17 shlokas
- 1
वैशंपायन उवाच
कस्यचित्त्व् अथ कालस्य राजा राजगृहेश्वरः
शुश्राव निहतं कंसं जरासंधः प्रतापवान्
vaiśaṃpāyana uvāca
kasyacittv atha kālasya rājā rājagṛheśvaraḥ
śuśrāva nihataṃ kaṃsaṃ jarāsaṃdhaḥ pratāpavān
- 2
आजगाम षडङ्गेन बलेन महता वृतः
जिघांसुर्हि यदून्क्रुद्धः कंसस्यापचितिं चरन्
ājagāma ṣaḍaṅgena balena mahatā vṛtaḥ
jighāṃsurhi yadūnkruddhaḥ kaṃsasyāpacitiṃ caran
- 3
अस्तिः प्राप्तिश्च नाम्नास्तां मागधस्य सुते नृप
उभे कंसस्य ते भार्ये प्रादाद्बार्हद्रथो नृपः
astiḥ prāptiśca nāmnāstāṃ māgadhasya sute nṛpa
ubhe kaṃsasya te bhārye prādādbārhadratho nṛpaḥ
- 4
स ताभ्यां मुमुदे राजा वध्वा पितरम् आहुकम्
समाश्रित्य जरासंधम् अनादृत्य च यादवान्
शूरसेनेश्वरो राजा यथा ते बहुशः श्रुतः
sa tābhyāṃ mumude rājā vadhvā pitaram āhukam
samāśritya jarāsaṃdham anādṛtya ca yādavān
śūraseneśvaro rājā yathā te bahuśaḥ śrutaḥ
- 5
ज्ञातिकार्यार्थसिद्ध्यर्थम् उग्रसेनहिते स्थितः
वसुदेवो ऽभवन्नित्यं कंसो न ममृषे च तम्
jñātikāryārthasiddhyartham ugrasenahite sthitaḥ
vasudevo 'bhavannityaṃ kaṃso na mamṛṣe ca tam
- 6
रामकृष्णौ व्यपाश्रित्य हते कंसे दुरात्मनि
उग्रसेनो ऽभवद्राजा भोजवृष्ण्यन्धकैर्वृतः
rāmakṛṣṇau vyapāśritya hate kaṃse durātmani
ugraseno 'bhavadrājā bhojavṛṣṇyandhakairvṛtaḥ
- 7
दुहितृभ्यां जरासंधः प्रियाभ्यां बलवान्नृपः
प्रियार्थं वीरपत्नीभ्याम् उपायान्मथुरां ततः
कृत्वा सर्वसमुद्योगं क्रोधाद् अभिययौ यदून्
duhitṛbhyāṃ jarāsaṃdhaḥ priyābhyāṃ balavānnṛpaḥ
priyārthaṃ vīrapatnībhyām upāyānmathurāṃ tataḥ
kṛtvā sarvasamudyogaṃ krodhād abhiyayau yadūn
- 8
प्रतापावनता ये हि जरासंधस्य पार्थिवाः
मित्राणि ज्ञातयश्चैव संयुक्ताः सुहृदस्तथा
pratāpāvanatā ye hi jarāsaṃdhasya pārthivāḥ
mitrāṇi jñātayaścaiva saṃyuktāḥ suhṛdastathā
- 9
त एनम् अन्वयुः सर्वे सैन्यैः समुदितैर्वृताः
महेष्वासा महावीर्या जरासंधप्रियैषिणः
ta enam anvayuḥ sarve sainyaiḥ samuditairvṛtāḥ
maheṣvāsā mahāvīryā jarāsaṃdhapriyaiṣiṇaḥ
- 10
कारूषो दन्तवक्त्रश्च चेदिराजश्च वीर्यवान्
कलिङ्गाधिपतिश्चैव पौण्ड्रश्च बलिनां वरः
आह्वृतिः कौशिकश्चैव भीष्मकश्च नराधिपः
kārūṣo dantavaktraśca cedirājaśca vīryavān
kaliṅgādhipatiścaiva pauṇḍraśca balināṃ varaḥ
āhvṛtiḥ kauśikaścaiva bhīṣmakaśca narādhipaḥ
- 11
पुत्रश्च भीष्मकस्यापि रुक्मी मुख्यो धनुर्भृताम्
वासुदेवार्जुनाभ्यां यः स्पर्धते स्म सदा बले
putraśca bhīṣmakasyāpi rukmī mukhyo dhanurbhṛtām
vāsudevārjunābhyāṃ yaḥ spardhate sma sadā bale
- 12
वेणुदारिः श्रुतर्वा च क्राथश्चैवांशुमान् अपि
अङ्गराजश्च बलवान्वङ्गानाम् अधिपस्तथा
veṇudāriḥ śrutarvā ca krāthaścaivāṃśumān api
aṅgarājaśca balavānvaṅgānām adhipastathā
- 13
कौसल्यः काशिराजश्च दशार्णाधिपतिस्तथा
सुह्मेश्वरश्च विक्रान्तो विदेहाधिपतिस्तथा
kausalyaḥ kāśirājaśca daśārṇādhipatistathā
suhmeśvaraśca vikrānto videhādhipatistathā
- 14
मद्रराजश्च बलवांस्त्रिगर्तानाम् अथेश्वरः
साल्वराजश्च विक्रान्तो दरदश्च महाबलः
madrarājaśca balavāṃstrigartānām atheśvaraḥ
sālvarājaśca vikrānto daradaśca mahābalaḥ
- 15
यवनाधिपतिश्चैव भगदत्तश्च वीर्यवान्
सौवीरराजः शैब्यश्च पाण्ड्यश्च बलिनां वरः
गान्धारराजः सुबलो नग्नजिच्च महाबलः
yavanādhipatiścaiva bhagadattaśca vīryavān
sauvīrarājaḥ śaibyaśca pāṇḍyaśca balināṃ varaḥ
gāndhārarājaḥ subalo nagnajicca mahābalaḥ
- 16
एते चान्ये च राजानो बलवन्तो महारथाः
तम् अन्वयुर्जरासंधं विद्विषन्तो जनार्दनम्
ete cānye ca rājāno balavanto mahārathāḥ
tam anvayurjarāsaṃdhaṃ vidviṣanto janārdanam
- 17
ते शूरसेनान् आविश्य प्रभूतयवसेन्धनान्
ऊषुः संरुध्य मथुरां परिक्षिप्य बलैस्तदा
te śūrasenān āviśya prabhūtayavasendhanān
ūṣuḥ saṃrudhya mathurāṃ parikṣipya balaistadā

