40 shlokas
- 1
जनमेजय उवाच
आसन्नं विप्रकृष्टं वा यदि कालं न विद्महे
तस्माद्द्वापरविध्वंसाद्युगान्तं स्पृहयाम्य् अहम्
janamejaya uvāca
āsannaṃ viprakṛṣṭaṃ vā yadi kālaṃ na vidmahe
tasmāddvāparavidhvaṃsādyugāntaṃ spṛhayāmy aham
- 2
प्राप्ता वयं हि तं कालम् अनया धर्मतृष्णया
प्राप्ता वयं च धर्मं स्वं सुखम् अल्पेन कर्मणा
prāptā vayaṃ hi taṃ kālam anayā dharmatṛṣṇayā
prāptā vayaṃ ca dharmaṃ svaṃ sukham alpena karmaṇā
- 3
प्रजासमुद्वेगकरं युगान्तं समुपस्थितम्
प्रनष्टधर्मं धर्मज्ञ निमित्तैर्वक्तुम् अर्हसि
prajāsamudvegakaraṃ yugāntaṃ samupasthitam
pranaṣṭadharmaṃ dharmajña nimittairvaktum arhasi
- 4
सूत उवाच
पृष्ट एवं भविष्यस्य गतिं तत्त्वेन चिन्तयन्
युगान्ते पूर्वरूपाणि भगवान् अब्रवीत्तदा
sūta uvāca
pṛṣṭa evaṃ bhaviṣyasya gatiṃ tattvena cintayan
yugānte pūrvarūpāṇi bhagavān abravīttadā
- 5
व्यास उवाच
अरक्षितारो हर्तारो बलिभागस्य पार्थिवाः
युगान्ते प्रभविष्यन्ति स्वरक्षणपरायणाः
vyāsa uvāca
arakṣitāro hartāro balibhāgasya pārthivāḥ
yugānte prabhaviṣyanti svarakṣaṇaparāyaṇāḥ
- 6
अक्षत्रियाश्च राजानो विप्राः शूद्रोपजीविनः
शूद्राश्च ब्राह्मणाचारा भविष्यन्ति युगक्षये
akṣatriyāśca rājāno viprāḥ śūdropajīvinaḥ
śūdrāśca brāhmaṇācārā bhaviṣyanti yugakṣaye
- 7
काण्डपृष्ठाः श्रोत्रियाश्च हवींषि भरतर्षभ
एकपङ्क्त्याम् अशिष्यन्ति युगान्ते जनमेजय
kāṇḍapṛṣṭhāḥ śrotriyāśca havīṃṣi bharatarṣabha
ekapaṅktyām aśiṣyanti yugānte janamejaya
- 8
शिल्पवन्तो ऽनृतपराः नरा मद्यामिषप्रियाः
भार्यामित्रा भविष्यन्ति युगान्ते जनमेजय
śilpavanto 'nṛtaparāḥ narā madyāmiṣapriyāḥ
bhāryāmitrā bhaviṣyanti yugānte janamejaya
- 9
राजवृत्ते स्थिताश्चोरा राजानश्चोरशीलिनः
भृत्या अनिर्विष्टभुजो भविष्यन्ति युगक्षये
rājavṛtte sthitāścorā rājānaścoraśīlinaḥ
bhṛtyā anirviṣṭabhujo bhaviṣyanti yugakṣaye
- 10
धनानि श्लाघनीयानि सतां वृत्तम् अपूजितम्
अकुत्सना च पतिते भविष्यति युगक्षये
dhanāni ślāghanīyāni satāṃ vṛttam apūjitam
akutsanā ca patite bhaviṣyati yugakṣaye
- 11
प्रनष्टचेतना मर्त्या मुक्तकेशा विचूलिनः
ऊनषोडशवर्षाश्च प्रजास्यन्ति नरास्तदा
pranaṣṭacetanā martyā muktakeśā vicūlinaḥ
ūnaṣoḍaśavarṣāśca prajāsyanti narāstadā
- 12
अट्टशूला जनपदाः शिवशूलाश्चतुष्पथाः
प्रमदाः केशशूलाश्च भविष्यन्ति युगक्षये
aṭṭaśūlā janapadāḥ śivaśūlāścatuṣpathāḥ
pramadāḥ keśaśūlāśca bhaviṣyanti yugakṣaye
- 13
सर्वे ब्रह्म वदिष्यन्ति सर्वे वाजसनेयिनः
शूद्रा भोवादिनश्चैव भविष्यन्ति युगक्षये
sarve brahma vadiṣyanti sarve vājasaneyinaḥ
śūdrā bhovādinaścaiva bhaviṣyanti yugakṣaye
- 14
तपोयज्ञार्थवेदानां विक्रेतारो द्विजातयः
ऋतवश्च भविष्यन्ति विपरीता युगक्षये
tapoyajñārthavedānāṃ vikretāro dvijātayaḥ
ṛtavaśca bhaviṣyanti viparītā yugakṣaye
- 15
शुक्लदन्ताजिताक्षाश्च मुण्डाः काषायवाससः
शूद्रा धर्मं चरिष्यन्ति शाक्यबुद्धोपजीविनः
śukladantājitākṣāśca muṇḍāḥ kāṣāyavāsasaḥ
śūdrā dharmaṃ cariṣyanti śākyabuddhopajīvinaḥ
- 16
श्वापदप्रचुरत्वं च गवां चैव परिक्षयः
स्वादूनां विनिवृत्तिश्च विद्याद् अन्तगते युगे
śvāpadapracuratvaṃ ca gavāṃ caiva parikṣayaḥ
svādūnāṃ vinivṛttiśca vidyād antagate yuge
- 17
अन्त्या मध्ये निवत्स्यन्ति मध्याश्चान्तावसायिनः
यथानिम्नं प्रजाः सर्वा गमिष्यन्ति युगक्षये
antyā madhye nivatsyanti madhyāścāntāvasāyinaḥ
yathānimnaṃ prajāḥ sarvā gamiṣyanti yugakṣaye
- 18
तथा द्विहायना दम्यास्तथा पल्वलकर्षकाः
चित्रवर्षी च पर्जन्यो युगे क्षीणे भविष्यति
tathā dvihāyanā damyāstathā palvalakarṣakāḥ
citravarṣī ca parjanyo yuge kṣīṇe bhaviṣyati
- 19
न ते धर्मं चरिष्यन्ति मानवा निर्गते युगे
ऊषराबहुला भूमिः पन्थानो नगरान्तरा
सर्वे वाणिजकाश्चैव भविष्यन्ति कलौ युगे
na te dharmaṃ cariṣyanti mānavā nirgate yuge
ūṣarābahulā bhūmiḥ panthāno nagarāntarā
sarve vāṇijakāścaiva bhaviṣyanti kalau yuge
- 20
पितृकृत्यानि देयानि विधमन्तः सुतास्तदा
हरणाय प्रपत्स्यन्ते लोभानृतविरोधिताः
pitṛkṛtyāni deyāni vidhamantaḥ sutāstadā
haraṇāya prapatsyante lobhānṛtavirodhitāḥ
- 21
सौकुमार्ये तथा रूपे रत्ने चोपक्षयं गते
भविष्यन्ति युगस्यान्ते नार्यः केशैर् अलंकृताः
saukumārye tathā rūpe ratne copakṣayaṃ gate
bhaviṣyanti yugasyānte nāryaḥ keśair alaṃkṛtāḥ
- 22
निर्विहारस्य भीतस्य गृहस्थस्य भविष्यति
युगान्ते समनुप्राप्ते नान्या भार्यासमा रतिः
nirvihārasya bhītasya gṛhasthasya bhaviṣyati
yugānte samanuprāpte nānyā bhāryāsamā ratiḥ
- 23
कुशीलानार्यभूयिष्ठं वृथारूपसमावृतम्
पुरुषाल्पं बहुस्त्रीकं तद्युगान्तस्य लक्षणम्
kuśīlānāryabhūyiṣṭhaṃ vṛthārūpasamāvṛtam
puruṣālpaṃ bahustrīkaṃ tadyugāntasya lakṣaṇam
- 24
बहुयाचनका लोका दास्यन्ते च परस्परम्
राजचोरादिदण्डार्तो जनः क्षयम् उपैष्यति
bahuyācanakā lokā dāsyante ca parasparam
rājacorādidaṇḍārto janaḥ kṣayam upaiṣyati
- 25
सस्यनिष्पत्तिर् अफला तरुणा वृद्धशीलिनः
ईहयासुखिनो लोका भविष्यन्ति गते युगे
sasyaniṣpattir aphalā taruṇā vṛddhaśīlinaḥ
īhayāsukhino lokā bhaviṣyanti gate yuge
- 26
वर्षासु वाताः परुषा नीचाः शर्करवर्षिणः
संदिग्धः परलोकश्च भविष्यति युगक्षये
varṣāsu vātāḥ paruṣā nīcāḥ śarkaravarṣiṇaḥ
saṃdigdhaḥ paralokaśca bhaviṣyati yugakṣaye
- 27
वैश्याचाराश्च राजन्या धनधान्योपजीविनः
युगापक्रमणे पूर्वं भविष्यन्ति द्विजातयः
vaiśyācārāśca rājanyā dhanadhānyopajīvinaḥ
yugāpakramaṇe pūrvaṃ bhaviṣyanti dvijātayaḥ
- 28
अप्रवृत्ताः प्रपत्स्यन्ते समयाः शपथास्तथा
ऋणं च विनयभ्रंशो युगे क्षीणे भविष्यति
apravṛttāḥ prapatsyante samayāḥ śapathāstathā
ṛṇaṃ ca vinayabhraṃśo yuge kṣīṇe bhaviṣyati
- 29
भविष्यत्य् अफलो हर्षः क्रोधश्च सफलो नृणाम्
अजाश्चैवोपयोक्ष्यन्ते पयसो ऽर्थे युगक्षये
bhaviṣyaty aphalo harṣaḥ krodhaśca saphalo nṛṇām
ajāścaivopayokṣyante payaso 'rthe yugakṣaye
- 30
अशास्त्रविहिता प्रज्ञा एवम् एव भविष्यति
शास्त्रोक्तस्याप्रवक्तारो भविष्यन्ति युगक्षये
aśāstravihitā prajñā evam eva bhaviṣyati
śāstroktasyāpravaktāro bhaviṣyanti yugakṣaye

