31 shlokas
- 1
वैशंपायन उवाच
ज्ञात्वा विष्णुं क्षितिगतं भागांश्च त्रिदिवौकसाम्
विनाशशंसी कंसस्य नारदो मथुरां ययौ
vaiśaṃpāyana uvāca
jñātvā viṣṇuṃ kṣitigataṃ bhāgāṃśca tridivaukasām
vināśaśaṃsī kaṃsasya nārado mathurāṃ yayau
- 2
त्रिविष्टपाद् आपतितो मथुरोपवने स्थितः
प्रेषयामास कंसस्य उग्रसेनसुतस्य वै
triviṣṭapād āpatito mathuropavane sthitaḥ
preṣayāmāsa kaṃsasya ugrasenasutasya vai
- 3
स नारदस्यागमनं श्रुत्वा त्वरितविक्रमः
निर्जगामासुरः कंसः स्वपुर्याः पद्मलोचनः
sa nāradasyāgamanaṃ śrutvā tvaritavikramaḥ
nirjagāmāsuraḥ kaṃsaḥ svapuryāḥ padmalocanaḥ
- 4
स ददर्शातिथिं श्लाघ्यं देवर्षिं वीतकल्मषम्
तेजसा ज्वलनाकारं वपुषा सूर्यवर्चसम्
sa dadarśātithiṃ ślāghyaṃ devarṣiṃ vītakalmaṣam
tejasā jvalanākāraṃ vapuṣā sūryavarcasam
- 5
सो ऽभिवाद्यर्षये तस्मै पूजां चक्रे यथाविधि
आसनं चाग्निवर्णाभं विसृज्योपजहार वै
so 'bhivādyarṣaye tasmai pūjāṃ cakre yathāvidhi
āsanaṃ cāgnivarṇābhaṃ visṛjyopajahāra vai
- 6
निषसादासने तस्मिन्स वै शक्रसखो मुनिः
उवाच चोग्रसेनस्य सुतं परमकोपनम्
niṣasādāsane tasminsa vai śakrasakho muniḥ
uvāca cograsenasya sutaṃ paramakopanam
- 7
पूजितो ऽहं त्वया वीर विधिदृष्टेन कर्मणा
गते त्व् एवं मम वचः श्रूयतां गृह्यतां च वै
pūjito 'haṃ tvayā vīra vidhidṛṣṭena karmaṇā
gate tv evaṃ mama vacaḥ śrūyatāṃ gṛhyatāṃ ca vai
- 8
अनुसृत्य दिवो लोकान् अहं ब्रह्मपुरोगमान्
गतः सूर्यसखं तात विपुलं मेरुपर्वतम्
anusṛtya divo lokān ahaṃ brahmapurogamān
gataḥ sūryasakhaṃ tāta vipulaṃ meruparvatam
- 9
सनन्दनवनं चैव दृष्ट्वा चैत्ररथं वनम्
आप्लुतं मे सुतीर्थासु सरित्सु सह दैवतैः
sanandanavanaṃ caiva dṛṣṭvā caitrarathaṃ vanam
āplutaṃ me sutīrthāsu saritsu saha daivataiḥ
- 10
दिव्या त्रिधारा दृष्टा मे पुण्या त्रिपथगा नदी
उपस्पृष्टं च तीर्थेषु दिव्येषु च यथाक्रमम्
divyā tridhārā dṛṣṭā me puṇyā tripathagā nadī
upaspṛṣṭaṃ ca tīrtheṣu divyeṣu ca yathākramam
- 11
दृष्टं मे ब्रह्मसदनं ब्रह्मर्षिगणसेवितम्
देवगन्धर्वनिर्घोषैर् अप्सरोभिश्च नादितम्
dṛṣṭaṃ me brahmasadanaṃ brahmarṣigaṇasevitam
devagandharvanirghoṣair apsarobhiśca nāditam
- 12
सो ऽहं कदाचिद्देवानां समाजं मेरुमूर्धनि
संगृह्य वीणां संसक्ताम् अगच्छं ब्रह्मणः सभाम्
so 'haṃ kadāciddevānāṃ samājaṃ merumūrdhani
saṃgṛhya vīṇāṃ saṃsaktām agacchaṃ brahmaṇaḥ sabhām
- 13
सो ऽहं तत्र सितोष्णीषान्नानारत्नविभूषितान्
दिव्यासनगतान्देवान् अपश्यं सपितामहान्
so 'haṃ tatra sitoṣṇīṣānnānāratnavibhūṣitān
divyāsanagatāndevān apaśyaṃ sapitāmahān
- 14
तत्र मन्त्रयताम् एवं देवतानां मया श्रुतः
भवतः सानुगस्येह वधोपायः सुदारुणः
tatra mantrayatām evaṃ devatānāṃ mayā śrutaḥ
bhavataḥ sānugasyeha vadhopāyaḥ sudāruṇaḥ
- 15
तत्रैषा देवकी या ते मथुरायां पितृष्वसा
अस्या गर्भो ऽष्टमः कंस स ते मृत्युर्भविष्यति
tatraiṣā devakī yā te mathurāyāṃ pitṛṣvasā
asyā garbho 'ṣṭamaḥ kaṃsa sa te mṛtyurbhaviṣyati
- 16
देवानां स तु सर्वस्वं त्रिदिवस्य गतिश्च सः
परं रहस्यं देवानां स ते मृत्युर्भविष्यति
devānāṃ sa tu sarvasvaṃ tridivasya gatiśca saḥ
paraṃ rahasyaṃ devānāṃ sa te mṛtyurbhaviṣyati
- 17
परतो ऽपि परस्त्व् एषां स्वयंभूश्च स्वयंभुवाम्
ततस्ते तन्महद्भूतं दिव्यं न कथयाम्य् अहम्
parato 'pi parastv eṣāṃ svayaṃbhūśca svayaṃbhuvām
tataste tanmahadbhūtaṃ divyaṃ na kathayāmy aham
- 18
श्लाघ्यश्च स हि ते मृत्युर्भूतपूर्वश्च तं स्मर
यत्नश्च क्रियतां कंस गर्भस्थे यदि शक्यते
ślāghyaśca sa hi te mṛtyurbhūtapūrvaśca taṃ smara
yatnaśca kriyatāṃ kaṃsa garbhasthe yadi śakyate
- 19
एषा मे त्वद्गता प्रीतिर् इत्यर्थं चाहम् आगतः
भुज्यन्तां सर्वकामार्थाः स्वस्ति ते ऽस्तु व्रजाम्य् अहम्
eṣā me tvadgatā prītir ityarthaṃ cāham āgataḥ
bhujyantāṃ sarvakāmārthāḥ svasti te 'stu vrajāmy aham
- 20
इत्य् उक्त्वा नारदे याते तस्य वाक्यं विचिन्तयन्
जहासोच्चैस्ततः कंसः प्रकाशदशनश्चिरम्
ity uktvā nārade yāte tasya vākyaṃ vicintayan
jahāsoccaistataḥ kaṃsaḥ prakāśadaśanaściram
- 21
सस्मितं चैव प्रोवाच भृत्यानाम् अग्रतः स्थितः
हास्यः खलु स सत्त्वेषु नारदो न विशारदः
sasmitaṃ caiva provāca bhṛtyānām agrataḥ sthitaḥ
hāsyaḥ khalu sa sattveṣu nārado na viśāradaḥ
- 22
नाहं भीषयितुं शक्यो देवैर् अपि सवासवैः
आहवस्थः शयानो वा प्रमत्तो मत्त एव वा
nāhaṃ bhīṣayituṃ śakyo devair api savāsavaiḥ
āhavasthaḥ śayāno vā pramatto matta eva vā
- 23
यो ऽहं दोर्भ्याम् उदाराभ्यां क्षोभये ऽहं धराम् इमाम्
को ऽस्ति यो मानुषे लोके मां क्षोभयितुम् उत्सहेत्
yo 'haṃ dorbhyām udārābhyāṃ kṣobhaye 'haṃ dharām imām
ko 'sti yo mānuṣe loke māṃ kṣobhayitum utsahet
- 24
अद्यप्रभृति भूतानाम् एष देवानुवर्तिनाम्
नृपक्षिपशुसंघानां करोमि कदनं महत्
adyaprabhṛti bhūtānām eṣa devānuvartinām
nṛpakṣipaśusaṃghānāṃ karomi kadanaṃ mahat
- 25
आज्ञाप्यतां हयः केशी प्रलम्बो धेनुकस्तथा
अरिष्टो वृषभश्चैव पूतना कालियस्तथा
ājñāpyatāṃ hayaḥ keśī pralambo dhenukastathā
ariṣṭo vṛṣabhaścaiva pūtanā kāliyastathā
- 26
अटध्वं पृथिवीं कृत्स्नां यथेष्टं कामरूपिणः
प्रहरध्वं च सर्वेषु ये ऽस्माकं पक्षदूषकाः
aṭadhvaṃ pṛthivīṃ kṛtsnāṃ yatheṣṭaṃ kāmarūpiṇaḥ
praharadhvaṃ ca sarveṣu ye 'smākaṃ pakṣadūṣakāḥ
- 27
गर्भस्थानाम् अपि गतिर्विज्ञेया भुवि देहिनाम्
नारदेन हि गर्भेभ्यो भयं नः समुदाहृतम्
garbhasthānām api gatirvijñeyā bhuvi dehinām
nāradena hi garbhebhyo bhayaṃ naḥ samudāhṛtam
- 28
भवन्तो हि यथाकामं मोदन्तां विगतज्वराः
मां च वो नाथम् आश्रित्य नास्ति देवकृतं भयम्
bhavanto hi yathākāmaṃ modantāṃ vigatajvarāḥ
māṃ ca vo nātham āśritya nāsti devakṛtaṃ bhayam
- 29
स तु केलिकिलो विप्रो भेदशीलश्च नारदः
सुश्लिष्टान् अपि लोकेषु भेदयंल्लभते रतिम्
sa tu kelikilo vipro bhedaśīlaśca nāradaḥ
suśliṣṭān api lokeṣu bhedayaṃllabhate ratim
- 30
कण्डूयमानः सततं लोकान् अटति चञ्चलः
घटयानो नरेन्द्राणां तन्त्रीवैराणि चैव ह
kaṇḍūyamānaḥ satataṃ lokān aṭati cañcalaḥ
ghaṭayāno narendrāṇāṃ tantrīvairāṇi caiva ha

