27 shlokas
- 1
जनमेजय उवाच
बहूनां स्त्रीसहस्राणाम् अष्टौ भार्याः प्रकीर्तिताः
तासाम् अपत्यान्य् अष्टानां भगवान्प्रब्रवीतु मे
janamejaya uvāca
bahūnāṃ strīsahasrāṇām aṣṭau bhāryāḥ prakīrtitāḥ
tāsām apatyāny aṣṭānāṃ bhagavānprabravītu me
- 2
वैशंपायन उवाच
अष्टौ महिष्यः पुत्रिण्य इति प्राधान्यतः स्मृताः
सर्वा वीरप्रजायिन्यस्तास्व् अपत्यानि मे शृणु
vaiśaṃpāyana uvāca
aṣṭau mahiṣyaḥ putriṇya iti prādhānyataḥ smṛtāḥ
sarvā vīraprajāyinyastāsv apatyāni me śṛṇu
- 3
रुक्मिणी सत्यभामा च देवी नग्नजिती तथा
सुदत्ता च तथा शैब्या लक्ष्मणा चारुहासिनी
rukmiṇī satyabhāmā ca devī nagnajitī tathā
sudattā ca tathā śaibyā lakṣmaṇā cāruhāsinī
- 4
मित्रविन्दा च कालिन्दी जाम्बवत्य् अथ पौरवी
सुभीमा च तथा माद्री रौक्मिणेयान् इमाञ्शृणु
mitravindā ca kālindī jāmbavaty atha pauravī
subhīmā ca tathā mādrī raukmiṇeyān imāñśṛṇu
- 5
प्रद्युम्नः प्रथमो जज्ञे शम्बरान्तकरः सुतः
द्वितीयश्चारुदेष्णश्च वृष्णिसिंहो महारथः
pradyumnaḥ prathamo jajñe śambarāntakaraḥ sutaḥ
dvitīyaścārudeṣṇaśca vṛṣṇisiṃho mahārathaḥ
- 6
चारुभद्रो भद्रचारुः सुदंष्ट्रो द्रुम एव च
सुषेणश्चारुगुप्तश्च चारुविन्दश्च चारुमान्
चारुबाहुः कनिष्ठश्च कन्या चारुमती तथा
cārubhadro bhadracāruḥ sudaṃṣṭro druma eva ca
suṣeṇaścāruguptaśca cāruvindaśca cārumān
cārubāhuḥ kaniṣṭhaśca kanyā cārumatī tathā
- 7
जज्ञिरे सत्यभामायां भानुर्भीमरथः क्षुपः
रोहितो दीप्तिमांश्चैव ताम्रजाक्षो जलान्तकः
चतस्रो जज्ञिरे तेषां स्वसारो गरुडध्वजात्
jajñire satyabhāmāyāṃ bhānurbhīmarathaḥ kṣupaḥ
rohito dīptimāṃścaiva tāmrajākṣo jalāntakaḥ
catasro jajñire teṣāṃ svasāro garuḍadhvajāt
- 8
जाम्बवत्याः सुतो जज्ञे साम्बः समितिशोभनः
मित्रवान्मित्रविन्दश्च मित्रवत्य् अपि चाङ्गना
jāmbavatyāḥ suto jajñe sāmbaḥ samitiśobhanaḥ
mitravānmitravindaśca mitravaty api cāṅganā
- 9
मित्रवाहः सुनीथश्च नग्नजित्याः प्रजाः शृणु
भद्रकारो भद्रविन्दः कन्या भद्रवती तथा
mitravāhaḥ sunīthaśca nagnajityāḥ prajāḥ śṛṇu
bhadrakāro bhadravindaḥ kanyā bhadravatī tathā
- 10
सुदत्तायास्तु शैब्यायाः संग्रामजिद् अजायत
सत्यजित्सेनजिच्चैव तथा शूरः सपत्नजित्
sudattāyāstu śaibyāyāḥ saṃgrāmajid ajāyata
satyajitsenajiccaiva tathā śūraḥ sapatnajit
- 11
सुभीमायाः सुतो माद्र्या वृकाश्वो वृकनिर्वृतिः
कुमारो वृकदीप्तिश्च लक्ष्मणायाः प्रजाः शृणु
subhīmāyāḥ suto mādryā vṛkāśvo vṛkanirvṛtiḥ
kumāro vṛkadīptiśca lakṣmaṇāyāḥ prajāḥ śṛṇu
- 12
गात्रवान्गात्रगुप्तश्च गात्रविन्दश्च वीर्यवान्
जज्ञिरे गात्रवन्त्य् एते भगिन्यानुजया सह
gātravāngātraguptaśca gātravindaśca vīryavān
jajñire gātravanty ete bhaginyānujayā saha
- 13
अश्रुतश्च सुतो जज्ञे कालिन्द्याः श्रुतसत्तमः
अश्रुतं श्रुतसेनायै प्रददौ मधुसूदनः
aśrutaśca suto jajñe kālindyāḥ śrutasattamaḥ
aśrutaṃ śrutasenāyai pradadau madhusūdanaḥ
- 14
तं प्रदाय हृषीकेशस्तां भार्यां मुदितो ऽब्रवीत्
एष वाम् उभयोर् अस्तु दायादः शाश्वतीः समाः
taṃ pradāya hṛṣīkeśastāṃ bhāryāṃ mudito 'bravīt
eṣa vām ubhayor astu dāyādaḥ śāśvatīḥ samāḥ
- 15
बृहत्यां तु गदस्याहुः शैब्यायाम् अङ्गदं सुतम्
उत्पन्नं कुमुदं चैव श्वेतं श्वेतां तथाङ्गनाम्
bṛhatyāṃ tu gadasyāhuḥ śaibyāyām aṅgadaṃ sutam
utpannaṃ kumudaṃ caiva śvetaṃ śvetāṃ tathāṅganām
- 16
अगावहः सुमित्रश्च शुचिश्चित्ररथस्तथा
चित्रसेनः सुते चास्य चित्रा चित्रवती तथा
agāvahaḥ sumitraśca śuciścitrarathastathā
citrasenaḥ sute cāsya citrā citravatī tathā
- 17
वनस्तम्बस्य जज्ञाते स्तम्बः स्तम्बवनश्च ह
उपासङ्गस्य तु सुतौ वज्रः सुक्षिप्र एव च
vanastambasya jajñāte stambaḥ stambavanaśca ha
upāsaṅgasya tu sutau vajraḥ sukṣipra eva ca
- 18
कौशिक्यां सुतसोमायां यौधिष्ठिर्यां युधिष्ठिरौ
कापाली गरुडश्चैव जज्ञाते चित्रयोधिनौ
kauśikyāṃ sutasomāyāṃ yaudhiṣṭhiryāṃ yudhiṣṭhirau
kāpālī garuḍaścaiva jajñāte citrayodhinau
- 19
प्रद्युम्नस्य सुतो यस्तु वैदर्भ्यां राजसत्तमः
अनिरुद्धो रणे योद्धा जज्ञे स मृगकेतनः
pradyumnasya suto yastu vaidarbhyāṃ rājasattamaḥ
aniruddho raṇe yoddhā jajñe sa mṛgaketanaḥ
- 20
रेवत्यां बलदेवस्य जज्ञाते निशठोल्मुकौ
भ्रातरौ देवसंकाशाव् उभौ पुरुषसत्तमौ
revatyāṃ baladevasya jajñāte niśaṭholmukau
bhrātarau devasaṃkāśāv ubhau puruṣasattamau
- 21
सुतनुश्च नराची च शौरेर् आस्तां परिग्रहः
पौण्ड्रश्च कपिलश्चैव वासुदेवस्य तौ सुतौ
sutanuśca narācī ca śaurer āstāṃ parigrahaḥ
pauṇḍraśca kapilaścaiva vāsudevasya tau sutau
- 22
नराच्यां कपिलो जज्ञे पौण्ड्रश्च सुतनोः सुतः
तयोर्नृपो ऽभवत्पौण्ड्रः कपिलश्च वनं ययौ
narācyāṃ kapilo jajñe pauṇḍraśca sutanoḥ sutaḥ
tayornṛpo 'bhavatpauṇḍraḥ kapilaśca vanaṃ yayau
- 23
तुर्यां समभवद्वीरो वसुदेवान्महाबलः
जरा नाम निषादानां प्रभुः सर्वधनुष्मताम्
turyāṃ samabhavadvīro vasudevānmahābalaḥ
jarā nāma niṣādānāṃ prabhuḥ sarvadhanuṣmatām
- 24
काश्या सुपार्श्वं तनयं लेभे साम्बात्तरस्विनम्
सानोर्वज्रो ऽनिरुद्धस्य वज्रस्त्व् आदाव् अजायत
kāśyā supārśvaṃ tanayaṃ lebhe sāmbāttarasvinam
sānorvajro 'niruddhasya vajrastv ādāv ajāyata
- 25
वज्राज्जज्ञे प्रतिवहः सुचारुस्तस्य चात्मजः
अनमित्राच्छिनिर्जज्ञे कनिष्ठाद्वृष्णिनन्दनात्
vajrājjajñe prativahaḥ sucārustasya cātmajaḥ
anamitrācchinirjajñe kaniṣṭhādvṛṣṇinandanāt
- 26
शिनेस्तु सत्यवाग्जज्ञे सत्यकश्च महारथः
सत्यकस्यात्मजः शूरो युयुधानस्त्व् अजायत
śinestu satyavāgjajñe satyakaśca mahārathaḥ
satyakasyātmajaḥ śūro yuyudhānastv ajāyata
- 27
असङ्गो युयुधानस्य भूमिस्तस्याभवत्सुतः
भूमेर्युगंधरः पुत्र इति वंशः समाप्यते
asaṅgo yuyudhānasya bhūmistasyābhavatsutaḥ
bhūmeryugaṃdharaḥ putra iti vaṃśaḥ samāpyate

