21 shlokas
- 1
वैशंपायन उवाच
समागतान्वेदविदो राज्ञश्च पृथिवीश्वरान्
दृष्ट्वा युधिष्ठिरो राजा भीमसेनम् अथाब्रवीत्
vaiśaṃpāyana uvāca
samāgatānvedavido rājñaśca pṛthivīśvarān
dṛṣṭvā yudhiṣṭhiro rājā bhīmasenam athābravīt
- 2
उपयाता नरव्याघ्रा य इमे जगदीश्वराः
एतेषां क्रियतां पूजा पूजार्हा हि नरेश्वराः
upayātā naravyāghrā ya ime jagadīśvarāḥ
eteṣāṃ kriyatāṃ pūjā pūjārhā hi nareśvarāḥ
- 3
इत्युक्तः स तथा चक्रे नरेन्द्रेण यशस्विना
भीमसेनो महातेजा यमाभ्यां सह भारत
ityuktaḥ sa tathā cakre narendreṇa yaśasvinā
bhīmaseno mahātejā yamābhyāṃ saha bhārata
- 4
अथाभ्यगच्छद्गोविन्दो वृष्णिभिः सह धर्मजम्
बलदेवं पुरस्कृत्य सर्वप्राणभृतां वरः
athābhyagacchadgovindo vṛṣṇibhiḥ saha dharmajam
baladevaṃ puraskṛtya sarvaprāṇabhṛtāṃ varaḥ
- 5
युयुधानेन सहितः प्रद्युम्नेन गदेन च
निशठेनाथ साम्बेन तथैव कृतवर्मणा
yuyudhānena sahitaḥ pradyumnena gadena ca
niśaṭhenātha sāmbena tathaiva kṛtavarmaṇā
- 6
तेषाम् अपि परां पूजां चक्रे भीमो महाभुजः
विविशुस्ते च वेश्मानि रत्नवन्ति नरर्षभाः
teṣām api parāṃ pūjāṃ cakre bhīmo mahābhujaḥ
viviśuste ca veśmāni ratnavanti nararṣabhāḥ
- 7
युधिष्ठिरसमीपे तु कथान्ते मधुसूदनः
अर्जुनं कथयामास बहुसंग्रामकर्शितम्
yudhiṣṭhirasamīpe tu kathānte madhusūdanaḥ
arjunaṃ kathayāmāsa bahusaṃgrāmakarśitam
- 8
स तं पप्रच्छ कौन्तेयः पुनः पुनर् अरिंदमम्
धर्मराड्भ्रातरं जिष्णुं समाचष्ट जगत्पतिः
sa taṃ papraccha kaunteyaḥ punaḥ punar ariṃdamam
dharmarāḍbhrātaraṃ jiṣṇuṃ samācaṣṭa jagatpatiḥ
- 9
आगमद्द्वारकावासी ममाप्तः पुरुषो नृप
यो ऽद्राक्षीत्पाण्डवश्रेष्ठं बहुसंग्रामकर्शितम्
āgamaddvārakāvāsī mamāptaḥ puruṣo nṛpa
yo 'drākṣītpāṇḍavaśreṣṭhaṃ bahusaṃgrāmakarśitam
- 10
समीपे च महाबाहुम् आचष्ट च मम प्रभो
कुरु कार्याणि कौन्तेय हयमेधार्थसिद्धये
samīpe ca mahābāhum ācaṣṭa ca mama prabho
kuru kāryāṇi kaunteya hayamedhārthasiddhaye
- 11
इत्युक्तः प्रत्युवाचैनं धर्मराजो युधिष्ठिरः
दिष्ट्या स कुशली जिष्णुर् उपयाति च माधव
ityuktaḥ pratyuvācainaṃ dharmarājo yudhiṣṭhiraḥ
diṣṭyā sa kuśalī jiṣṇur upayāti ca mādhava
- 12
तव यत्संदिदेशासौ पाण्डवानां बलाग्रणीः
तद् आख्यातुम् इहेच्छामि भवता यदुनन्दन
tava yatsaṃdideśāsau pāṇḍavānāṃ balāgraṇīḥ
tad ākhyātum ihecchāmi bhavatā yadunandana
- 13
इत्युक्ते राजशार्दूल वृष्ण्यन्धकपतिस्तदा
प्रोवाचेदं वचो वाग्मी धर्मात्मानं युधिष्ठिरम्
ityukte rājaśārdūla vṛṣṇyandhakapatistadā
provācedaṃ vaco vāgmī dharmātmānaṃ yudhiṣṭhiram
- 14
इदम् आह महाराज पार्थवाक्यं नरः स माम्
वाच्यो युधिष्ठिरः कृष्ण काले वाक्यम् इदं मम
idam āha mahārāja pārthavākyaṃ naraḥ sa mām
vācyo yudhiṣṭhiraḥ kṛṣṇa kāle vākyam idaṃ mama
- 15
आगमिष्यन्ति राजानः सर्वतः कौरवान्प्रति
तेषाम् एकैकशः पूजा कार्येत्येतत्क्षमं हि नः
āgamiṣyanti rājānaḥ sarvataḥ kauravānprati
teṣām ekaikaśaḥ pūjā kāryetyetatkṣamaṃ hi naḥ
- 16
इत्येतद्वचनाद्राजा विज्ञाप्यो मम मानद
न तद् आत्ययिकं हि स्याद्यद् अर्घ्यानयने भवेत्
ityetadvacanādrājā vijñāpyo mama mānada
na tad ātyayikaṃ hi syādyad arghyānayane bhavet
- 17
कर्तुम् अर्हति तद्राजा भवांश्चाप्यनुमन्यताम्
राजद्वेषाद्विनश्येयुर्नेमा राजन्प्रजाः पुनः
kartum arhati tadrājā bhavāṃścāpyanumanyatām
rājadveṣādvinaśyeyurnemā rājanprajāḥ punaḥ
- 18
इदम् अन्यच्च कौन्तेय वचः स पुरुषो ऽब्रवीत्
धनंजयस्य नृपते तन्मे निगदतः शृणु
idam anyacca kaunteya vacaḥ sa puruṣo 'bravīt
dhanaṃjayasya nṛpate tanme nigadataḥ śṛṇu
- 19
उपयास्यति यज्ञं नो मणिपूरपतिर्नृपः
पुत्रो मम महातेजा दयितो बभ्रुवाहनः
upayāsyati yajñaṃ no maṇipūrapatirnṛpaḥ
putro mama mahātejā dayito babhruvāhanaḥ
- 20
तं भवान्मदपेक्षार्थं विधिवत्प्रतिपूजयेत्
स हि भक्तो ऽनुरक्तश्च मम नित्यम् इति प्रभो
taṃ bhavānmadapekṣārthaṃ vidhivatpratipūjayet
sa hi bhakto 'nuraktaśca mama nityam iti prabho
- 21
इत्येतद्वचनं श्रुत्वा धर्मराजो युधिष्ठिरः
अभिनन्द्यास्य तद्वाक्यम् इदं वचनम् अब्रवीत्
ityetadvacanaṃ śrutvā dharmarājo yudhiṣṭhiraḥ
abhinandyāsya tadvākyam idaṃ vacanam abravīt

