35 shlokas
- 1
संवर्त उवाच
गिरेर्हिमवतः पृष्ठे मुञ्जवान्नाम पर्वतः
तप्यते यत्र भगवांस्तपो नित्यम् उमापतिः
saṃvarta uvāca
girerhimavataḥ pṛṣṭhe muñjavānnāma parvataḥ
tapyate yatra bhagavāṃstapo nityam umāpatiḥ
- 2
वनस्पतीनां मूलेषु टङ्केषु शिखरेषु च
गुहासु शैलराजस्य यथाकामं यथासुखम्
vanaspatīnāṃ mūleṣu ṭaṅkeṣu śikhareṣu ca
guhāsu śailarājasya yathākāmaṃ yathāsukham
- 3
उमासहायो भगवान्यत्र नित्यं महेश्वरः
आस्ते शूली महातेजा नानाभूतगणावृतः
umāsahāyo bhagavānyatra nityaṃ maheśvaraḥ
āste śūlī mahātejā nānābhūtagaṇāvṛtaḥ
- 4
तत्र रुद्राश्च साध्याश्च विश्वे ऽथ वसवस्तथा
यमश्च वरुणश्चैव कुबेरश्च सहानुगः
tatra rudrāśca sādhyāśca viśve 'tha vasavastathā
yamaśca varuṇaścaiva kuberaśca sahānugaḥ
- 5
भूतानि च पिशाचाश्च नासत्यावश्विनावपि
गन्धर्वाप्सरसश्चैव यक्षा देवर्षयस्तथा
bhūtāni ca piśācāśca nāsatyāvaśvināvapi
gandharvāpsarasaścaiva yakṣā devarṣayastathā
- 6
आदित्या मरुतश्चैव यातुधानाश्च सर्वशः
उपासन्ते महात्मानं बहुरूपम् उमापतिम्
ādityā marutaścaiva yātudhānāśca sarvaśaḥ
upāsante mahātmānaṃ bahurūpam umāpatim
- 7
रमते भगवांस्तत्र कुबेरानुचरैः सह
विकृतैर्विकृताकारैः क्रीडद्भिः पृथिवीपते
श्रिया ज्वलन्दृश्यते वै बालादित्यसमद्युतिः
ramate bhagavāṃstatra kuberānucaraiḥ saha
vikṛtairvikṛtākāraiḥ krīḍadbhiḥ pṛthivīpate
śriyā jvalandṛśyate vai bālādityasamadyutiḥ
- 8
न रूपं दृश्यते तस्य संस्थानं वा कथंचन
निर्देष्टुं प्राणिभिः कैश्चित्प्राकृतैर्मांसलोचनैः
na rūpaṃ dṛśyate tasya saṃsthānaṃ vā kathaṃcana
nirdeṣṭuṃ prāṇibhiḥ kaiścitprākṛtairmāṃsalocanaiḥ
- 9
नोष्णं न शिशिरं तत्र न वायुर्न च भास्करः
न जरा क्षुत्पिपासे वा न मृत्युर्न भयं नृप
noṣṇaṃ na śiśiraṃ tatra na vāyurna ca bhāskaraḥ
na jarā kṣutpipāse vā na mṛtyurna bhayaṃ nṛpa
- 10
तस्य शैलस्य पार्श्वेषु सर्वेषु जयतां वर
धातवो जातरूपस्य रश्मयः सवितुर्यथा
tasya śailasya pārśveṣu sarveṣu jayatāṃ vara
dhātavo jātarūpasya raśmayaḥ savituryathā
- 11
रक्ष्यन्ते ते कुबेरस्य सहायैर् उद्यतायुधैः
चिकीर्षद्भिः प्रियं राजन्कुबेरस्य महात्मनः
rakṣyante te kuberasya sahāyair udyatāyudhaiḥ
cikīrṣadbhiḥ priyaṃ rājankuberasya mahātmanaḥ
- 12
तस्मै भगवते कृत्वा नमः शर्वाय वेधसे
रुद्राय शितिकण्ठाय सुरूपाय सुवर्चसे
tasmai bhagavate kṛtvā namaḥ śarvāya vedhase
rudrāya śitikaṇṭhāya surūpāya suvarcase
- 13
कपर्दिने करालाय हर्यक्ष्णे वरदाय च
त्र्यक्ष्णे पूष्णो दन्तभिदे वामनाय शिवाय च
kapardine karālāya haryakṣṇe varadāya ca
tryakṣṇe pūṣṇo dantabhide vāmanāya śivāya ca
- 14
याम्यायाव्यक्तकेशाय सद्वृत्ते शंकराय च
क्षेम्याय हरिनेत्राय स्थाणवे पुरुषाय च
yāmyāyāvyaktakeśāya sadvṛtte śaṃkarāya ca
kṣemyāya harinetrāya sthāṇave puruṣāya ca
- 15
हरिकेशाय मुण्डाय कृशायोत्तारणाय च
भास्कराय सुतीर्थाय देवदेवाय रंहसे
harikeśāya muṇḍāya kṛśāyottāraṇāya ca
bhāskarāya sutīrthāya devadevāya raṃhase
- 16
उष्णीषिणे सुवक्त्राय सहस्राक्षाय मीढुषे
गिरिशाय प्रशान्ताय यतये चीरवाससे
uṣṇīṣiṇe suvaktrāya sahasrākṣāya mīḍhuṣe
giriśāya praśāntāya yataye cīravāsase
- 17
बिल्वदण्डाय सिद्धाय सर्वदण्डधराय च
मृगव्याधाय महते धन्विने ऽथ भवाय च
bilvadaṇḍāya siddhāya sarvadaṇḍadharāya ca
mṛgavyādhāya mahate dhanvine 'tha bhavāya ca
- 18
वराय सौम्यवक्त्राय पशुहस्ताय वर्षिणे
हिरण्यबाहवे राजन्न् उग्राय पतये दिशाम्
varāya saumyavaktrāya paśuhastāya varṣiṇe
hiraṇyabāhave rājann ugrāya pataye diśām
- 19
पशूनां पतये चैव भूतानां पतये तथा
वृषाय मातृभक्ताय सेनान्ये मध्यमाय च
paśūnāṃ pataye caiva bhūtānāṃ pataye tathā
vṛṣāya mātṛbhaktāya senānye madhyamāya ca
- 20
स्रुवहस्ताय पतये धन्विने भार्गवाय च
अजाय कृष्णनेत्राय विरूपाक्षाय चैव ह
sruvahastāya pataye dhanvine bhārgavāya ca
ajāya kṛṣṇanetrāya virūpākṣāya caiva ha
- 21
तीक्ष्णदंष्ट्राय तीक्ष्णाय वैश्वानरमुखाय च
महाद्युतये ऽनङ्गाय सर्वाङ्गाय प्रजावते
tīkṣṇadaṃṣṭrāya tīkṣṇāya vaiśvānaramukhāya ca
mahādyutaye 'naṅgāya sarvāṅgāya prajāvate
- 22
तथा शुक्राधिपतये पृथवे कृत्तिवाससे
कपालमालिने नित्यं सुवर्णमुकुटाय च
tathā śukrādhipataye pṛthave kṛttivāsase
kapālamāline nityaṃ suvarṇamukuṭāya ca
- 23
महादेवाय कृष्णाय त्र्यम्बकायानघाय च
क्रोधनाय नृशंसाय मृदवे बाहुशालिने
mahādevāya kṛṣṇāya tryambakāyānaghāya ca
krodhanāya nṛśaṃsāya mṛdave bāhuśāline
- 24
दण्डिने तप्ततपसे तथैव क्रूरकर्मणे
सहस्रशिरसे चैव सहस्रचरणाय च
नमः स्वधास्वरूपाय बहुरूपाय दंष्ट्रिणे
daṇḍine taptatapase tathaiva krūrakarmaṇe
sahasraśirase caiva sahasracaraṇāya ca
namaḥ svadhāsvarūpāya bahurūpāya daṃṣṭriṇe
- 25
पिनाकिनं महादेवं महायोगिनम् अव्ययम्
त्रिशूलपाणिं वरदं त्र्यम्बकं भुवनेश्वरम्
pinākinaṃ mahādevaṃ mahāyoginam avyayam
triśūlapāṇiṃ varadaṃ tryambakaṃ bhuvaneśvaram
- 26
त्रिपुरघ्नं त्रिनयनं त्रिलोकेशं महौजसम्
प्रभवं सर्वभूतानां धारणं धरणीधरम्
tripuraghnaṃ trinayanaṃ trilokeśaṃ mahaujasam
prabhavaṃ sarvabhūtānāṃ dhāraṇaṃ dharaṇīdharam
- 27
ईशानं शंकरं सर्वं शिवं विश्वेश्वरं भवम्
उमापतिं पशुपतिं विश्वरूपं महेश्वरम्
īśānaṃ śaṃkaraṃ sarvaṃ śivaṃ viśveśvaraṃ bhavam
umāpatiṃ paśupatiṃ viśvarūpaṃ maheśvaram
- 28
विरूपाक्षं दशभुजं तिष्यगोवृषभध्वजम्
उग्रं स्थाणुं शिवं घोरं शर्वं गौरीशम् ईश्वरम्
virūpākṣaṃ daśabhujaṃ tiṣyagovṛṣabhadhvajam
ugraṃ sthāṇuṃ śivaṃ ghoraṃ śarvaṃ gaurīśam īśvaram
- 29
शितिकण्ठम् अजं शुक्रं पृथुं पृथुहरं हरम्
विश्वरूपं विरूपाक्षं बहुरूपम् उमापतिम्
śitikaṇṭham ajaṃ śukraṃ pṛthuṃ pṛthuharaṃ haram
viśvarūpaṃ virūpākṣaṃ bahurūpam umāpatim
- 30
प्रणम्य शिरसा देवम् अनङ्गाङ्गहरं हरम्
शरण्यं शरणं याहि महादेवं चतुर्मुखम्
praṇamya śirasā devam anaṅgāṅgaharaṃ haram
śaraṇyaṃ śaraṇaṃ yāhi mahādevaṃ caturmukham

