28 shlokas
- 1
वैशंपायन उवाच
क्रोष्टोर् एवाभवत्पुत्रो वृजिनीवान्महायशाः
वार्जिनीवतम् इच्छन्ति स्वाहिं स्वाहाकृतां वरम्
vaiśaṃpāyana uvāca
kroṣṭor evābhavatputro vṛjinīvānmahāyaśāḥ
vārjinīvatam icchanti svāhiṃ svāhākṛtāṃ varam
- 2
स्वाहिपुत्रो ऽभवद्राजा रुषद्गुर्वदतां वरः
महाक्रतुभिर् ईजे यो विविधैर् आप्तदक्षिणैः
svāhiputro 'bhavadrājā ruṣadgurvadatāṃ varaḥ
mahākratubhir īje yo vividhair āptadakṣiṇaiḥ
- 3
शतप्रसूतिम् इच्छन्वै रुषद्गुः सो ऽग्र्यम् आत्मजम्
चित्रैश्चित्ररथस्तस्य पुत्रः कर्मभिर् अन्वितः
śataprasūtim icchanvai ruṣadguḥ so 'gryam ātmajam
citraiścitrarathastasya putraḥ karmabhir anvitaḥ
- 4
आसीच्चैत्ररथिर्वीरो यज्वा विपुलदक्षिणः
शशबिन्दुः परं वृत्तं राजर्षीणाम् अनुष्ठितः
āsīccaitrarathirvīro yajvā vipuladakṣiṇaḥ
śaśabinduḥ paraṃ vṛttaṃ rājarṣīṇām anuṣṭhitaḥ
- 5
पृथुश्रवाः पृथुयशा राजासीच्छशबिन्दुजः
शंसन्ति च पुराणज्ञाः पार्थश्रवसम् अन्तरम्
pṛthuśravāḥ pṛthuyaśā rājāsīcchaśabindujaḥ
śaṃsanti ca purāṇajñāḥ pārthaśravasam antaram
- 6
अन्तरस्य सुयज्ञस्तु सुयज्ञतनयो ऽभवत्
उषतो यज्ञम् अखिलं स्वधर्मम् उषतां वरः
antarasya suyajñastu suyajñatanayo 'bhavat
uṣato yajñam akhilaṃ svadharmam uṣatāṃ varaḥ
- 7
शिनेयुर् अभवत्पुत्र उषतः शत्रुतापनः
मरुत्तस्तस्य तनयो राजर्षिर् अभवन्नृपः
śineyur abhavatputra uṣataḥ śatrutāpanaḥ
maruttastasya tanayo rājarṣir abhavannṛpaḥ
- 8
मरुत्तो ऽलभत ज्येष्ठं सुतं कम्बलबर्हिषम्
चचार परमं धर्मम् अमर्षात्प्रेत्यभाववित्
marutto 'labhata jyeṣṭhaṃ sutaṃ kambalabarhiṣam
cacāra paramaṃ dharmam amarṣātpretyabhāvavit
- 9
शतप्रसूतिम् इच्छन्वै सुतं कम्बलबर्हिषः
बभूव रुक्मकवचः शतप्रसवतः सुतः
śataprasūtim icchanvai sutaṃ kambalabarhiṣaḥ
babhūva rukmakavacaḥ śataprasavataḥ sutaḥ
- 10
निहत्य रुक्मकवचः शतं कवचिनां रणे
धन्विनां निशितैर्बाणैर् अवाप श्रियम् उत्तमाम्
nihatya rukmakavacaḥ śataṃ kavacināṃ raṇe
dhanvināṃ niśitairbāṇair avāpa śriyam uttamām
- 11
जज्ञे च रुक्मकवचात्पराजित्परवीरहा
जज्ञिरे पञ्च पुत्रास्तु महावीर्याः पराजितः
रुक्मेषुः पृथुरुक्मश्च ज्यामघः पालितो हरिः
jajñe ca rukmakavacātparājitparavīrahā
jajñire pañca putrāstu mahāvīryāḥ parājitaḥ
rukmeṣuḥ pṛthurukmaśca jyāmaghaḥ pālito hariḥ
- 12
पालितं च हरिं चैव विदेहेभ्यः पिता ददौ
रुक्मेषुर् अभवद्राजा पृथुरुक्मश्च संश्रितः
ताभ्यां प्रव्राजितो राज्याज्ज्यामघो ऽवसद् आश्रमे
pālitaṃ ca hariṃ caiva videhebhyaḥ pitā dadau
rukmeṣur abhavadrājā pṛthurukmaśca saṃśritaḥ
tābhyāṃ pravrājito rājyājjyāmagho 'vasad āśrame
- 13
प्रशान्तः स वनस्थस्तु ब्राह्मणेनावबोधितः
जगाम रथम् आस्थाय देशम् अन्यं ध्वजी रथी
praśāntaḥ sa vanasthastu brāhmaṇenāvabodhitaḥ
jagāma ratham āsthāya deśam anyaṃ dhvajī rathī
- 14
नर्मदाकूलम् एकाकी नर्मदां मृत्तिकावतीम्
ऋक्षवन्तं गिरिं जित्वा शुक्तिमत्याम् उवास सः
narmadākūlam ekākī narmadāṃ mṛttikāvatīm
ṛkṣavantaṃ giriṃ jitvā śuktimatyām uvāsa saḥ
- 15
ज्यामघस्याभवद्भार्या चैत्रा परिणता सती
अपुत्रो ऽपि च राजा स नान्यां भार्याम् अविन्दत
jyāmaghasyābhavadbhāryā caitrā pariṇatā satī
aputro 'pi ca rājā sa nānyāṃ bhāryām avindata
- 16
तस्यासीद्विजयो युद्धे तत्र कन्याम् अवाप सः
भार्याम् उवाच संत्रासात्स्नुषेति स नरेश्वरः
tasyāsīdvijayo yuddhe tatra kanyām avāpa saḥ
bhāryām uvāca saṃtrāsātsnuṣeti sa nareśvaraḥ
- 17
एतच्छ्रुत्वाब्रवीद् एनं कस्य चेयं स्नुषेति वै
यस्ते जनिष्यते पुत्रस्तस्य भार्येति जातभीः
etacchrutvābravīd enaṃ kasya ceyaṃ snuṣeti vai
yaste janiṣyate putrastasya bhāryeti jātabhīḥ
- 18
उग्रेण तपसा तस्याः कन्यायाः सा व्यजायत
पुत्र्यां विदर्भं सुभागा चैत्रा परिणता सती
ugreṇa tapasā tasyāḥ kanyāyāḥ sā vyajāyata
putryāṃ vidarbhaṃ subhāgā caitrā pariṇatā satī
- 19
राजपुत्र्यां तु विद्वांसौ स्नुषायां क्रथकैशिकौ
पश्चाद्विदर्भो ऽजनयच्छूरौ रणविशारदौ
rājaputryāṃ tu vidvāṃsau snuṣāyāṃ krathakaiśikau
paścādvidarbho 'janayacchūrau raṇaviśāradau
- 20
भीमो विदर्भस्य सुतः कुन्तिस्तस्यात्मजो ऽभवत्
कुन्तेर्धृष्टः सुतो जज्ञे रणधृष्टः प्रतापवान्
bhīmo vidarbhasya sutaḥ kuntistasyātmajo 'bhavat
kunterdhṛṣṭaḥ suto jajñe raṇadhṛṣṭaḥ pratāpavān
- 21
धृष्टस्य जज्ञिरे शूरास्त्रयः परमधार्मिकाः
आवन्तश्च दशार्हश्च बली विष्णुहरश्च यः
dhṛṣṭasya jajñire śūrāstrayaḥ paramadhārmikāḥ
āvantaśca daśārhaśca balī viṣṇuharaśca yaḥ
- 22
दशार्हस्य सुतो व्योमा विद्वाञ्जीमूत उच्यते
जीमूतपुत्रो वृकतिस्तस्य भीमरथः सुतः
daśārhasya suto vyomā vidvāñjīmūta ucyate
jīmūtaputro vṛkatistasya bhīmarathaḥ sutaḥ
- 23
अथ भीमरथस्यासीत्पुत्रो नवरथस्तथा
तस्य चासीद्दशरथः शकुनिस्तस्य चात्मजः
atha bhīmarathasyāsītputro navarathastathā
tasya cāsīddaśarathaḥ śakunistasya cātmajaḥ
- 24
तस्मात्करम्भः कारम्भिर्देवरातो ऽभवन्नृपः
देवक्षत्रो ऽभवत्तस्य दैवक्षत्रिर्महात्मनः
tasmātkarambhaḥ kārambhirdevarāto 'bhavannṛpaḥ
devakṣatro 'bhavattasya daivakṣatrirmahātmanaḥ
- 25
देवगर्भसमो जज्ञे देवक्षत्रस्य नन्दनः
मधूनां वंशकृद्राजा मधुर्मधुरवाग् अपि
devagarbhasamo jajñe devakṣatrasya nandanaḥ
madhūnāṃ vaṃśakṛdrājā madhurmadhuravāg api
- 26
मधोर्जज्ञे तु वैदर्भ्यां पुरुत्वान्पुरुषोत्तमः
माता जज्ञे ऽथ वैदर्भ्यां भद्रवत्यां कुरूद्वह
madhorjajñe tu vaidarbhyāṃ purutvānpuruṣottamaḥ
mātā jajñe 'tha vaidarbhyāṃ bhadravatyāṃ kurūdvaha
- 27
ऐक्ष्वाकी चाभवद्भार्या मातुस्तस्याम् अजायत
सर्वसत्त्वगुणोपेतः सात्वतां कीर्तिवर्धनः
aikṣvākī cābhavadbhāryā mātustasyām ajāyata
sarvasattvaguṇopetaḥ sātvatāṃ kīrtivardhanaḥ
- 28
इमां विसृष्टिं विज्ञाय ज्यामघस्य महात्मनः
युज्यते परया प्रीत्या प्रजावांश्च भवत्य् उत
imāṃ visṛṣṭiṃ vijñāya jyāmaghasya mahātmanaḥ
yujyate parayā prītyā prajāvāṃśca bhavaty uta

