13 shlokas
- 1
मार्कण्डेय उवाच
आसन्पूर्वयुगे तात भरद्वाजात्मजा द्विजाः
योगधर्मम् अनुप्राप्य भ्रष्टा दुश्चरितेन वै
mārkaṇḍeya uvāca
āsanpūrvayuge tāta bharadvājātmajā dvijāḥ
yogadharmam anuprāpya bhraṣṭā duścaritena vai
- 2
अपभ्रंशम् अनुप्राप्ता योगधर्मापचारिणः
महतस्तमसः पारे मानसस्य विसंज्ञिताः
apabhraṃśam anuprāptā yogadharmāpacāriṇaḥ
mahatastamasaḥ pāre mānasasya visaṃjñitāḥ
- 3
तम् एवार्थम् अनुध्यान्तो नष्टम् अप्स्व् इव मोहिताः
अप्राप्य योगं ते सर्वे संयुक्ताः कालधर्मणा
tam evārtham anudhyānto naṣṭam apsv iva mohitāḥ
aprāpya yogaṃ te sarve saṃyuktāḥ kāladharmaṇā
- 4
ततस्ते योगविभ्रष्टा देवेषु सुचिरोषिताः
जाताः कौशिकदायादाः कुरुक्षेत्रे नरर्षभ
tataste yogavibhraṣṭā deveṣu suciroṣitāḥ
jātāḥ kauśikadāyādāḥ kurukṣetre nararṣabha
- 5
हिंसया विचरिष्यन्तो धर्मं पितृकृतेन वै
ततस्ते पुनर् आजातिं भ्रष्टाः प्राप्स्यन्ति कुत्सितां
hiṃsayā vicariṣyanto dharmaṃ pitṛkṛtena vai
tataste punar ājātiṃ bhraṣṭāḥ prāpsyanti kutsitāṃ
- 6
तेषां पितृप्रसादेन पूर्वजातिकृतेन च
स्मृतिर् उत्पत्स्यते प्राप्य तां तां जातिं जुगुप्सिताम्
teṣāṃ pitṛprasādena pūrvajātikṛtena ca
smṛtir utpatsyate prāpya tāṃ tāṃ jātiṃ jugupsitām
- 7
ते धर्मचारिणो नित्यं भविष्यन्ति समाहिताः
ब्राह्मण्यं प्रतिलप्स्यन्ति ततो भूयः स्वकर्मणा
te dharmacāriṇo nityaṃ bhaviṣyanti samāhitāḥ
brāhmaṇyaṃ pratilapsyanti tato bhūyaḥ svakarmaṇā
- 8
ततश्च योगं प्राप्स्यन्ति पूर्वजातिकृतं पुनः
भूयः सिद्धिम् अनुप्राप्ताः स्थानं प्राप्स्यन्ति शाश्वतम्
tataśca yogaṃ prāpsyanti pūrvajātikṛtaṃ punaḥ
bhūyaḥ siddhim anuprāptāḥ sthānaṃ prāpsyanti śāśvatam
- 9
एवं धर्मे च ते बुद्धिर्भविष्यति पुनः पुनः
योगधर्मे च निरतः प्राप्स्यसे सिद्धिम् उत्तमाम्
evaṃ dharme ca te buddhirbhaviṣyati punaḥ punaḥ
yogadharme ca nirataḥ prāpsyase siddhim uttamām
- 10
योगधर्माद्धि धर्मज्ञ न धर्मो ऽस्ति विशेषवान्
वरिष्ठं सर्वधर्माणां तं समाचर भार्गव
yogadharmāddhi dharmajña na dharmo 'sti viśeṣavān
variṣṭhaṃ sarvadharmāṇāṃ taṃ samācara bhārgava
- 11
कालस्य परिणामेन लघ्वाहारो जितेन्द्रियः
तत्परः प्रयतः श्राद्धी योगधर्मम् अवाप्स्यसि
इत्य् उक्त्वा भगवान्देवस्तत्रैवान्तरधीयत
kālasya pariṇāmena laghvāhāro jitendriyaḥ
tatparaḥ prayataḥ śrāddhī yogadharmam avāpsyasi
ity uktvā bhagavāndevastatraivāntaradhīyata
- 12
अष्टादशानां वर्षाणाम् एकाहम् इति मे मतिः
उपासतश्च देवेशं वर्षाण्य् अष्टादशैव मे
aṣṭādaśānāṃ varṣāṇām ekāham iti me matiḥ
upāsataśca deveśaṃ varṣāṇy aṣṭādaśaiva me
- 13
प्रसादात्तस्य देवस्य न ग्लानिर् अभवत्तदा
न क्षुत्पिपासे कालं वा जानामि स्म तदानघ
पश्चाच्छिष्यसकाशात्तु कालः संविदितो मम
prasādāttasya devasya na glānir abhavattadā
na kṣutpipāse kālaṃ vā jānāmi sma tadānagha
paścācchiṣyasakāśāttu kālaḥ saṃvidito mama

