72 shlokas
- 1
वासुदेव उवाच
भवतां पुण्यकीर्तीनां तपोबलसमाधिभिः
अपध्यानाच्च पापात्मा भौमः स नरको हतः
vāsudeva uvāca
bhavatāṃ puṇyakīrtīnāṃ tapobalasamādhibhiḥ
apadhyānācca pāpātmā bhaumaḥ sa narako hataḥ
- 2
मोक्षितं बन्धनाद्गुप्तं कन्यापुरवरं महत्
मणिपर्वतम् उत्पाट्य शिखरं चैतद् आहृतम्
mokṣitaṃ bandhanādguptaṃ kanyāpuravaraṃ mahat
maṇiparvatam utpāṭya śikharaṃ caitad āhṛtam
- 3
अयं धनौघः सुमहान्किंकरैर् आहृतो मया
ईशा भवन्तस्तस्येति तान् उक्त्वा विरराम ह
ayaṃ dhanaughaḥ sumahānkiṃkarair āhṛto mayā
īśā bhavantastasyeti tān uktvā virarāma ha
- 4
तच्छ्रुत्वा वासुदेवस्य भोजवृष्ण्यन्धका वचः
जहृषुर्हृष्टलोमानः पूजयन्तो जनार्दनम्
tacchrutvā vāsudevasya bhojavṛṣṇyandhakā vacaḥ
jahṛṣurhṛṣṭalomānaḥ pūjayanto janārdanam
- 5
ऊचुश्चैनं नृवीरास्ते कृताञ्जलिपुटास्ततः
नैतच्चित्रं महाबाहो त्वयि देवकिनन्दन
ūcuścainaṃ nṛvīrāste kṛtāñjalipuṭāstataḥ
naitaccitraṃ mahābāho tvayi devakinandana
- 6
यत्कृत्वा दुष्करं कर्म देवैर् अपि सुदुष्करम्
लालयेः स्वजनं भोगै रत्नैश्च स्वयम् अर्जितैः
yatkṛtvā duṣkaraṃ karma devair api suduṣkaram
lālayeḥ svajanaṃ bhogai ratnaiśca svayam arjitaiḥ
- 7
ततः सर्वदशार्हाणाम् आहुकस्य च याः स्त्रियः
प्रीयमाणाः सभां जग्मुर्वासुदेवदिदृक्षया
tataḥ sarvadaśārhāṇām āhukasya ca yāḥ striyaḥ
prīyamāṇāḥ sabhāṃ jagmurvāsudevadidṛkṣayā
- 8
देवकीसप्तमा देव्यो रोहिणी च शुभानना
ददृशुः कृष्णम् आसीनं रामं चैव महाभुजम्
devakīsaptamā devyo rohiṇī ca śubhānanā
dadṛśuḥ kṛṣṇam āsīnaṃ rāmaṃ caiva mahābhujam
- 9
तौ तु पूर्वम् अतिक्रम्य रोहिणीम् अभिवाद्य च
अभ्यवादयतां देवौ देवकीं रामकेशवौ
tau tu pūrvam atikramya rohiṇīm abhivādya ca
abhyavādayatāṃ devau devakīṃ rāmakeśavau
- 10
सा ताभ्याम् ऋषभाक्षाभ्यां पुत्राभ्यां शुशुभे ऽधिकम्
अदितिर्देवमातेव मित्रेण वरुणेन च
sā tābhyām ṛṣabhākṣābhyāṃ putrābhyāṃ śuśubhe 'dhikam
aditirdevamāteva mitreṇa varuṇena ca
- 11
ततः प्राप्तौ नराग्र्यौ तु तस्या दुहितरं तदा
एकानंशेति याम् आहुर्नरा वै कामरूपिणीम्
tataḥ prāptau narāgryau tu tasyā duhitaraṃ tadā
ekānaṃśeti yām āhurnarā vai kāmarūpiṇīm
- 12
तथा क्षणमुहूर्ताभ्यां यया जज्ञे सहेश्वरः
यत्कृते सगणं कंसं जघान पुरुषोत्तमः
tathā kṣaṇamuhūrtābhyāṃ yayā jajñe saheśvaraḥ
yatkṛte sagaṇaṃ kaṃsaṃ jaghāna puruṣottamaḥ
- 13
सा कन्या ववृधे तत्र वृष्णिसद्मनि पूजिता
पुत्रवत्पाल्यमाना वै वासुदेवाज्ञया तदा
sā kanyā vavṛdhe tatra vṛṣṇisadmani pūjitā
putravatpālyamānā vai vāsudevājñayā tadā
- 14
ताम् एकाम् आहुर् उत्पन्नाम् एकानंशेति मानवाः
योगकन्यां दुराधर्षां रक्षार्थं केशवस्य च
tām ekām āhur utpannām ekānaṃśeti mānavāḥ
yogakanyāṃ durādharṣāṃ rakṣārthaṃ keśavasya ca
- 15
तां वै सर्वे सुमनसः पूजयन्ति स्म यादवाः
देववद्दिव्यवपुषा कृष्णः संरक्षितो यया
tāṃ vai sarve sumanasaḥ pūjayanti sma yādavāḥ
devavaddivyavapuṣā kṛṣṇaḥ saṃrakṣito yayā
- 16
तां च तत्रोपसंगम्य प्रियाम् इव सखीं सखा
दक्षिणेन कराग्रेण परिजग्राह माधवः
tāṃ ca tatropasaṃgamya priyām iva sakhīṃ sakhā
dakṣiṇena karāgreṇa parijagrāha mādhavaḥ
- 17
तथैव रामो ऽतिबलस्तां परिष्वज्य भाविनीम्
मूर्ध्न्य् उपाघ्राय सव्येन परिजग्राह पाणिना
tathaiva rāmo 'tibalastāṃ pariṣvajya bhāvinīm
mūrdhny upāghrāya savyena parijagrāha pāṇinā
- 18
ददृशुस्तां प्रियां मध्ये भगिनीं रामकृष्णयोः
रुक्मपद्मकरव्यग्रां श्रियं पद्मालयाम् इव
dadṛśustāṃ priyāṃ madhye bhaginīṃ rāmakṛṣṇayoḥ
rukmapadmakaravyagrāṃ śriyaṃ padmālayām iva
- 19
अथाक्षतमहावृष्ट्या पुष्पैश्च विविधैः शुभैः
अवकीर्य च लाजैस्तां स्त्रियो जग्मुर्यथागतम्
athākṣatamahāvṛṣṭyā puṣpaiśca vividhaiḥ śubhaiḥ
avakīrya ca lājaistāṃ striyo jagmuryathāgatam
- 20
ततस्ते यादवाः सर्वे पूजयन्तो जनार्दनम्
उपोपविविशुः प्रीताः प्रशंसन्तो ऽद्भुतं कृतम्
tataste yādavāḥ sarve pūjayanto janārdanam
upopaviviśuḥ prītāḥ praśaṃsanto 'dbhutaṃ kṛtam
- 21
पूज्यमानो महाबाहुः पौराणां रतिवर्धनः
विजहार महाकीर्तिर्देवैर् इव स तैः सह
pūjyamāno mahābāhuḥ paurāṇāṃ rativardhanaḥ
vijahāra mahākīrtirdevair iva sa taiḥ saha
- 22
समासीनेषु सर्वेषु यादवेषु जनार्दनम्
नियोगात्त्रिदशेन्द्रस्य नारदो ऽभ्यागमत्सभाम्
samāsīneṣu sarveṣu yādaveṣu janārdanam
niyogāttridaśendrasya nārado 'bhyāgamatsabhām
- 23
सो ऽथ सम्पूजितः पूज्यः शूरैस्तैर्यदुपुंगवैः
करे संस्पृश्य गोविन्दं विवेश महद् आसनम्
so 'tha sampūjitaḥ pūjyaḥ śūraistairyadupuṃgavaiḥ
kare saṃspṛśya govindaṃ viveśa mahad āsanam
- 24
सुखोपविष्टस्तान्वृष्णीन् उपविष्टान् उवाच ह
आगतं शक्रवचनाज्जानीध्वं मां नरर्षभाः
sukhopaviṣṭastānvṛṣṇīn upaviṣṭān uvāca ha
āgataṃ śakravacanājjānīdhvaṃ māṃ nararṣabhāḥ
- 25
शृणुध्वं राजशार्दूलाः कृष्णस्यास्य पराक्रमम्
यानि कर्माणि कृतवान्बाल्यात्प्रभृति केशवः
śṛṇudhvaṃ rājaśārdūlāḥ kṛṣṇasyāsya parākramam
yāni karmāṇi kṛtavānbālyātprabhṛti keśavaḥ
- 26
उग्रसेनसुतः कंसः सर्वान्निर्मथ्य बान्धवान्
राज्यं जग्राह दुर्बुद्धिर्बद्ध्वा पितरम् आहुकम्
ugrasenasutaḥ kaṃsaḥ sarvānnirmathya bāndhavān
rājyaṃ jagrāha durbuddhirbaddhvā pitaram āhukam
- 27
समाश्रित्य जरासंधं श्वशुरं कुलपांसनः
भोजवृष्ण्यन्धकान्सर्वान् अवमन्यत दुर्मतिः
samāśritya jarāsaṃdhaṃ śvaśuraṃ kulapāṃsanaḥ
bhojavṛṣṇyandhakānsarvān avamanyata durmatiḥ
- 28
ज्ञातिकार्यं चिकीर्षंस्तु वसुदेवः प्रतापवान्
उग्रसेनस्य रक्षार्थं स्वपुत्रं पर्यरक्षत
jñātikāryaṃ cikīrṣaṃstu vasudevaḥ pratāpavān
ugrasenasya rakṣārthaṃ svaputraṃ paryarakṣata
- 29
स गोपैः सह धर्मात्मा मथुरोपवने वसन्
अत्यद्भुतानि कर्माणि कृतवान्मधुसूदनः
sa gopaiḥ saha dharmātmā mathuropavane vasan
atyadbhutāni karmāṇi kṛtavānmadhusūdanaḥ
- 30
प्रत्यक्षं शूरसेनानां श्रूयते महद् अद्भुतम्
यथानेन शयानेन शकटान्तरचारिणा
pratyakṣaṃ śūrasenānāṃ śrūyate mahad adbhutam
yathānena śayānena śakaṭāntaracāriṇā

