44 shlokas
- 1
नारद उवाच
सादिता मौरवाः पाशा निसुन्दनरकौ हतौ
कृतः क्षेमः पुनः पन्थाः पुरं प्राग्ज्योतिषं प्रति
nārada uvāca
sāditā mauravāḥ pāśā nisundanarakau hatau
kṛtaḥ kṣemaḥ punaḥ panthāḥ puraṃ prāgjyotiṣaṃ prati
- 2
शौरिणा पृथिवीपालास्त्रासिताः स्पर्धिनो युधि
धनुषश्च निनादेन पाञ्चजन्यस्वनेन च
śauriṇā pṛthivīpālāstrāsitāḥ spardhino yudhi
dhanuṣaśca ninādena pāñcajanyasvanena ca
- 3
मेघप्रख्यैर् अनीकैश्च दाक्षिणात्याभिरक्षिताम्
रुक्मिणीम् आजहाराशु केशवो वृष्णिपुंगवः
meghaprakhyair anīkaiśca dākṣiṇātyābhirakṣitām
rukmiṇīm ājahārāśu keśavo vṛṣṇipuṃgavaḥ
- 4
ततः पर्जन्यघोषेण रथेनादित्यवर्चसा
उवाह महिषीं भोजां शङ्खचक्रगदासिभृत्
tataḥ parjanyaghoṣeṇa rathenādityavarcasā
uvāha mahiṣīṃ bhojāṃ śaṅkhacakragadāsibhṛt
- 5
जारूथ्याम् आह्वृतिः क्राथः शिशुपालश्च निर्जितः
वक्त्रश्च सह सैन्येन शतधन्वा च दुर्जयः
jārūthyām āhvṛtiḥ krāthaḥ śiśupālaśca nirjitaḥ
vaktraśca saha sainyena śatadhanvā ca durjayaḥ
- 6
इन्द्रद्युम्नो हतः कोपाद्यवनश्च कशेरुमान्
हतः सौभपतिः साल्वः शौभश्च दृढधन्वना
indradyumno hataḥ kopādyavanaśca kaśerumān
hataḥ saubhapatiḥ sālvaḥ śaubhaśca dṛḍhadhanvanā
- 7
पर्वतानां सहस्रं च चक्रेण पुरुषोत्तमः
विकीर्य पुण्डरीकाक्षो द्युमत्सेनम् अपोथयत्
parvatānāṃ sahasraṃ ca cakreṇa puruṣottamaḥ
vikīrya puṇḍarīkākṣo dyumatsenam apothayat
- 8
महेन्द्रशिखरे चैव निमेषान्तरचारिणौ
जघान यो नरव्याघ्रो रावणस्याभितश्चरौ
mahendraśikhare caiva nimeṣāntaracāriṇau
jaghāna yo naravyāghro rāvaṇasyābhitaścarau
- 9
इरावत्यां महाभोजाव् अग्निसूर्यसमौ युधि
गोपतिस्तालकेतुश्च निहतौ शार्ङ्गधन्वना
irāvatyāṃ mahābhojāv agnisūryasamau yudhi
gopatistālaketuśca nihatau śārṅgadhanvanā
- 10
अक्षप्रपतने चैव निमिर्हंसश्च दानवौ
उभौ ताव् अपि कृष्णेन सराष्ट्रौ विनिपातितौ
akṣaprapatane caiva nimirhaṃsaśca dānavau
ubhau tāv api kṛṣṇena sarāṣṭrau vinipātitau
- 11
दग्धा वाराणसी चैव केशवेन महात्मना
सानुबन्धः सराष्ट्रश्च काशीनाम् अधिपो हतः
dagdhā vārāṇasī caiva keśavena mahātmanā
sānubandhaḥ sarāṣṭraśca kāśīnām adhipo hataḥ
- 12
विजित्य च यमः संख्ये शरैः संनतपर्वभिः
अथैन्द्रसेनिर् आनीतः कृष्णेनाद्भुतकर्मणा
vijitya ca yamaḥ saṃkhye śaraiḥ saṃnataparvabhiḥ
athaindrasenir ānītaḥ kṛṣṇenādbhutakarmaṇā
- 13
सहितः सर्वयादोभिः सागरेषु महाबलः
प्राप्य लोहितकूटानि कृष्णेन वरुणो जितः
sahitaḥ sarvayādobhiḥ sāgareṣu mahābalaḥ
prāpya lohitakūṭāni kṛṣṇena varuṇo jitaḥ
- 14
महेन्द्रभवने जातो देवैर्गुप्तो महात्मभिः
अचिन्तयित्वा देवेन्द्रं पारिजातद्रुमो हृतः
mahendrabhavane jāto devairgupto mahātmabhiḥ
acintayitvā devendraṃ pārijātadrumo hṛtaḥ
- 15
पाण्ड्यं पौण्ड्रं च मत्स्यं च कलिङ्गं च जनार्दनः
जघान सहितान्सर्वान्वङ्गराजं तथैव च
pāṇḍyaṃ pauṇḍraṃ ca matsyaṃ ca kaliṅgaṃ ca janārdanaḥ
jaghāna sahitānsarvānvaṅgarājaṃ tathaiva ca
- 16
एष चैकशतं हत्वा रणे राज्ञां महात्मनाम्
गान्धारीम् आवहद्धीमान्महिषीं प्रियदर्शनाम्
eṣa caikaśataṃ hatvā raṇe rājñāṃ mahātmanām
gāndhārīm āvahaddhīmānmahiṣīṃ priyadarśanām
- 17
तथा गाण्डीवधन्वानं क्रीडन्तं मधुसूदनः
जिगाय भरतश्रेष्ठं कुन्त्याः प्रमुखतो विभुः
tathā gāṇḍīvadhanvānaṃ krīḍantaṃ madhusūdanaḥ
jigāya bharataśreṣṭhaṃ kuntyāḥ pramukhato vibhuḥ
- 18
द्रोणं द्रौणिं कृपं कर्णं भीमसेनं सुयोधनम्
चक्रानुयाते सहिताञ्जिगाय पुरुषोत्तमः
droṇaṃ drauṇiṃ kṛpaṃ karṇaṃ bhīmasenaṃ suyodhanam
cakrānuyāte sahitāñjigāya puruṣottamaḥ
- 19
बभ्रोश्च प्रियम् अन्विच्छञ्शङ्खचक्रगदासिभृत्
सौवीरराजस्य सुतां प्रसह्य हृतवान्प्रभुः
babhrośca priyam anvicchañśaṅkhacakragadāsibhṛt
sauvīrarājasya sutāṃ prasahya hṛtavānprabhuḥ
- 20
पर्यस्तां पृथिवीं कृत्स्नां साश्वां सरथकुञ्जराम्
वेणुदारिकृते यत्नाज्जिगाय पुरुषोत्तमः
paryastāṃ pṛthivīṃ kṛtsnāṃ sāśvāṃ sarathakuñjarām
veṇudārikṛte yatnājjigāya puruṣottamaḥ
- 21
अवाप्य तपसो वीर्यं बलम् ओजश्च माधवः
पूर्वदेहे जहारायं बलेस्त्रिभुवनं हरिः
avāpya tapaso vīryaṃ balam ojaśca mādhavaḥ
pūrvadehe jahārāyaṃ balestribhuvanaṃ hariḥ
- 22
वज्राशनिगदाशृङ्गैस्त्रासयद्भिश्च दानवैः
यस्य नाधिगतो मृत्युः पुरं प्राग्ज्योतिषं प्रति
vajrāśanigadāśṛṅgaistrāsayadbhiśca dānavaiḥ
yasya nādhigato mṛtyuḥ puraṃ prāgjyotiṣaṃ prati
- 23
अभिभूतश्च कृष्णेन सगणः स महाबलः
बलेः पुत्रो महावीर्यो बाणो द्रविणवत्तरः
abhibhūtaśca kṛṣṇena sagaṇaḥ sa mahābalaḥ
baleḥ putro mahāvīryo bāṇo draviṇavattaraḥ
- 24
पीठं तथा महाबाहुः कंसामात्यं जनार्दनः
पैठिकं चासिलोमानं निजघान महाबलः
pīṭhaṃ tathā mahābāhuḥ kaṃsāmātyaṃ janārdanaḥ
paiṭhikaṃ cāsilomānaṃ nijaghāna mahābalaḥ
- 25
जम्भम् ऐरावतं चापि विरूपं च महायशाः
जघान पुरुषव्याघ्रः शम्बरं चारिमर्दनः
jambham airāvataṃ cāpi virūpaṃ ca mahāyaśāḥ
jaghāna puruṣavyāghraḥ śambaraṃ cārimardanaḥ
- 26
तथा नागपतिं तोये कालियं च महौजसम्
निर्जित्य पुण्डरीकाक्षः प्रेषयामास सागरम्
tathā nāgapatiṃ toye kāliyaṃ ca mahaujasam
nirjitya puṇḍarīkākṣaḥ preṣayāmāsa sāgaram
- 27
संजीवयामास मृतं पुत्रं सांदीपनेस्तथा
निर्जित्य पुरुषव्याघ्रो यमं वैवस्वतं हरिः
saṃjīvayāmāsa mṛtaṃ putraṃ sāṃdīpanestathā
nirjitya puruṣavyāghro yamaṃ vaivasvataṃ hariḥ
- 28
एवम् एष महाबाहुः शास्ता सर्वदुरात्मनाम्
evam eṣa mahābāhuḥ śāstā sarvadurātmanām
- 29
निहत्य नरकं भौमम् आहृत्य मणिकुण्डले
देवमातुर्ददौ चापि प्रीत्यर्थं वज्रपाणिनः
nihatya narakaṃ bhaumam āhṛtya maṇikuṇḍale
devamāturdadau cāpi prītyarthaṃ vajrapāṇinaḥ
- 30
एवं स देवदैत्यानां सुराणां च महायशाः
भयाभयकरः कृष्णः सर्वलोकेश्वरो विभुः
evaṃ sa devadaityānāṃ surāṇāṃ ca mahāyaśāḥ
bhayābhayakaraḥ kṛṣṇaḥ sarvalokeśvaro vibhuḥ

