18 shlokas
- 1
वैशंपायन उवाच
ततः सम्पूज्य गरुडं वासुदेवो ऽनुमान्य च
सखिवच्चोपगृह्यैनम् अनुजज्ञे गृहं प्रति
vaiśaṃpāyana uvāca
tataḥ sampūjya garuḍaṃ vāsudevo 'numānya ca
sakhivaccopagṛhyainam anujajñe gṛhaṃ prati
- 2
सो ऽनुज्ञातो हि सत्कृत्य प्रणम्य च जनार्दनम्
ऊर्ध्वम् आचक्रमे पक्षी यथेष्टं गगनेचरः
so 'nujñāto hi satkṛtya praṇamya ca janārdanam
ūrdhvam ācakrame pakṣī yatheṣṭaṃ gaganecaraḥ
- 3
स पक्षवातसंक्षुब्धं समुद्रं मकरालयम्
कृत्वा वेगेन महता ययौ पूर्वं महोदधिम्
sa pakṣavātasaṃkṣubdhaṃ samudraṃ makarālayam
kṛtvā vegena mahatā yayau pūrvaṃ mahodadhim
- 4
कृत्यकाल उपस्थास्य इत्य् उक्त्वा गरुडे गते
कृष्णो ददर्श पितरं वृद्धम् आनकदुन्दुभिम्
kṛtyakāla upasthāsya ity uktvā garuḍe gate
kṛṣṇo dadarśa pitaraṃ vṛddham ānakadundubhim
- 5
उग्रसेनं च राजानं बलदेवं च माधवः
काश्यं सांदीपनिं चैव ब्रह्मगार्ग्यं तथैव च
ugrasenaṃ ca rājānaṃ baladevaṃ ca mādhavaḥ
kāśyaṃ sāṃdīpaniṃ caiva brahmagārgyaṃ tathaiva ca
- 6
अन्यांश्च वृद्धान्वृष्णीनां तांश्च भोजान्धकांस्तथा
रत्नप्रवेकैर्दाशार्हो वीर्यलब्धैस्तदार्चयत्
anyāṃśca vṛddhānvṛṣṇīnāṃ tāṃśca bhojāndhakāṃstathā
ratnapravekairdāśārho vīryalabdhaistadārcayat
- 7
हता ब्रह्मद्विषः सर्वे यजन्त्य् अन्धकवृष्णयः
रणात्प्रतिनिवृत्तो ऽयम् अक्षतो मधुसूदनः
hatā brahmadviṣaḥ sarve yajanty andhakavṛṣṇayaḥ
raṇātpratinivṛtto 'yam akṣato madhusūdanaḥ
- 8
इति चत्वररथ्यासु द्वारवत्यां सुपूजितः
चाक्रिको घोषयामास पुरुषो मृष्टकुण्डलः
iti catvararathyāsu dvāravatyāṃ supūjitaḥ
cākriko ghoṣayāmāsa puruṣo mṛṣṭakuṇḍalaḥ
- 9
ततः सांदीपनिं पूर्वम् उपगम्य जनार्दनः
ववन्दे वृष्णिनृपतिम् आहुकं विनयान्वितः
tataḥ sāṃdīpaniṃ pūrvam upagamya janārdanaḥ
vavande vṛṣṇinṛpatim āhukaṃ vinayānvitaḥ
- 10
अथाश्रुपरिपूर्णाक्षम् आनन्दगतचेतसम्
ववन्दे सह रामेण पितरं वासवानुजः
athāśruparipūrṇākṣam ānandagatacetasam
vavande saha rāmeṇa pitaraṃ vāsavānujaḥ
- 11
ततः शेषान् अभिक्रम्य सत्कृत्य च यथार्हतः
सर्वेषां नाम जग्राह दाशार्हाणाम् अधोक्षजः
tataḥ śeṣān abhikramya satkṛtya ca yathārhataḥ
sarveṣāṃ nāma jagrāha dāśārhāṇām adhokṣajaḥ
- 12
ततः सर्वाणि दिव्यानि सर्वरत्नमयानि च
आसनाग्र्याणि विविशुर् उपेन्द्रप्रमुखास्तदा
tataḥ sarvāṇi divyāni sarvaratnamayāni ca
āsanāgryāṇi viviśur upendrapramukhāstadā
- 13
ततस्तद्धनम् अक्षय्यं किंकरैर्यत्समाहृतम्
सभां समानयामासुः पुरुषाः कृष्णशासनात्
tatastaddhanam akṣayyaṃ kiṃkarairyatsamāhṛtam
sabhāṃ samānayāmāsuḥ puruṣāḥ kṛṣṇaśāsanāt
- 14
ततः स मानयामास दाशार्हान्यदुसत्तमान्
सर्वान्दुंदुभिशब्देन पूजयिष्यञ्जनार्दनः
tataḥ sa mānayāmāsa dāśārhānyadusattamān
sarvānduṃdubhiśabdena pūjayiṣyañjanārdanaḥ
- 15
ताम् आसनवतीं रम्यां मणिविद्रुमतोरणाम्
सुदाशार्हीं सुदाशार्हा विविशुः कृष्णशासनात्
tām āsanavatīṃ ramyāṃ maṇividrumatoraṇām
sudāśārhīṃ sudāśārhā viviśuḥ kṛṣṇaśāsanāt
- 16
ततः पुरुषसिंहैः सा यदुभिः सर्वतो वृता
शुशुभे ऽभ्यधिकं शुभ्रा सिंहैर्गिरिगुहा यथा
tataḥ puruṣasiṃhaiḥ sā yadubhiḥ sarvato vṛtā
śuśubhe 'bhyadhikaṃ śubhrā siṃhairgiriguhā yathā
- 17
रामेण सह गोविन्दः काञ्चनं महद् आसनम्
उग्रसेनं पुरस्कृत्य भेजे वृष्णिपुरस्कृतः
rāmeṇa saha govindaḥ kāñcanaṃ mahad āsanam
ugrasenaṃ puraskṛtya bheje vṛṣṇipuraskṛtaḥ
- 18
तत्रोपविष्टांस्तान्वीरान्यथाप्रीति यथावयः
समाभाष्य यदुश्रेष्ठान् उवाच मधुसूदनः
tatropaviṣṭāṃstānvīrānyathāprīti yathāvayaḥ
samābhāṣya yaduśreṣṭhān uvāca madhusūdanaḥ

