32 shlokas
- 1
ततो भयं विष्णुमयं श्रुत्वा दैतेयदानवाः
उद्योगं विपुलं चक्रुर्युद्धाय युधि दुर्जयाः
tato bhayaṃ viṣṇumayaṃ śrutvā daiteyadānavāḥ
udyogaṃ vipulaṃ cakruryuddhāya yudhi durjayāḥ
- 2
मयस्तु काञ्चनमयं त्रिनल्वान्तरम् अव्ययम्
चतुश्चक्रं सुवपुषं सुकल्पितमहायुधम्
mayastu kāñcanamayaṃ trinalvāntaram avyayam
catuścakraṃ suvapuṣaṃ sukalpitamahāyudham
- 3
किंकिणीजालनिर्घोषं द्वीपिचर्मपरिष्कृतम्
रचितं रत्नजालैश्च हेमजालैश्च शोभितम्
kiṃkiṇījālanirghoṣaṃ dvīpicarmapariṣkṛtam
racitaṃ ratnajālaiśca hemajālaiśca śobhitam
- 4
ईहामृगगणाकीर्णं पक्षिभिश्च विराजितम्
दिव्यास्त्रतूणीरधरं पयोधरनिनादितम्
īhāmṛgagaṇākīrṇaṃ pakṣibhiśca virājitam
divyāstratūṇīradharaṃ payodharanināditam
- 5
स्वक्षं रथवरोदारं सूपस्थम् अगमोपमम्
गदापरिघसम्पूर्णं मूर्तिमन्तम् इवार्णवम्
svakṣaṃ rathavarodāraṃ sūpastham agamopamam
gadāparighasampūrṇaṃ mūrtimantam ivārṇavam
- 6
हेमकेयूरवलयं स्वर्णकुण्डलकूबरम्
सपताकध्वजोदग्रं सादित्यम् इव मन्दरम्
hemakeyūravalayaṃ svarṇakuṇḍalakūbaram
sapatākadhvajodagraṃ sādityam iva mandaram
- 7
गजेन्द्राम्भोदवपुषं क्वचित्केसरवर्चसम्
युक्तम् ऋक्षसहस्रेण सहस्राम्बुदनादितम्
gajendrāmbhodavapuṣaṃ kvacitkesaravarcasam
yuktam ṛkṣasahasreṇa sahasrāmbudanāditam
- 8
दीप्तम् आकाशगं दिव्यं रथं पररथारुजम्
अतिष्ठत्समराकाङ्क्षी मेरुं दीप्त इवांशुमान्
dīptam ākāśagaṃ divyaṃ rathaṃ pararathārujam
atiṣṭhatsamarākāṅkṣī meruṃ dīpta ivāṃśumān
- 9
तारस्तु क्रोशविस्तारम् आयसं वाहयन्रथम्
शैलोत्करिमसंकाशं नीलाञ्जनचयोपमम्
tārastu krośavistāram āyasaṃ vāhayanratham
śailotkarimasaṃkāśaṃ nīlāñjanacayopamam
- 10
काललोहाष्टचरणं लोहेषायुगकूबरम्
तिमिरोद्गारिकिरणं गर्जन्तम् इव तोयदम्
kālalohāṣṭacaraṇaṃ loheṣāyugakūbaram
timirodgārikiraṇaṃ garjantam iva toyadam
- 11
लोहजालेन महता सगवाक्षेण दंशितम्
आयसैः परिघैः पूर्णं क्षेपणीयैश्च मुद्गरैः
lohajālena mahatā sagavākṣeṇa daṃśitam
āyasaiḥ parighaiḥ pūrṇaṃ kṣepaṇīyaiśca mudgaraiḥ
- 12
प्रासैः पाशैश्च विततैर् अवसक्तैश्च मुद्गरैः
शोभितं त्रासनीयैश्च तोमरैः सपरश्वधैः
prāsaiḥ pāśaiśca vitatair avasaktaiśca mudgaraiḥ
śobhitaṃ trāsanīyaiśca tomaraiḥ saparaśvadhaiḥ
- 13
उद्यतं द्विषतां हेतोर्द्वितीयम् इव मन्दरम्
युक्तं खरसहस्रेण सो ऽध्यारोहद्रथोत्तमम्
udyataṃ dviṣatāṃ hetordvitīyam iva mandaram
yuktaṃ kharasahasreṇa so 'dhyārohadrathottamam
- 14
विरोचनस्तु संक्रुद्धो गदापाणिर् अवस्थितः
प्रमुखे तस्य सैन्यस्य दीप्तशृङ्ग इवाचलः
virocanastu saṃkruddho gadāpāṇir avasthitaḥ
pramukhe tasya sainyasya dīptaśṛṅga ivācalaḥ
- 15
युक्तं हयसहस्रेण हयग्रीवस्तु दानवः
स्यन्दनं वाहयामास सपत्नानीकमर्दनम्
yuktaṃ hayasahasreṇa hayagrīvastu dānavaḥ
syandanaṃ vāhayāmāsa sapatnānīkamardanam
- 16
व्यायतं बहुसहस्रं धनुर्विस्फारयन्महत्
वराहः प्रमुखे तस्थौ सावरोह इवाचलः
vyāyataṃ bahusahasraṃ dhanurvisphārayanmahat
varāhaḥ pramukhe tasthau sāvaroha ivācalaḥ
- 17
क्षरस्तु विक्षरन्दर्पान्नेत्राभ्यां रोषजं जलम्
स्फुरद्दन्तौष्ठवदनः संग्रामं सो ऽभ्यकाङ्क्षत
kṣarastu vikṣarandarpānnetrābhyāṃ roṣajaṃ jalam
sphuraddantauṣṭhavadanaḥ saṃgrāmaṃ so 'bhyakāṅkṣata
- 18
त्वष्टा त्व् अष्टादशहयं यानम् आस्थाय दानवः
व्यूहितो दानवैर्व्यूहैः परिचक्राम वीर्यवान्
tvaṣṭā tv aṣṭādaśahayaṃ yānam āsthāya dānavaḥ
vyūhito dānavairvyūhaiḥ paricakrāma vīryavān
- 19
विप्रचित्तिसुतः श्वेतः श्वेतकुण्डलभूषणः
श्वेतशैलप्रतीकाशो युद्धायाभिमुखः स्थितः
vipracittisutaḥ śvetaḥ śvetakuṇḍalabhūṣaṇaḥ
śvetaśailapratīkāśo yuddhāyābhimukhaḥ sthitaḥ
- 20
अरिष्टो बलिपुत्रस्तु वरिष्ठो ऽद्रिशिलायुधः
युद्धायातिष्ठद् आयस्तो धराधर इवापरः
ariṣṭo baliputrastu variṣṭho 'driśilāyudhaḥ
yuddhāyātiṣṭhad āyasto dharādhara ivāparaḥ
- 21
किशोरस्त्व् अतिसंहर्षात्किशोर इव चोदितः
अभवद्दैत्यसैन्यस्य मध्ये रविर् इवोदितः
kiśorastv atisaṃharṣātkiśora iva coditaḥ
abhavaddaityasainyasya madhye ravir ivoditaḥ
- 22
लम्बस्तु लम्बमेघाभः प्रलम्बाम्बरभूषणः
दैत्यव्यूहगतो भाति सनीहार इवांशुमान्
lambastu lambameghābhaḥ pralambāmbarabhūṣaṇaḥ
daityavyūhagato bhāti sanīhāra ivāṃśumān
- 23
स्वर्भानुरास्ययोधी तु दशनौष्ठेक्षणायुधः
हसंस्तिष्ठति दैत्यानां प्रमुखे सुमुखो ग्रहः
svarbhānurāsyayodhī tu daśanauṣṭhekṣaṇāyudhaḥ
hasaṃstiṣṭhati daityānāṃ pramukhe sumukho grahaḥ
- 24
अन्ये हयगता भान्ति नागस्कन्धगताः परे
सिंहव्याघ्रगताश्चान्ये वराहर्क्षगताः परे
anye hayagatā bhānti nāgaskandhagatāḥ pare
siṃhavyāghragatāścānye varāharkṣagatāḥ pare
- 25
केचित्खरोष्ट्रयातारः केचित्तोयदवाहनाः
नानापक्षिगताः केचित्केचित्पवनवाहनाः
kecitkharoṣṭrayātāraḥ kecittoyadavāhanāḥ
nānāpakṣigatāḥ kecitkecitpavanavāhanāḥ
- 26
पत्तिनस्त्व् अपरे दैत्या भीषणा विकृताननाः
एकपादा द्विपादाश्च ननृतुर्युद्धकाङ्क्षिणः
pattinastv apare daityā bhīṣaṇā vikṛtānanāḥ
ekapādā dvipādāśca nanṛturyuddhakāṅkṣiṇaḥ
- 27
प्रक्ष्वेडमाना बहवः स्फोटयन्तश्च दानवाः
दृप्तशार्दूलनिर्घोषा नेदुर्दानवपुंगवाः
prakṣveḍamānā bahavaḥ sphoṭayantaśca dānavāḥ
dṛptaśārdūlanirghoṣā nedurdānavapuṃgavāḥ
- 28
ते गदापरिघैर् उग्रैर्धनुर्व्यायामशालिनः
बाहुभिः परिघाकारैस्तर्जयन्ति स्म दानवाः
te gadāparighair ugrairdhanurvyāyāmaśālinaḥ
bāhubhiḥ parighākāraistarjayanti sma dānavāḥ
- 29
प्रासैः पाशैश्च खड्गैश्च तोमराङ्कुशपट्टिसैः
चिक्रीडुस्ते शतघ्नीभिः शितधारैश्च मुद्गरैः
prāsaiḥ pāśaiśca khaḍgaiśca tomarāṅkuśapaṭṭisaiḥ
cikrīḍuste śataghnībhiḥ śitadhāraiśca mudgaraiḥ
- 30
गण्डशैलैश्च शैलैश्च परिघैश्चोत्तमायुधैः
चक्रैश्च दैत्यप्रवराश्चक्रुर् आनन्दितं बलम्
gaṇḍaśailaiśca śailaiśca parighaiścottamāyudhaiḥ
cakraiśca daityapravarāścakrur ānanditaṃ balam

