5 shlokas
- 1
ब्रह्मोवाच
य उत्पन्नो महान्पूर्वम् अहंकारः स उच्यते
अहम् इत्येव सम्भूतो द्वितीयः सर्ग उच्यते
brahmovāca
ya utpanno mahānpūrvam ahaṃkāraḥ sa ucyate
aham ityeva sambhūto dvitīyaḥ sarga ucyate
- 2
अहंकारश्च भूतादिर्वैकारिक इति स्मृतः
तेजसश्चेतना धातुः प्रजासर्गः प्रजापतिः
ahaṃkāraśca bhūtādirvaikārika iti smṛtaḥ
tejasaścetanā dhātuḥ prajāsargaḥ prajāpatiḥ
- 3
देवानां प्रभवो देवो मनसश्च त्रिलोककृत्
अहम् इत्येव तत्सर्वम् अभिमन्ता स उच्यते
devānāṃ prabhavo devo manasaśca trilokakṛt
aham ityeva tatsarvam abhimantā sa ucyate
- 4
अध्यात्मज्ञाननित्यानां मुनीनां भावितात्मनाम्
स्वाध्यायक्रतुसिद्धानाम् एष लोकः सनातनः
adhyātmajñānanityānāṃ munīnāṃ bhāvitātmanām
svādhyāyakratusiddhānām eṣa lokaḥ sanātanaḥ
- 5
अहंकारेणाहरतो गुणान् इमान्भूतादिर् एवं सृजते स भूतकृत्
वैकारिकः सर्वम् इदं विचेष्टते स्वतेजसा रञ्जयते जगत्तथा
ahaṃkāreṇāharato guṇān imānbhūtādir evaṃ sṛjate sa bhūtakṛt
vaikārikaḥ sarvam idaṃ viceṣṭate svatejasā rañjayate jagattathā

