39 shlokas
- 1
विश्वत्वं शृणु मे विष्णोर्हरित्वं च कृते युगे
वैकुण्ठत्वं च देवेषु कृष्णत्वं मानुषेषु च
viśvatvaṃ śṛṇu me viṣṇorharitvaṃ ca kṛte yuge
vaikuṇṭhatvaṃ ca deveṣu kṛṣṇatvaṃ mānuṣeṣu ca
- 2
ईश्वरस्य हि तस्येमां कर्मणां गहनां गतिम्
संप्रत्यतीतां भाव्यां च शृणु राजन्यथातथम्
īśvarasya hi tasyemāṃ karmaṇāṃ gahanāṃ gatim
saṃpratyatītāṃ bhāvyāṃ ca śṛṇu rājanyathātatham
- 3
अव्यक्तो व्यक्तलिङ्गस्थो य एष भगवान्प्रभुः
नारायणो ह्य् अनन्तात्मा प्रभवो ऽव्यय एव च
avyakto vyaktaliṅgastho ya eṣa bhagavānprabhuḥ
nārāyaṇo hy anantātmā prabhavo 'vyaya eva ca
- 4
एष नारायणो भूत्वा हरिर् आसीत्सनातनः
ब्रह्मा शक्रश्च सोमश्च धर्मः शुक्रो बृहस्पतिः
eṣa nārāyaṇo bhūtvā harir āsītsanātanaḥ
brahmā śakraśca somaśca dharmaḥ śukro bṛhaspatiḥ
- 5
अदितेर् अपि पुत्रत्वम् एत्य यादवनन्दनः
एष विष्णुर् इति ख्यात इन्द्राद् अवरजो ऽभवत्
aditer api putratvam etya yādavanandanaḥ
eṣa viṣṇur iti khyāta indrād avarajo 'bhavat
- 6
प्रसादजं ह्य् अस्य विभोर् अदित्यां पुत्रजन्म तत्
वधार्थं सुरशत्रूणां दैत्यदानवरक्षसाम्
prasādajaṃ hy asya vibhor adityāṃ putrajanma tat
vadhārthaṃ suraśatrūṇāṃ daityadānavarakṣasām
- 7
प्रधानात्मा पुरा ह्य् एष ब्रह्माणम् असृजत्प्रभुः
सो ऽसृजत्पूर्वपुरुषः पुराकल्पे प्रजापतीन्
pradhānātmā purā hy eṣa brahmāṇam asṛjatprabhuḥ
so 'sṛjatpūrvapuruṣaḥ purākalpe prajāpatīn
- 8
ते तन्वानास्तनूस्तत्र ब्रह्मवंशान् अनुत्तमान्
तेभ्यो ऽभवन्महात्मभ्यो बहुधा ब्रह्म शाश्वतम्
te tanvānāstanūstatra brahmavaṃśān anuttamān
tebhyo 'bhavanmahātmabhyo bahudhā brahma śāśvatam
- 9
एतद् आश्चर्यभूतस्य विष्णोः कर्मानुकीर्तनम्
कीर्तितं कीर्तनीयस्य कीर्त्यमानं निबोध मे
etad āścaryabhūtasya viṣṇoḥ karmānukīrtanam
kīrtitaṃ kīrtanīyasya kīrtyamānaṃ nibodha me
- 10
वृत्ते वृत्रवधे तात वर्तमाने कृते युगे
आसीत्त्रैलोक्यविख्यातः संग्रामस्तारकामयः
vṛtte vṛtravadhe tāta vartamāne kṛte yuge
āsīttrailokyavikhyātaḥ saṃgrāmastārakāmayaḥ
- 11
तत्र स्म दानवा घोराः सर्वे संग्रामदर्पिताः
घ्नन्ति देवान्सगन्धर्वान्सयक्षोरगचारणान्
tatra sma dānavā ghorāḥ sarve saṃgrāmadarpitāḥ
ghnanti devānsagandharvānsayakṣoragacāraṇān
- 12
ते वध्यमाना विमुखाः क्षीणप्रहरणा रणे
त्रातारं मनसा जग्मुर्देवं नारायणं प्रभुम्
te vadhyamānā vimukhāḥ kṣīṇapraharaṇā raṇe
trātāraṃ manasā jagmurdevaṃ nārāyaṇaṃ prabhum
- 13
एतस्मिन्न् अन्तरे मेघा निर्वाणाङ्गारवर्चसः
सार्कचन्द्रग्रहगणं छादयन्तो नभस्तलम्
etasminn antare meghā nirvāṇāṅgāravarcasaḥ
sārkacandragrahagaṇaṃ chādayanto nabhastalam
- 14
चञ्चद्विद्युद्गणाविद्धा घोरा निह्रादकारिणः
अन्योन्यवेगाभिहताः प्रववुः सप्त मारुताः
cañcadvidyudgaṇāviddhā ghorā nihrādakāriṇaḥ
anyonyavegābhihatāḥ pravavuḥ sapta mārutāḥ
- 15
दीप्ततोयाशनीपातैर्वज्रवेगानलानिलैः
ररास घोरैर् उत्पातैर्दह्यमानम् इवाम्बरम्
dīptatoyāśanīpātairvajravegānalānilaiḥ
rarāsa ghorair utpātairdahyamānam ivāmbaram
- 16
पेतुर् उल्कासहस्राणि पेतुर् आकाशगान्य् अपि
न्युब्जानि च विमानानि प्रपतन्त्य् उत्पतन्ति च
petur ulkāsahasrāṇi petur ākāśagāny api
nyubjāni ca vimānāni prapatanty utpatanti ca
- 17
चतुर्युगान्तपर्याये लोकानां यद्भयं भवेत्
अरूपवन्ति रूपाणि तस्मिन्न् उत्पातलक्षणे
caturyugāntaparyāye lokānāṃ yadbhayaṃ bhavet
arūpavanti rūpāṇi tasminn utpātalakṣaṇe
- 18
तमसा निष्प्रभं सर्वं न प्राज्ञायत किंचन
तिमिरौघपरिक्षिप्ता न रेजुश्च दिशो दश
tamasā niṣprabhaṃ sarvaṃ na prājñāyata kiṃcana
timiraughaparikṣiptā na rejuśca diśo daśa
- 19
विवेश रूपिणी काली कालमेघावगुण्ठिता
द्यौर्न भात्य् अभिभूतार्का घोरेण तमसा वृता
viveśa rūpiṇī kālī kālameghāvaguṇṭhitā
dyaurna bhāty abhibhūtārkā ghoreṇa tamasā vṛtā
- 20
तान्घनौघान्सतिमिरान्दोर्भ्यां विक्षिप्य स प्रभुः
वपुः संदर्शयामास दिव्यं कृष्णवपुर्हरिः
tānghanaughānsatimirāndorbhyāṃ vikṣipya sa prabhuḥ
vapuḥ saṃdarśayāmāsa divyaṃ kṛṣṇavapurhariḥ
- 21
बलाहकाञ्जननिभं बलाहकतनूरुहम्
तेजसा वपुषा चैव कृष्णं कृष्णम् इवाचलम्
balāhakāñjananibhaṃ balāhakatanūruham
tejasā vapuṣā caiva kṛṣṇaṃ kṛṣṇam ivācalam
- 22
दीप्तपीताम्बरधरं तप्तकाञ्चनभूषणम्
धूमान्धकारवपुषं युगान्ताग्निम् इवोत्थितम्
dīptapītāmbaradharaṃ taptakāñcanabhūṣaṇam
dhūmāndhakāravapuṣaṃ yugāntāgnim ivotthitam
- 23
चतुर्द्विगुणपीनांसं किरीटच्छन्नमूर्धजम्
चामीकरकरासक्तम् आयुधैर् उपशोभितम्
caturdviguṇapīnāṃsaṃ kirīṭacchannamūrdhajam
cāmīkarakarāsaktam āyudhair upaśobhitam
- 24
चन्द्रार्ककिरणोपेतं गिरिकूटम् इवोच्छ्रितम्
नन्दकानन्दितकरं शराशीविषधारिणम्
candrārkakiraṇopetaṃ girikūṭam ivocchritam
nandakānanditakaraṃ śarāśīviṣadhāriṇam
- 25
शक्तिचित्रं हलोदग्रं शङ्खचक्रगदाधरम्
विष्णुशैलं क्षमामूलं श्रीवृक्षं शार्ङ्गशृङ्गिणम्
śakticitraṃ halodagraṃ śaṅkhacakragadādharam
viṣṇuśailaṃ kṣamāmūlaṃ śrīvṛkṣaṃ śārṅgaśṛṅgiṇam
- 26
हर्यश्वरथसंयुक्ते सुपर्णध्वजशोभिते
चन्द्रार्कचक्ररचिते मन्दराक्षधृतान्तरे
haryaśvarathasaṃyukte suparṇadhvajaśobhite
candrārkacakraracite mandarākṣadhṛtāntare
- 27
अनन्तरश्मिसंयुक्ते दुर्दर्शे मेरुकूबरे
तारकाचित्रकुसुमे ग्रहनक्षत्रवन्धुरे
anantaraśmisaṃyukte durdarśe merukūbare
tārakācitrakusume grahanakṣatravandhure
- 28
भयेष्व् अभयदं व्योम्नि देवा दैत्यपराजिताः
ददृशुस्ते स्थितं देवं दिव्यलोकमये रथे
bhayeṣv abhayadaṃ vyomni devā daityaparājitāḥ
dadṛśuste sthitaṃ devaṃ divyalokamaye rathe
- 29
ते कृताञ्जलयः सर्वे देवाः शक्रपुरोगमाः
जयशब्दं पुरस्कृत्य शरण्यं शरणं गताः
te kṛtāñjalayaḥ sarve devāḥ śakrapurogamāḥ
jayaśabdaṃ puraskṛtya śaraṇyaṃ śaraṇaṃ gatāḥ
- 30
स तेषां तां गिरं श्रुत्वा विष्णुर्दयितदैवतः
मनश्चक्रे विनाशाय दानवानां महामृधे
sa teṣāṃ tāṃ giraṃ śrutvā viṣṇurdayitadaivataḥ
manaścakre vināśāya dānavānāṃ mahāmṛdhe

