17 shlokas
- 1
वैशंपायन उवाच
ततस्ते प्रययुर्हृष्टाः प्रहृष्टनरवाहनाः
रथघोषेण महता पूरयन्तो वसुंधराम्
vaiśaṃpāyana uvāca
tataste prayayurhṛṣṭāḥ prahṛṣṭanaravāhanāḥ
rathaghoṣeṇa mahatā pūrayanto vasuṃdharām
- 2
संस्तूयमानाः स्तुतिभिः सूतमागधबन्दिभिः
स्वेन सैन्येन संवीता यथादित्याः स्वरश्मिभिः
saṃstūyamānāḥ stutibhiḥ sūtamāgadhabandibhiḥ
svena sainyena saṃvītā yathādityāḥ svaraśmibhiḥ
- 3
पाण्डुरेणातपत्रेण ध्रियमाणेन मूर्धनि
बभौ युधिष्ठिरस्तत्र पौर्णमास्याम् इवोडुराट्
pāṇḍureṇātapatreṇa dhriyamāṇena mūrdhani
babhau yudhiṣṭhirastatra paurṇamāsyām ivoḍurāṭ
- 4
जयाशिषः प्रहृष्टानां नराणां पथि पाण्डवः
प्रत्यगृह्णाद्यथान्यायं यथावत्पुरुषर्षभः
jayāśiṣaḥ prahṛṣṭānāṃ narāṇāṃ pathi pāṇḍavaḥ
pratyagṛhṇādyathānyāyaṃ yathāvatpuruṣarṣabhaḥ
- 5
तथैव सैनिका राजन्राजानम् अनुयान्ति ये
तेषां हलहलाशब्दो दिवं स्तब्ध्वा व्यतिष्ठत
tathaiva sainikā rājanrājānam anuyānti ye
teṣāṃ halahalāśabdo divaṃ stabdhvā vyatiṣṭhata
- 6
स सरांसि नदीश्चैव वनान्युपवनानि च
अत्यक्रामन्महाराजो गिरिं चैवान्वपद्यत
sa sarāṃsi nadīścaiva vanānyupavanāni ca
atyakrāmanmahārājo giriṃ caivānvapadyata
- 7
तस्मिन्देशे च राजेन्द्र यत्र तद्द्रव्यम् उत्तमम्
चक्रे निवेशनं राजा पाण्डवः सह सैनिकैः
शिवे देशे समे चैव तदा भरतसत्तम
tasmindeśe ca rājendra yatra taddravyam uttamam
cakre niveśanaṃ rājā pāṇḍavaḥ saha sainikaiḥ
śive deśe same caiva tadā bharatasattama
- 8
अग्रतो ब्राह्मणान्कृत्वा तपोविद्यादमान्वितान्
पुरोहितं च कौरव्य वेदवेदाङ्गपारगम्
agrato brāhmaṇānkṛtvā tapovidyādamānvitān
purohitaṃ ca kauravya vedavedāṅgapāragam
- 9
प्राङ्निवेशात्तु राजानं ब्राह्मणाः सपुरोधसः
कृत्वा शान्तिं यथान्यायं सर्वतः पर्यवारयन्
prāṅniveśāttu rājānaṃ brāhmaṇāḥ sapurodhasaḥ
kṛtvā śāntiṃ yathānyāyaṃ sarvataḥ paryavārayan
- 10
कृत्वा च मध्ये राजानम् अमात्यांश्च यथाविधि
षट्पथं नवसंस्थानं निवेशं चक्रिरे द्विजाः
kṛtvā ca madhye rājānam amātyāṃśca yathāvidhi
ṣaṭpathaṃ navasaṃsthānaṃ niveśaṃ cakrire dvijāḥ
- 11
मत्तानां वारणेन्द्राणां निवेशं च यथाविधि
कारयित्वा स राजेन्द्रो ब्राह्मणान् इदम् अब्रवीत्
mattānāṃ vāraṇendrāṇāṃ niveśaṃ ca yathāvidhi
kārayitvā sa rājendro brāhmaṇān idam abravīt
- 12
अस्मिन्कार्ये द्विजश्रेष्ठा नक्षत्रे दिवसे शुभे
यथा भवन्तो मन्यन्ते कर्तुम् अर्हथ तत्तथा
asminkārye dvijaśreṣṭhā nakṣatre divase śubhe
yathā bhavanto manyante kartum arhatha tattathā
- 13
न नः कालात्ययो वै स्याद् इहैव परिलम्बताम्
इति निश्चित्य विप्रेन्द्राः क्रियतां यद् अनन्तरम्
na naḥ kālātyayo vai syād ihaiva parilambatām
iti niścitya viprendrāḥ kriyatāṃ yad anantaram
- 14
श्रुत्वैतद्वचनं राज्ञो ब्राह्मणाः सपुरोधसः
इदम् ऊचुर्वचो हृष्टा धर्मराजप्रियेप्सवः
śrutvaitadvacanaṃ rājño brāhmaṇāḥ sapurodhasaḥ
idam ūcurvaco hṛṣṭā dharmarājapriyepsavaḥ
- 15
अद्यैव नक्षत्रम् अहश्च पुण्यं यतामहे श्रेष्ठतमं क्रियासु
अम्भोभिर् अद्येह वसाम राजन्न् उपोष्यतां चापि भवद्भिर् अद्य
adyaiva nakṣatram ahaśca puṇyaṃ yatāmahe śreṣṭhatamaṃ kriyāsu
ambhobhir adyeha vasāma rājann upoṣyatāṃ cāpi bhavadbhir adya
- 16
श्रुत्वा तु तेषां द्विजसत्तमानां कृतोपवासा रजनीं नरेन्द्राः
ऊषुः प्रतीताः कुशसंस्तरेषु यथाध्वरेषु ज्वलिता हव्यवाहाः
śrutvā tu teṣāṃ dvijasattamānāṃ kṛtopavāsā rajanīṃ narendrāḥ
ūṣuḥ pratītāḥ kuśasaṃstareṣu yathādhvareṣu jvalitā havyavāhāḥ
- 17
ततो निशा सा व्यगमन्महात्मनां संशृण्वतां विप्रसमीरिता गिरः
ततः प्रभाते विमले द्विजर्षभा वचो ऽब्रुवन्धर्मसुतं नराधिपम्
tato niśā sā vyagamanmahātmanāṃ saṃśṛṇvatāṃ viprasamīritā giraḥ
tataḥ prabhāte vimale dvijarṣabhā vaco 'bruvandharmasutaṃ narādhipam

