18 shlokas
- 1
शौनक उवाच
जनमेजयस्य के पुत्राः पठ्यन्ते लोमहर्षणे
कस्मिन्प्रतिष्ठितो वंशः पाण्डवानां महात्मनाम्
śaunaka uvāca
janamejayasya ke putrāḥ paṭhyante lomaharṣaṇe
kasminpratiṣṭhito vaṃśaḥ pāṇḍavānāṃ mahātmanām
- 2
सूत उवाच
पारिक्षितस्य काश्यायां द्वौ पुत्रौ संबभूवतुः
चन्द्रापीडश्च नृपतिः सूर्यापीडश्च मोक्षवित्
sūta uvāca
pārikṣitasya kāśyāyāṃ dvau putrau saṃbabhūvatuḥ
candrāpīḍaśca nṛpatiḥ sūryāpīḍaśca mokṣavit
- 3
चन्द्रापीडस्य पुत्राणां शतम् उत्तमधन्विनाम्
जनमेजय इत्य् एव क्षत्रं भुवि परिश्रुतम्
candrāpīḍasya putrāṇāṃ śatam uttamadhanvinām
janamejaya ity eva kṣatraṃ bhuvi pariśrutam
- 4
तेषां ज्येष्ठस्तु राजासीत्पुरे वारणसाह्वये
सत्यकर्णो महाबाहुर्यज्वा विपुलदक्षिणः
teṣāṃ jyeṣṭhastu rājāsītpure vāraṇasāhvaye
satyakarṇo mahābāhuryajvā vipuladakṣiṇaḥ
- 5
सत्यकर्णस्य दायादः श्वेतकर्णः प्रतापवान्
अपुत्रः स तु धर्मात्मा प्रविवेश तपोवनम्
satyakarṇasya dāyādaḥ śvetakarṇaḥ pratāpavān
aputraḥ sa tu dharmātmā praviveśa tapovanam
- 6
तस्माद्वनगताद्गर्भं यादवी प्रत्यपद्यत
सुचारोर्दुहिता सुभ्रूर्मालिनी भ्रातृमालिनी
tasmādvanagatādgarbhaṃ yādavī pratyapadyata
sucārorduhitā subhrūrmālinī bhrātṛmālinī
- 7
स त्व् अजन्मनि गर्भस्य श्वेतकर्णः प्रजेश्वरः
अन्वगच्छत तं पूर्वैर्महाप्रस्थानम् अच्युतम्
sa tv ajanmani garbhasya śvetakarṇaḥ prajeśvaraḥ
anvagacchata taṃ pūrvairmahāprasthānam acyutam
- 8
सा दृष्ट्वा सम्प्रयातं तं मालिनी पृष्ठतो ऽन्वगात्
पथि सा सुषुवे सुभ्रूर्वने राजीवलोचनम्
sā dṛṣṭvā samprayātaṃ taṃ mālinī pṛṣṭhato 'nvagāt
pathi sā suṣuve subhrūrvane rājīvalocanam
- 9
तम् अपास्य च तत्रैव राजानं सान्वगच्छत
पतिव्रता महाभागा द्रौपदीव पुरा पतीन्
tam apāsya ca tatraiva rājānaṃ sānvagacchata
pativratā mahābhāgā draupadīva purā patīn
- 10
सुकुमारः कुमारो ऽसौ गिरिकुञ्जे रुरोद ह
दयार्थं तस्य मेघास्तु प्रादुरासन्महात्मनः
sukumāraḥ kumāro 'sau girikuñje ruroda ha
dayārthaṃ tasya meghāstu prādurāsanmahātmanaḥ
- 11
श्रविष्ठायाश्च पुत्रौ द्वौ पैप्पलादौ च तौ द्विजौ
दृष्ट्वा कृपान्वितौ गृह्य तं प्रक्षालयतां जले
śraviṣṭhāyāśca putrau dvau paippalādau ca tau dvijau
dṛṣṭvā kṛpānvitau gṛhya taṃ prakṣālayatāṃ jale
- 12
विघृष्टे तस्य ते पार्श्वे खेलेन रुधिरस्रवे
अजश्यामौ च पार्श्वौ ताव् उभाव् अपि समाहितौ
vighṛṣṭe tasya te pārśve khelena rudhirasrave
ajaśyāmau ca pārśvau tāv ubhāv api samāhitau
- 13
तथैव च समारूढाव् अजपार्श्वस्ततो ऽभवत्
ततो ऽजपार्श्व इति तौ चक्राते तस्य नाम ह
tathaiva ca samārūḍhāv ajapārśvastato 'bhavat
tato 'japārśva iti tau cakrāte tasya nāma ha
- 14
स तु वेमकशालायां उभाभ्याम् अभिवर्धितः
sa tu vemakaśālāyāṃ ubhābhyām abhivardhitaḥ
- 15
वेमकस्य तु भार्या तम् उद्वहत्पुत्रकारणात्
वेमक्याः स तु पुत्रो ऽभूद्ब्राह्मणौ सचिवौ च तौ
vemakasya tu bhāryā tam udvahatputrakāraṇāt
vemakyāḥ sa tu putro 'bhūdbrāhmaṇau sacivau ca tau
- 16
तेषां पुत्राश्च पौत्राश्च युगपत्तुल्यजीविनः
स एष पौरवो वंशः पाण्डवानां प्रतिष्ठितः
teṣāṃ putrāśca pautrāśca yugapattulyajīvinaḥ
sa eṣa pauravo vaṃśaḥ pāṇḍavānāṃ pratiṣṭhitaḥ
- 17
श्लोको ऽपि चात्र गीतो ऽयं नाहुषेण ययातिना
जरासंक्रमणे पूर्वं तदा प्रीतेन धीमता
śloko 'pi cātra gīto 'yaṃ nāhuṣeṇa yayātinā
jarāsaṃkramaṇe pūrvaṃ tadā prītena dhīmatā
- 18
अचन्द्रार्कग्रहा भूमिर्भवेद् अपि न संशयः
अपौरवा न तु मही भविष्यति कदाचन
acandrārkagrahā bhūmirbhaved api na saṃśayaḥ
apauravā na tu mahī bhaviṣyati kadācana

