51 shlokas
- 1
श्रुतस्ते दैत्यसैन्यस्य विस्तरस्तात विग्रहे
सुराणां सर्वसैन्यस्य विस्तरं वैष्णवं शृणु
śrutaste daityasainyasya vistarastāta vigrahe
surāṇāṃ sarvasainyasya vistaraṃ vaiṣṇavaṃ śṛṇu
- 2
आदित्या वसवो रुद्रा अश्विनौ च महाबलौ
सबलाः सानुगाश्चैव संनह्यन्त यथाक्रमम्
ādityā vasavo rudrā aśvinau ca mahābalau
sabalāḥ sānugāścaiva saṃnahyanta yathākramam
- 3
पुरुहूतस्तु पुरतो लोकपालः सहस्रदृक्
ग्रामणीः सर्वदेवानाम् आरुरोह सुरद्विपम्
puruhūtastu purato lokapālaḥ sahasradṛk
grāmaṇīḥ sarvadevānām āruroha suradvipam
- 4
सव्ये चास्य रथः पार्श्वे पक्षिप्रवरवेगवान्
सुचारुचक्रचरणो हेमवज्रपरिष्कृतः
savye cāsya rathaḥ pārśve pakṣipravaravegavān
sucārucakracaraṇo hemavajrapariṣkṛtaḥ
- 5
देवगन्धर्वयक्षौघैर् अनुयातः सहस्रशः
दीप्तिमद्भिः सदस्यैश्च ब्रह्मर्षिभिर् अभिष्टुतः
devagandharvayakṣaughair anuyātaḥ sahasraśaḥ
dīptimadbhiḥ sadasyaiśca brahmarṣibhir abhiṣṭutaḥ
- 6
वज्रविस्फूर्जितोद्धूतैर्विद्युदिन्द्रायुधार्पितैः
गुप्तो बलाहकगणैः पर्वतैर् इव कामगैः
vajravisphūrjitoddhūtairvidyudindrāyudhārpitaiḥ
gupto balāhakagaṇaiḥ parvatair iva kāmagaiḥ
- 7
यम् आरूढः स भगवान्पर्येति मघवान्गजम्
हविर्धानेषु गायन्ति विप्रा मखमुखे स्थिताः
yam ārūḍhaḥ sa bhagavānparyeti maghavāngajam
havirdhāneṣu gāyanti viprā makhamukhe sthitāḥ
- 8
स्वर्गे शक्रानुयातेषु देवतूर्यानुनादिषु
इन्द्रं समुपनृत्यन्ति शतशो ह्य् अप्सरोगणाः
svarge śakrānuyāteṣu devatūryānunādiṣu
indraṃ samupanṛtyanti śataśo hy apsarogaṇāḥ
- 9
केतुना वंशराजेन भ्राजमानो यथा रविः
युक्तो हयसहस्रेण मनोमारुतरंहसा
ketunā vaṃśarājena bhrājamāno yathā raviḥ
yukto hayasahasreṇa manomārutaraṃhasā
- 10
स स्यन्दनवरो भाति युक्तो मातलिना तदा
कृत्स्नः परिवृतो मेरुर्भास्करस्येव तेजसा
sa syandanavaro bhāti yukto mātalinā tadā
kṛtsnaḥ parivṛto merurbhāskarasyeva tejasā
- 11
यमस्तु दण्डम् उद्यम्य कालयुक्तं च मुद्गरम्
तस्थौ सुरगणानीके दैत्यान्नादेन भीषयन्
yamastu daṇḍam udyamya kālayuktaṃ ca mudgaram
tasthau suragaṇānīke daityānnādena bhīṣayan
- 12
चतुर्भिः सागरैर्गुप्तो लेलिहद्भिश्च पन्नगैः
शङ्खमुक्ताङ्गदधरो बिभ्रत्तोयमयं वपुः
caturbhiḥ sāgarairgupto lelihadbhiśca pannagaiḥ
śaṅkhamuktāṅgadadharo bibhrattoyamayaṃ vapuḥ
- 13
कालपाशान्समाविध्य हयैः शशिकरोपमैः
वाय्वीरितजलोद्गारैः कुर्वंल्लीलाः सहस्रशः
kālapāśānsamāvidhya hayaiḥ śaśikaropamaiḥ
vāyvīritajalodgāraiḥ kurvaṃllīlāḥ sahasraśaḥ
- 14
पाण्डुरोद्धूतवसनः प्रवालरुचिराङ्गदः
मणिश्यामोत्तमवपुर्हारभारार्पितोदरः
pāṇḍuroddhūtavasanaḥ pravālarucirāṅgadaḥ
maṇiśyāmottamavapurhārabhārārpitodaraḥ
- 15
वरुणः पाशभृन्मध्ये देवानीकस्य तस्थिवान्
युद्धवेलाम् अभिलषन्भिन्नवेल इवार्णवः
varuṇaḥ pāśabhṛnmadhye devānīkasya tasthivān
yuddhavelām abhilaṣanbhinnavela ivārṇavaḥ
- 16
यक्षराक्षससैन्येन गुह्यकानां गणैर् अपि
युक्तश्च शङ्खपद्माभ्यां निधीनाम् अधिपः प्रभुः
राजराजेश्वरः श्रीमान्गदापाणिर् अदृश्यत
yakṣarākṣasasainyena guhyakānāṃ gaṇair api
yuktaśca śaṅkhapadmābhyāṃ nidhīnām adhipaḥ prabhuḥ
rājarājeśvaraḥ śrīmāngadāpāṇir adṛśyata
- 17
विमानयोधी धनदो विमाने पुष्पके स्थितः
स राजराजः शुशुभे युद्धार्थी नरवाहनः
प्रेक्षमाणः शिवसखः साक्षाद् इव शिवः स्वयम्
vimānayodhī dhanado vimāne puṣpake sthitaḥ
sa rājarājaḥ śuśubhe yuddhārthī naravāhanaḥ
prekṣamāṇaḥ śivasakhaḥ sākṣād iva śivaḥ svayam
- 18
पूर्वं पक्षं सहस्राक्षः पितृराजस्तु दक्षिणम्
वरुणः पश्चिमं पक्षम् उत्तरं नरवाहनः
pūrvaṃ pakṣaṃ sahasrākṣaḥ pitṛrājastu dakṣiṇam
varuṇaḥ paścimaṃ pakṣam uttaraṃ naravāhanaḥ
- 19
चतुर्षु युक्ताश्चत्वारो लोकपाला बलोत्कटाः
स्वां स्वां दिशं ररक्षुस्ते तस्य देवबलस्य ह
caturṣu yuktāścatvāro lokapālā balotkaṭāḥ
svāṃ svāṃ diśaṃ rarakṣuste tasya devabalasya ha
- 20
सूर्यः सप्ताश्वयुक्तेन रथेनाम्बरगामिना
श्रिया जाज्वल्यमानेन दीप्यमानैश्च रश्मिभिः
sūryaḥ saptāśvayuktena rathenāmbaragāminā
śriyā jājvalyamānena dīpyamānaiśca raśmibhiḥ
- 21
उदयास्तगचक्रेण मेरुपर्यन्तगामिना
त्रिदिवद्वारचित्रेण तपता लोकम् अव्ययम्
udayāstagacakreṇa meruparyantagāminā
tridivadvāracitreṇa tapatā lokam avyayam
- 22
सहस्ररश्मियुक्तेन भ्राजमानेन तेजसा
चचार मध्ये देवानां द्वादशात्मा दिनेश्वरः
sahasraraśmiyuktena bhrājamānena tejasā
cacāra madhye devānāṃ dvādaśātmā dineśvaraḥ
- 23
सोमः श्वेतहयो भाति स्यन्दने शीतरश्मिवान्
हिमतोयप्रपूर्णाभिर्भाभिर् आप्लावयञ्जगत्
somaḥ śvetahayo bhāti syandane śītaraśmivān
himatoyaprapūrṇābhirbhābhir āplāvayañjagat
- 24
तम् ऋक्षयोगानुगतं शिशिरांशुं द्विजेश्वरम्
शशच्छायाङ्किततनुं नैशस्य तमसः क्षयम्
tam ṛkṣayogānugataṃ śiśirāṃśuṃ dvijeśvaram
śaśacchāyāṅkitatanuṃ naiśasya tamasaḥ kṣayam
- 25
ज्योतिषाम् ईरणं व्योम्नि रसानां रसनं प्रभुम्
ओषधीनां परित्राणं निधानम् अमृतस्य च
jyotiṣām īraṇaṃ vyomni rasānāṃ rasanaṃ prabhum
oṣadhīnāṃ paritrāṇaṃ nidhānam amṛtasya ca
- 26
जगतः प्रथमं भागं सौम्यं शैत्यमयं रसम्
ददृशुर्दानवाः सोमं हिमप्रहरणं स्थितम्
jagataḥ prathamaṃ bhāgaṃ saumyaṃ śaityamayaṃ rasam
dadṛśurdānavāḥ somaṃ himapraharaṇaṃ sthitam
- 27
यः प्राणः सर्वभूतानां पञ्चधा भिद्यते नृषु
सप्तस्कन्धगतो लोकांस्त्रीन्दधार चचार च
yaḥ prāṇaḥ sarvabhūtānāṃ pañcadhā bhidyate nṛṣu
saptaskandhagato lokāṃstrīndadhāra cacāra ca
- 28
यम् आहुर् अग्नेर्यन्तारं सर्वप्रभवम् ईश्वरम्
सप्तस्वरगता यस्य योनिर्गीर्भिर् उदीर्यते
yam āhur agneryantāraṃ sarvaprabhavam īśvaram
saptasvaragatā yasya yonirgīrbhir udīryate
- 29
यं वदन्त्य् उत्तमं भूतं यं वदन्त्य् अशरीरिणम्
यम् आहुर् आकाशगमं शीघ्रगं शब्दयोनिनम्
yaṃ vadanty uttamaṃ bhūtaṃ yaṃ vadanty aśarīriṇam
yam āhur ākāśagamaṃ śīghragaṃ śabdayoninam
- 30
स वायुः सर्वभूतायुर् उद्धतः स्वेन तेजसा
प्रववौ व्यथयन्दैत्यान्प्रतिलोमः सतोयदः
sa vāyuḥ sarvabhūtāyur uddhataḥ svena tejasā
pravavau vyathayandaityānpratilomaḥ satoyadaḥ

