13 shlokas
- 1
वैशंपायन उवाच
अथ गावल्गणिर्धीमान्समराद् एत्य संजयः
प्रत्यक्षदर्शी सर्वस्य भूतभव्यभविष्यवित्
vaiśaṃpāyana uvāca
atha gāvalgaṇirdhīmānsamarād etya saṃjayaḥ
pratyakṣadarśī sarvasya bhūtabhavyabhaviṣyavit
- 2
ध्यायते धृतराष्ट्राय सहसोपेत्य दुःखितः
आचष्ट निहतं भीष्मं भरतानाम् अमध्यमम्
dhyāyate dhṛtarāṣṭrāya sahasopetya duḥkhitaḥ
ācaṣṭa nihataṃ bhīṣmaṃ bharatānām amadhyamam
- 3
संजयो ऽहं महाराज नमस्ते भरतर्षभ
हतो भीष्मः शांतनवो भरतानां पितामहः
saṃjayo 'haṃ mahārāja namaste bharatarṣabha
hato bhīṣmaḥ śāṃtanavo bharatānāṃ pitāmahaḥ
- 4
ककुदं सर्वयोधानां धाम सर्वधनुष्मताम्
शरतल्पगतः सो ऽद्य शेते कुरुपितामहः
kakudaṃ sarvayodhānāṃ dhāma sarvadhanuṣmatām
śaratalpagataḥ so 'dya śete kurupitāmahaḥ
- 5
यस्य वीर्यं समाश्रित्य द्यूतं पुत्रस्तवाकरोत्
स शेते निहतो राजन्संख्ये भीष्मः शिखण्डिना
yasya vīryaṃ samāśritya dyūtaṃ putrastavākarot
sa śete nihato rājansaṃkhye bhīṣmaḥ śikhaṇḍinā
- 6
यः सर्वान्पृथिवीपालान्समवेतान्महामृधे
जिगायैकरथेनैव काशिपुर्यां महारथः
yaḥ sarvānpṛthivīpālānsamavetānmahāmṛdhe
jigāyaikarathenaiva kāśipuryāṃ mahārathaḥ
- 7
जामदग्न्यं रणे रामम् आयोध्य वसुसंभवः
न हतो जामदग्न्येन स हतो ऽद्य शिखण्डिना
jāmadagnyaṃ raṇe rāmam āyodhya vasusaṃbhavaḥ
na hato jāmadagnyena sa hato 'dya śikhaṇḍinā
- 8
महेन्द्रसदृशः शौर्ये स्थैर्ये च हिमवान् इव
समुद्र इव गाम्भीर्ये सहिष्णुत्वे धरासमः
mahendrasadṛśaḥ śaurye sthairye ca himavān iva
samudra iva gāmbhīrye sahiṣṇutve dharāsamaḥ
- 9
शरदंष्ट्रो धनुर्वक्त्रः खड्गजिह्वो दुरासदः
नरसिंहः पिता ते ऽद्य पाञ्चाल्येन निपातितः
śaradaṃṣṭro dhanurvaktraḥ khaḍgajihvo durāsadaḥ
narasiṃhaḥ pitā te 'dya pāñcālyena nipātitaḥ
- 10
पाण्डवानां महत्सैन्यं यं दृष्ट्वोद्यन्तम् आहवे
प्रवेपत भयोद्विग्नं सिंहं दृष्ट्वेव गोगणः
pāṇḍavānāṃ mahatsainyaṃ yaṃ dṛṣṭvodyantam āhave
pravepata bhayodvignaṃ siṃhaṃ dṛṣṭveva gogaṇaḥ
- 11
परिरक्ष्य स सेनां ते दशरात्रम् अनीकहा
जगामास्तम् इवादित्यः कृत्वा कर्म सुदुष्करम्
parirakṣya sa senāṃ te daśarātram anīkahā
jagāmāstam ivādityaḥ kṛtvā karma suduṣkaram
- 12
यः स शक्र इवाक्षोभ्यो वर्षन्बाणान्सहस्रशः
जघान युधि योधानाम् अर्बुदं दशभिर्दिनैः
yaḥ sa śakra ivākṣobhyo varṣanbāṇānsahasraśaḥ
jaghāna yudhi yodhānām arbudaṃ daśabhirdinaiḥ
- 13
स शेते निष्टनन्भूमौ वातरुग्ण इव द्रुमः
तव दुर्मन्त्रिते राजन्यथा नार्हः स भारत
sa śete niṣṭananbhūmau vātarugṇa iva drumaḥ
tava durmantrite rājanyathā nārhaḥ sa bhārata

