे ब्रह्ममूर्तिध्याननिरूपणं नाम चतुश्चत्वारिंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe brahmamūrtidhyānanirūpaṇaṃ nāma catuścatvāriṃśo 'dhyāyaḥ

