11 shlokas
- 1
मार्कण्डेय उवाच
ततस्तं चक्रवाकौ द्वाव् ऊचतुः सहचारिणौ
आवां ते सचिवौ स्याव तव प्रियहितैषिणौ
mārkaṇḍeya uvāca
tatastaṃ cakravākau dvāv ūcatuḥ sahacāriṇau
āvāṃ te sacivau syāva tava priyahitaiṣiṇau
- 2
तथेत्य् उक्त्वा च तस्यासीत्तदा योगात्मनो मतिः
एवं ते समयं चक्रुः सुवाक्तं प्रत्यभाषत
tathety uktvā ca tasyāsīttadā yogātmano matiḥ
evaṃ te samayaṃ cakruḥ suvāktaṃ pratyabhāṣata
- 3
यस्मात्कामप्रधानस्त्वं योगधर्मम् अपास्य वै
अवरं वरं प्रार्थयसे तस्माद्वाक्यं निबोध मे
yasmātkāmapradhānastvaṃ yogadharmam apāsya vai
avaraṃ varaṃ prārthayase tasmādvākyaṃ nibodha me
- 4
राजा त्वं भविता तात काम्पिल्ये नगरोत्तमे
भविष्यतः सखायौ च द्वाव् इमौ सचिवौ तव
rājā tvaṃ bhavitā tāta kāmpilye nagarottame
bhaviṣyataḥ sakhāyau ca dvāv imau sacivau tava
- 5
शप्त्वा तान् अभिभाष्याथ चत्वारश्चक्रुर् अण्डजाः
तांस्त्रीन् अभीप्सतो राज्यं व्यभिचारप्रधर्षितान्
śaptvā tān abhibhāṣyātha catvāraścakrur aṇḍajāḥ
tāṃstrīn abhīpsato rājyaṃ vyabhicārapradharṣitān
- 6
शप्ताः खगास्त्रयस्ते तु योगभ्रष्टा विचेतसः
तान् अयाचन्त चतुरस्त्रयस्ते सहचारिणः
śaptāḥ khagāstrayaste tu yogabhraṣṭā vicetasaḥ
tān ayācanta caturastrayaste sahacāriṇaḥ
- 7
तेषां प्रसादं चक्रुस्ते अथैतान्सुमनाब्रवीत्
सर्वेषाम् एव वचनात्प्रसादानुगतं तदा
teṣāṃ prasādaṃ cakruste athaitānsumanābravīt
sarveṣām eva vacanātprasādānugataṃ tadā
- 8
अन्तवान्भविता शापो युष्माकं नात्र संशयः
इतश्च्युताश्च मानुष्यं प्राप्य योगम् अवाप्स्यथ
antavānbhavitā śāpo yuṣmākaṃ nātra saṃśayaḥ
itaścyutāśca mānuṣyaṃ prāpya yogam avāpsyatha
- 9
सर्वसत्त्वरुतज्ञश्च स्वतन्त्रो ऽयं भविष्यति
पितृप्रसादो ह्य् अस्माभिर् अस्य प्राप्तः कृतेन वै
sarvasattvarutajñaśca svatantro 'yaṃ bhaviṣyati
pitṛprasādo hy asmābhir asya prāptaḥ kṛtena vai
- 10
गां प्रोक्षयित्वा धर्मेण पितृभ्य उपकल्पताम्
अस्माकं ज्ञानसंयोगः सर्वेषां योगसाधनः
gāṃ prokṣayitvā dharmeṇa pitṛbhya upakalpatām
asmākaṃ jñānasaṃyogaḥ sarveṣāṃ yogasādhanaḥ
- 11
इदं च वाक्यसंदर्भश्लोकम् एकम् उदाहृतम्
पुरुषान्तरितं श्रुत्वा ततो योगम् अवाप्स्यथ
idaṃ ca vākyasaṃdarbhaślokam ekam udāhṛtam
puruṣāntaritaṃ śrutvā tato yogam avāpsyatha

