24 shlokas
- 1
हरिरुवाच
षडादित्ये दशा ज्ञेया सोमे पञ्चदश स्मृताः
अष्टावङ्गारके चैव बुधैस्पतदश स्मृताः
hariruvāca
ṣaḍāditye daśā jñeyā some pañcadaśa smṛtāḥ
aṣṭāvaṅgārake caiva budhaispatadaśa smṛtāḥ
- 2
शनैश्चरे दश ज्ञेया गुरोरेकोनविंशतिः
राहोर्द्वादशवर्षाणि एकविंशतिर्भार्गवे
śanaiścare daśa jñeyā gurorekonaviṃśatiḥ
rāhordvādaśavarṣāṇi ekaviṃśatirbhārgave
- 3
रवेर्दशा दुःखदा स्यादुद्वेगनृपनाशकृत्
विभूतिदा सोमदशा सुखमिष्टान्नदा तथा
raverdaśā duḥkhadā syādudveganṛpanāśakṛt
vibhūtidā somadaśā sukhamiṣṭānnadā tathā
- 4
दुःखप्रदा कुजदशा राज्यादेः स्याद्विनाशिनी
दिव्यस्त्रीदा बुधदशा राज्यदा कोशवृद्धिदा
duḥkhapradā kujadaśā rājyādeḥ syādvināśinī
divyastrīdā budhadaśā rājyadā kośavṛddhidā
- 5
शनेर्दशा राज्यनाशबन्धुदुःखकरी भवेत्
गुरोर्दशा राज्यदा स्यात्सुखधर्मादिदायिनी
śanerdaśā rājyanāśabandhuduḥkhakarī bhavet
gurordaśā rājyadā syātsukhadharmādidāyinī
- 6
राहोर्दशा राज्यनाशव्याधिदा दुःखदा भवेत्
हस्त्यश्वदा शुक्रदशा राज्यस्त्रीलाभदा भवेत्
rāhordaśā rājyanāśavyādhidā duḥkhadā bhavet
hastyaśvadā śukradaśā rājyastrīlābhadā bhavet
- 7
मेष अङ्गारकक्षेत्रं वृषः शुक्रस्य कीर्तितः
मिथुनस्य बुधो ज्ञेयः सोमः कर्कटकस्य च
meṣa aṅgārakakṣetraṃ vṛṣaḥ śukrasya kīrtitaḥ
mithunasya budho jñeyaḥ somaḥ karkaṭakasya ca
- 8
सूर्यक्षेत्रं भवेत्सिंहः कन्या क्षेत्रं बुधस्य च
भार्गवस्य तुला क्षेत्रं वृश्चिको ऽङ्गारकस्य च
sūryakṣetraṃ bhavetsiṃhaḥ kanyā kṣetraṃ budhasya ca
bhārgavasya tulā kṣetraṃ vṛściko 'ṅgārakasya ca
- 9
धनुः सुरगुरोश्चैव शनेर्मकरकुम्भकौ
मीनः सुरगुरोश्चैव ग्रहक्षेत्रं प्रकीर्तितम्
dhanuḥ suraguroścaiva śanermakarakumbhakau
mīnaḥ suraguroścaiva grahakṣetraṃ prakīrtitam
- 10
पौर्णमास्याद्वयं तत्र पूर्वाषाढाद्वयं भवेत्
द्विराषाढः स विज्ञेयो विष्णुः स्वपिति कर्कटे
paurṇamāsyādvayaṃ tatra pūrvāṣāḍhādvayaṃ bhavet
dvirāṣāḍhaḥ sa vijñeyo viṣṇuḥ svapiti karkaṭe
- 11
अश्विनी रेवती चित्रा धनिष्ठा स्यादलङ्कृतौ
मृगाहिकपिमार्जारश्वानः सूकरपक्षिणः
aśvinī revatī citrā dhaniṣṭhā syādalaṅkṛtau
mṛgāhikapimārjāraśvānaḥ sūkarapakṣiṇaḥ
- 12
नकुलो मूषकश्चैव यात्रायां दक्षिणे शुभः
विप्रकन्या शिवा एषां शङ्खभेरीवसुन्धराः
nakulo mūṣakaścaiva yātrāyāṃ dakṣiṇe śubhaḥ
viprakanyā śivā eṣāṃ śaṅkhabherīvasundharāḥ
- 13
वेणुस्त्रीपूर्णकुम्भाश्च यात्रायां दर्शनं शुभम्
जम्बूकोष्ट्रखराद्याश्च यात्रायां वामके शुभाः
veṇustrīpūrṇakumbhāśca yātrāyāṃ darśanaṃ śubham
jambūkoṣṭrakharādyāśca yātrāyāṃ vāmake śubhāḥ
- 14
कार्पासौषधितैलं च पक्वाङ्गारभुजङ्गमाः
मुक्तकेशी रक्तमाल्यनग्नाद्यशुभम् ईक्षितम्
kārpāsauṣadhitailaṃ ca pakvāṅgārabhujaṅgamāḥ
muktakeśī raktamālyanagnādyaśubham īkṣitam
- 15
हक्राय लक्षणं वक्ष्ये लभत्पूर्वे महाफलम्
आग्नेये शोकसन्तापौ दक्षिणे हानिमाप्नुयात्
hakrāya lakṣaṇaṃ vakṣye labhatpūrve mahāphalam
āgneye śokasantāpau dakṣiṇe hānimāpnuyāt
- 16
नैरृत्ये शोकसन्तापौ मिष्टान्नं चैव पश्चिमे
अर्थं प्राप्नोति वायव्ये उत्तरे कलहोभवेत्
nairṛtye śokasantāpau miṣṭānnaṃ caiva paścime
arthaṃ prāpnoti vāyavye uttare kalahobhavet
- 17
ईशाने मरणं प्रोक्तं हिक्कायाश्च फलाफलम्
विलिख्य रविचक्रं तु भास्करो नरसन्निभः
īśāne maraṇaṃ proktaṃ hikkāyāśca phalāphalam
vilikhya ravicakraṃ tu bhāskaro narasannibhaḥ
- 18
यस्मिनृक्षे वसद्भानुस्तदान्दि त्रीणि मस्तके
त्रयं वक्रे प्रदातव्यमेकैकं स्कन्धयोर्न्यसेत्
yasminṛkṣe vasadbhānustadāndi trīṇi mastake
trayaṃ vakre pradātavyamekaikaṃ skandhayornyaset
- 19
एकैकं बाहुयुग्मे तु एकैकं हस्तयोर्द्वयोः
हृदये पञ्च ऋक्षाणि एकं नाभौ प्रदापयेत्
ekaikaṃ bāhuyugme tu ekaikaṃ hastayordvayoḥ
hṛdaye pañca ṛkṣāṇi ekaṃ nābhau pradāpayet
- 20
ऋक्षमेकं न्यसेद्गुह्ये एकैकं जानुके न्यसेत्
नक्षत्राणि च शेषाणि रविपादे नियोजयेत्
ṛkṣamekaṃ nyasedguhye ekaikaṃ jānuke nyaset
nakṣatrāṇi ca śeṣāṇi ravipāde niyojayet
- 21
चरणस्येन ऋक्षेण अल्पायुर्जायते नरः
विदशगमनं जानौ गुह्यस्थे परदारवान्
caraṇasyena ṛkṣeṇa alpāyurjāyate naraḥ
vidaśagamanaṃ jānau guhyasthe paradāravān
- 22
नाभिस्थेनाल्पसंतुष्टो हृत्स्थेन स्यान्महेश्वरः
पाणिस्थेन भवेच्चौरः स्थानभ्रष्टो भवेद्धज
nābhisthenālpasaṃtuṣṭo hṛtsthena syānmaheśvaraḥ
pāṇisthena bhaveccauraḥ sthānabhraṣṭo bhaveddhaja
- 23
स्कन्धस्थिते धनपतिर्मुखे मिष्टान्नमाप्नुयात्
मस्तके पदृवस्त्रं स्यान्नक्षत्रं यदि स्थितम्
skandhasthite dhanapatirmukhe miṣṭānnamāpnuyāt
mastake padṛvastraṃ syānnakṣatraṃ yadi sthitam
- 24
इति श्रीगारुडे महापुराणे पूर्वखण्डं प्रथमांशाख्ये आचारकाण्डे ज्योतिःशास्त्रे ग्रहदशादिनिरूपणं नाम षष्टितमो ऽध्यायः
iti śrīgāruḍe mahāpurāṇe pūrvakhaṇḍaṃ prathamāṃśākhye ācārakāṇḍe jyotiḥśāstre grahadaśādinirūpaṇaṃ nāma ṣaṣṭitamo 'dhyāyaḥ

