31 shlokas
- 1
वैशम्पायन उवाच
सत्वतः सत्त्वसम्पन्नान्कौसल्या सुषुवे सुतान्
भजिनं भजमानं च दिव्यं देवावृधं नृपम्
vaiśampāyana uvāca
satvataḥ sattvasampannānkausalyā suṣuve sutān
bhajinaṃ bhajamānaṃ ca divyaṃ devāvṛdhaṃ nṛpam
- 2
अन्धकं च महाबाहुं वृष्णिं च यदुनन्दनम्
तेषां विसर्गाश्चत्वारो विस्तरेणेह ताञ्शृणु
andhakaṃ ca mahābāhuṃ vṛṣṇiṃ ca yadunandanam
teṣāṃ visargāścatvāro vistareṇeha tāñśṛṇu
- 3
भजमानस्य सृञ्जय्यौ बाह्यका चोपबाह्यका
आस्तां भार्ये तयोस्तस्माज्जज्ञिरे बहवः सुताः
bhajamānasya sṛñjayyau bāhyakā copabāhyakā
āstāṃ bhārye tayostasmājjajñire bahavaḥ sutāḥ
- 4
निमिश्च क्रमणश्चैव विष्णुः शूरः पुरंजयः
एते बाह्यकसृञ्जय्यां भजमानाद्विजज्ञिरे
nimiśca kramaṇaścaiva viṣṇuḥ śūraḥ puraṃjayaḥ
ete bāhyakasṛñjayyāṃ bhajamānādvijajñire
- 5
अयुताजित्सहस्राजिच्छताजिच्चाथ दासकः
उपबाह्यकसृञ्जय्यां भजमानाद्विजज्ञिरे
ayutājitsahasrājicchatājiccātha dāsakaḥ
upabāhyakasṛñjayyāṃ bhajamānādvijajñire
- 6
यज्वा देवावृधो राजा चचार विपुलं तपः
पुत्रः सर्वगुणोपेतो मम स्याद् इति निश्चितः
yajvā devāvṛdho rājā cacāra vipulaṃ tapaḥ
putraḥ sarvaguṇopeto mama syād iti niścitaḥ
- 7
संयुज्यात्मानम् एवं स पर्णाशाया जलं स्पृशन्
सदोपस्पृशतस्तस्य चकार प्रियम् आपगा
saṃyujyātmānam evaṃ sa parṇāśāyā jalaṃ spṛśan
sadopaspṛśatastasya cakāra priyam āpagā
- 8
चिन्तयाभिपरीता सा जगामैकविनिश्चयम्
कल्याणत्वान्नरपतेस्तस्य सा निम्नगोत्तमा
cintayābhiparītā sā jagāmaikaviniścayam
kalyāṇatvānnarapatestasya sā nimnagottamā
- 9
नाध्यगच्छत तां नारीं यस्याम् एवंविधः सुतः
जायेत्तस्मात्स्वयं हन्त भवाम्य् अस्य सहव्रता
nādhyagacchata tāṃ nārīṃ yasyām evaṃvidhaḥ sutaḥ
jāyettasmātsvayaṃ hanta bhavāmy asya sahavratā
- 10
अथ भूत्वा कुमारी सा बिभ्रती परमं वपुः
वरयामास नृपतिं ताम् इयेष च स प्रभुः
atha bhūtvā kumārī sā bibhratī paramaṃ vapuḥ
varayāmāsa nṛpatiṃ tām iyeṣa ca sa prabhuḥ
- 11
अथ सा दशमे मासि सुषुवे सरितां वरा
पुत्रं सर्वगुणोपेतं बभ्रुं देवावृधान्नृपात्
atha sā daśame māsi suṣuve saritāṃ varā
putraṃ sarvaguṇopetaṃ babhruṃ devāvṛdhānnṛpāt
- 12
अनुवंशे पुराणज्ञा गायन्तीति परिश्रुतम्
गुणान्देवावृधस्याथ कीर्तयन्तो महात्मनः
anuvaṃśe purāṇajñā gāyantīti pariśrutam
guṇāndevāvṛdhasyātha kīrtayanto mahātmanaḥ
- 13
यथैवाग्रे श्रुतं दूराद् अपश्याम तथान्तिकात्
बभ्रुः श्रेष्ठो मनुष्याणां देवैर्देवावृधः समः
yathaivāgre śrutaṃ dūrād apaśyāma tathāntikāt
babhruḥ śreṣṭho manuṣyāṇāṃ devairdevāvṛdhaḥ samaḥ
- 14
षष्टिश्च षट्च पुरुषाः सहस्राणि च सप्त च
एते ऽमृतत्वं सम्प्राप्ता बभ्रोर्दैवावृधाद् इति
ṣaṣṭiśca ṣaṭca puruṣāḥ sahasrāṇi ca sapta ca
ete 'mṛtatvaṃ samprāptā babhrordaivāvṛdhād iti
- 15
यज्वा दानपतिर्धीमान्ब्रह्मण्यः सुदृढायुधः
तस्यान्ववायः सुमहान्भोजा ये मार्तिकावताः
yajvā dānapatirdhīmānbrahmaṇyaḥ sudṛḍhāyudhaḥ
tasyānvavāyaḥ sumahānbhojā ye mārtikāvatāḥ
- 16
अन्धकात्काश्यदुहिता चतुरो ऽलभतात्मजान्
कुकुरं भजमानं च शमिं कम्बलबर्हिषम्
andhakātkāśyaduhitā caturo 'labhatātmajān
kukuraṃ bhajamānaṃ ca śamiṃ kambalabarhiṣam
- 17
कुकुरस्य सुतो धृष्णुर्धृष्णोस्तु तनयस्तथा
कपोतरोमा तस्याथ तैत्तिरिस्तनयो ऽभवत्
जज्ञे पुनर्वसुस्तस्माद् अभिजित्तु पुनर्वसोः
kukurasya suto dhṛṣṇurdhṛṣṇostu tanayastathā
kapotaromā tasyātha taittiristanayo 'bhavat
jajñe punarvasustasmād abhijittu punarvasoḥ
- 18
तस्य वै पुत्रमिथुनं बभूवाभिजितः किल
आहुकश्चाहुकी चैव ख्यातौ ख्यातिमतां वरौ
tasya vai putramithunaṃ babhūvābhijitaḥ kila
āhukaścāhukī caiva khyātau khyātimatāṃ varau
- 19
इमाश्चोदाहरन्त्य् अत्र गाथाः प्रति तम् आहुकम्
imāścodāharanty atra gāthāḥ prati tam āhukam
- 20
श्वेतेन परिवारेण किशोरप्रतिमो महान्
अशीतिचर्मणा युक्तो नाहुकः प्रथमं व्रजेत्
śvetena parivāreṇa kiśorapratimo mahān
aśīticarmaṇā yukto nāhukaḥ prathamaṃ vrajet
- 21
नापुत्रवान्नाशतदो नासहस्रशतायुधः
नाशुद्धकर्मा नायज्वा यो भोजम् अभितो व्रजेत्
nāputravānnāśatado nāsahasraśatāyudhaḥ
nāśuddhakarmā nāyajvā yo bhojam abhito vrajet
- 22
पूर्वस्यां दिशि नागानां भोजस्येत्य् अनुमोदनम्
रूप्यकाञ्चनकक्ष्याणां सहस्राणि दशापि च
pūrvasyāṃ diśi nāgānāṃ bhojasyety anumodanam
rūpyakāñcanakakṣyāṇāṃ sahasrāṇi daśāpi ca
- 23
तावन्त्य् एव सहस्राणि उत्तरस्यां तथा दिशि
आ भूमिपालान्भोजान्स्वान् अतिष्ठन्किंकिणीकिनः
tāvanty eva sahasrāṇi uttarasyāṃ tathā diśi
ā bhūmipālānbhojānsvān atiṣṭhankiṃkiṇīkinaḥ
- 24
आहुकीं चाप्य् अवन्तिभ्यः स्वसारं ददुर् अन्धकाः
āhukīṃ cāpy avantibhyaḥ svasāraṃ dadur andhakāḥ
- 25
आहुकस्य तु काश्यायां द्वौ पुत्रौ संबभूवतुः
देवकश्चोग्रसेनश्च देवगर्भसमाव् उभौ
āhukasya tu kāśyāyāṃ dvau putrau saṃbabhūvatuḥ
devakaścograsenaśca devagarbhasamāv ubhau
- 26
देवकस्याभवन्पुत्राश्चत्वारस्त्रिदशोपमाः
देववान् उपदेवश्च सुदेवो देवरक्षितः
कुमार्यः सप्त चाप्यासन्वसुदेवाय ता ददौ
devakasyābhavanputrāścatvārastridaśopamāḥ
devavān upadevaśca sudevo devarakṣitaḥ
kumāryaḥ sapta cāpyāsanvasudevāya tā dadau
- 27
देवकी शान्तिदेवा च सुदेवा देवरक्षिता
वृकदेव्य् उपदेवी च सुनाम्नी चैव सप्तमी
devakī śāntidevā ca sudevā devarakṣitā
vṛkadevy upadevī ca sunāmnī caiva saptamī
- 28
नवोग्रसेनस्य सुतास्तेषां कंसस्तु पूर्वजः
न्यग्रोधश्च सुनामा च कङ्कुशङ्कुसुभूमयः
राष्ट्रपालो ऽथ सुतनुर् अनाधृष्टिश्च पुष्टिमान्
navograsenasya sutāsteṣāṃ kaṃsastu pūrvajaḥ
nyagrodhaśca sunāmā ca kaṅkuśaṅkusubhūmayaḥ
rāṣṭrapālo 'tha sutanur anādhṛṣṭiśca puṣṭimān
- 29
एषां स्वसारः पञ्चासन्कंसा कंसवती तथा
सुतनू राष्ट्रपाली च कङ्का चैव वराङ्गना
eṣāṃ svasāraḥ pañcāsankaṃsā kaṃsavatī tathā
sutanū rāṣṭrapālī ca kaṅkā caiva varāṅganā
- 30
उग्रसेनः सहापत्यो व्याख्यातः कुकुरोद्भवः
ugrasenaḥ sahāpatyo vyākhyātaḥ kukurodbhavaḥ

