57 shlokas
- 1
वैशंपायन उवाच
कदाचित्तु तदा कृष्णो विना संकर्षणं गुरुम्
चचार तद्वनवरं कामरूपी वराननः
vaiśaṃpāyana uvāca
kadācittu tadā kṛṣṇo vinā saṃkarṣaṇaṃ gurum
cacāra tadvanavaraṃ kāmarūpī varānanaḥ
- 2
काकपक्षधरः श्रीमाञ्श्यामः पद्मदलेक्षणः
श्रीवत्सेनोरसा युक्तः शशाङ्क इव लक्ष्मणा
kākapakṣadharaḥ śrīmāñśyāmaḥ padmadalekṣaṇaḥ
śrīvatsenorasā yuktaḥ śaśāṅka iva lakṣmaṇā
- 3
साङ्गदेनाग्रपादेन पङ्कजोद्भिन्नवर्चसा
सुकुमाराभिताम्रेण क्रान्तविक्रान्तगामिना
sāṅgadenāgrapādena paṅkajodbhinnavarcasā
sukumārābhitāmreṇa krāntavikrāntagāminā
- 4
पीते प्रीतिकरे नॄणां पद्मकिञ्जल्कसप्रभे
सूक्ष्मे वसानो वसने ससंध्य इव तोयदः
pīte prītikare nṝṇāṃ padmakiñjalkasaprabhe
sūkṣme vasāno vasane sasaṃdhya iva toyadaḥ
- 5
वन्यव्यापारयुक्ताभ्यां व्यग्राभ्यां दण्डरज्जुभिः
भुजाभ्यां साधुवृत्ताभ्यां पूजिताभ्यां दिवौकसैः
vanyavyāpārayuktābhyāṃ vyagrābhyāṃ daṇḍarajjubhiḥ
bhujābhyāṃ sādhuvṛttābhyāṃ pūjitābhyāṃ divaukasaiḥ
- 6
सदृशं पुण्डरीकस्य गन्धेन कमलस्य च
रराज तस्य तद्बाल्ये रुचिरोष्ठपुटं मुखम्
sadṛśaṃ puṇḍarīkasya gandhena kamalasya ca
rarāja tasya tadbālye ruciroṣṭhapuṭaṃ mukham
- 7
शिखाभिस्तस्य मुक्ताभी रराज मुखपङ्कजम्
वृत्तं षट्पदपङ्क्तीभिर्यथा स्यात्पद्ममण्डलम्
śikhābhistasya muktābhī rarāja mukhapaṅkajam
vṛttaṃ ṣaṭpadapaṅktībhiryathā syātpadmamaṇḍalam
- 8
तस्यार्जुनकदम्बाढ्या नीपकन्दलमालिनी
रराज माला शिरसि नक्षत्राणां यथा दिवि
tasyārjunakadambāḍhyā nīpakandalamālinī
rarāja mālā śirasi nakṣatrāṇāṃ yathā divi
- 9
स तया मालया वीरः शुशुभे सर्वपुष्पया
मेघकालाम्बुदश्यामो नभस्य इव मूर्तिमान्
sa tayā mālayā vīraḥ śuśubhe sarvapuṣpayā
meghakālāmbudaśyāmo nabhasya iva mūrtimān
- 10
एकेनामलपत्रेण कण्ठसूत्रावलम्बिना
रराज बर्हिपत्रेण मन्दमारुतकम्पिना
ekenāmalapatreṇa kaṇṭhasūtrāvalambinā
rarāja barhipatreṇa mandamārutakampinā
- 11
क्वचिद्गायन्क्वचित्क्रीडंश्चञ्चूर्यंश्च क्वचित्क्वचित्
पर्णवाद्यं श्रुतिसुखं वादयानः क्वचिद्वने
kvacidgāyankvacitkrīḍaṃścañcūryaṃśca kvacitkvacit
parṇavādyaṃ śrutisukhaṃ vādayānaḥ kvacidvane
- 12
गोपवेणुं सुमधुरं कामात्तम् अपि वादयन्
प्रह्लादनार्थं च गवां क्वचिद्वनगतो युवा
गोकुले ऽम्बुधरश्यामश्चचार द्युतिमान्प्रभुः
gopaveṇuṃ sumadhuraṃ kāmāttam api vādayan
prahlādanārthaṃ ca gavāṃ kvacidvanagato yuvā
gokule 'mbudharaśyāmaścacāra dyutimānprabhuḥ
- 13
रेमे च तत्र रम्यासु चित्रासु वनराजिषु
मयूररवघुष्टासु मदनोद्दीपनीषु च
मेघनादप्रतिव्यूहैर्नादितासु समन्ततः
reme ca tatra ramyāsu citrāsu vanarājiṣu
mayūraravaghuṣṭāsu madanoddīpanīṣu ca
meghanādaprativyūhairnāditāsu samantataḥ
- 14
शाड्वलच्छन्नमार्गासु शिलीन्ध्राभरणासु च
कन्दलामलदन्तीषु स्रवन्तीषु नवं जलम्
śāḍvalacchannamārgāsu śilīndhrābharaṇāsu ca
kandalāmaladantīṣu sravantīṣu navaṃ jalam
- 15
केसराणां नवैर्गन्धैर्मदनिःश्वसितोपमैः
अभीक्ष्णं निःश्वसन्तीषु योषित्स्व् इव समन्ततः
kesarāṇāṃ navairgandhairmadaniḥśvasitopamaiḥ
abhīkṣṇaṃ niḥśvasantīṣu yoṣitsv iva samantataḥ
- 16
सेव्यमानो नवैर्वातैर्द्रुमसंघातनिःसृतैः
तासु कृष्णो मुदं लेभे सौम्यासु वनराजिषु
sevyamāno navairvātairdrumasaṃghātaniḥsṛtaiḥ
tāsu kṛṣṇo mudaṃ lebhe saumyāsu vanarājiṣu
- 17
स कदाचिद्वने तस्मिन्गोभिः सह परिव्रजन्
ददर्श विपुलोदग्रं शाखिनं शाखिनां वरम्
sa kadācidvane tasmingobhiḥ saha parivrajan
dadarśa vipulodagraṃ śākhinaṃ śākhināṃ varam
- 18
स्थितं धरण्यां मेघाभं निबिडं पत्रसंचयैः
गगनार्धोच्छ्रिताकारं पवनाभोगकारिणं
sthitaṃ dharaṇyāṃ meghābhaṃ nibiḍaṃ patrasaṃcayaiḥ
gaganārdhocchritākāraṃ pavanābhogakāriṇaṃ
- 19
नीलचित्राङ्गवर्णैश्च सेवितं बहुभिर्द्विजैः
फलैः प्रवालैश्च घनं सेन्द्रचापघनोपमम्
nīlacitrāṅgavarṇaiśca sevitaṃ bahubhirdvijaiḥ
phalaiḥ pravālaiśca ghanaṃ sendracāpaghanopamam
- 20
भवनाकारविटपं लतापुष्पसुमण्डितम्
विशालमूलावततं पवनाम्भोदधारिणम्
bhavanākāraviṭapaṃ latāpuṣpasumaṇḍitam
viśālamūlāvatataṃ pavanāmbhodadhāriṇam
- 21
आधिपत्यम् इवान्येषां तस्य देशस्य शाखिनाम्
कुर्वाणं शुभकर्माणं तिरो वर्षन्तम् अव्ययम्
ādhipatyam ivānyeṣāṃ tasya deśasya śākhinām
kurvāṇaṃ śubhakarmāṇaṃ tiro varṣantam avyayam
- 22
न्यग्रोधं पर्वताकारं भाण्डीरं नाम नामतः
दृष्ट्वा तत्र मतिं चक्रे निवासाय दिवा प्रभुः
nyagrodhaṃ parvatākāraṃ bhāṇḍīraṃ nāma nāmataḥ
dṛṣṭvā tatra matiṃ cakre nivāsāya divā prabhuḥ
- 23
स तत्र वयसा तुल्यैर्वत्सपालैः सहानघः
रेमे वै दिवसं कृष्णः पुरा स्वर्गगतो यथा
sa tatra vayasā tulyairvatsapālaiḥ sahānaghaḥ
reme vai divasaṃ kṛṣṇaḥ purā svargagato yathā
- 24
तं क्रीडमानं गोपालाः कृष्णं भाण्डीरवासिनम्
रमयन्ति स्म बहवो वन्यैः क्रीडनकैस्तदा
taṃ krīḍamānaṃ gopālāḥ kṛṣṇaṃ bhāṇḍīravāsinam
ramayanti sma bahavo vanyaiḥ krīḍanakaistadā
- 25
अन्ये स्म परिगायन्ति गोपा मुदितमानसाः
गोपालाः कृष्णम् एवान्ये गायन्ति स्म रतिप्रियाः
anye sma parigāyanti gopā muditamānasāḥ
gopālāḥ kṛṣṇam evānye gāyanti sma ratipriyāḥ
- 26
तेषां स गायताम् एव वादयामास वीर्यवान्
पर्णवाद्यान्तरे वेणुं तुम्बीवीणां च तत्र ह
teṣāṃ sa gāyatām eva vādayāmāsa vīryavān
parṇavādyāntare veṇuṃ tumbīvīṇāṃ ca tatra ha
- 27
कदाचिच्चारयन्न् एव गाः स गोवृषभेक्षणः
जगाम यमुनातीरं लतालंकृतपादपम्
kadāciccārayann eva gāḥ sa govṛṣabhekṣaṇaḥ
jagāma yamunātīraṃ latālaṃkṛtapādapam
- 28
तरंगापाङ्गकुटिलां वारिस्पर्शसुखानिलाम्
तां च पद्मोत्पलवतीं ददर्श यमुनां नदीम्
taraṃgāpāṅgakuṭilāṃ vārisparśasukhānilām
tāṃ ca padmotpalavatīṃ dadarśa yamunāṃ nadīm
- 29
सुतीर्थां स्वादुसलिलां ह्रदिनीं वेगगामिनीम्
तोयवातोद्धतैर्वेगैर् अवनामितपादपाम्
sutīrthāṃ svādusalilāṃ hradinīṃ vegagāminīm
toyavātoddhatairvegair avanāmitapādapām
- 30
हंसकारण्डवोद्घुष्टां सारसैश्च विनादिताम्
अन्योन्यमिथुनैश्चैव सेवितां मिथुनेचरैः
haṃsakāraṇḍavodghuṣṭāṃ sārasaiśca vināditām
anyonyamithunaiścaiva sevitāṃ mithunecaraiḥ

