20 shlokas
- 1
जनमेजय उवाच
उत्तङ्काय वरं दत्त्वा गोविन्दो द्विजसत्तम
अत ऊर्ध्वं महाबाहुः किं चकार महायशाः
janamejaya uvāca
uttaṅkāya varaṃ dattvā govindo dvijasattama
ata ūrdhvaṃ mahābāhuḥ kiṃ cakāra mahāyaśāḥ
- 2
वैशंपायन उवाच
दत्त्वा वरम् उत्तङ्काय प्रायात्सात्यकिना सह
द्वारकाम् एव गोविन्दः शीघ्रवेगैर्महाहयैः
vaiśaṃpāyana uvāca
dattvā varam uttaṅkāya prāyātsātyakinā saha
dvārakām eva govindaḥ śīghravegairmahāhayaiḥ
- 3
सरांसि च नदीश्चैव वनानि विविधानि च
अतिक्रम्य ससादाथ रम्यां द्वारवतीं पुरीम्
sarāṃsi ca nadīścaiva vanāni vividhāni ca
atikramya sasādātha ramyāṃ dvāravatīṃ purīm
- 4
वर्तमाने महाराज महे रैवतकस्य च
उपायात्पुण्डरीकाक्षो युयुधानानुगस्तदा
vartamāne mahārāja mahe raivatakasya ca
upāyātpuṇḍarīkākṣo yuyudhānānugastadā
- 5
अलंकृतस्तु स गिरिर्नानारूपविचित्रितैः
बभौ रुक्ममयैः काशैः सर्वतः पुरुषर्षभ
alaṃkṛtastu sa girirnānārūpavicitritaiḥ
babhau rukmamayaiḥ kāśaiḥ sarvataḥ puruṣarṣabha
- 6
काञ्चनस्रग्भिर् अग्र्याभिः सुमनोभिस्तथैव च
वासोभिश्च महाशैलः कल्पवृक्षैश्च सर्वशः
kāñcanasragbhir agryābhiḥ sumanobhistathaiva ca
vāsobhiśca mahāśailaḥ kalpavṛkṣaiśca sarvaśaḥ
- 7
दीपवृक्षैश्च सौवर्णैर् अभीक्ष्णम् उपशोभितः
गुहानिर्झरदेशेषु दिवाभूतो बभूव ह
dīpavṛkṣaiśca sauvarṇair abhīkṣṇam upaśobhitaḥ
guhānirjharadeśeṣu divābhūto babhūva ha
- 8
पताकाभिर्विचित्राभिः सघण्टाभिः समन्ततः
पुंभिः स्त्रीभिश्च संघुष्टः प्रगीत इव चाभवत्
अतीव प्रेक्षणीयो ऽभून्मेरुर्मुनिगणैर् इव
patākābhirvicitrābhiḥ saghaṇṭābhiḥ samantataḥ
puṃbhiḥ strībhiśca saṃghuṣṭaḥ pragīta iva cābhavat
atīva prekṣaṇīyo 'bhūnmerurmunigaṇair iva
- 9
मत्तानां हृष्टरूपाणां स्त्रीणां पुंसां च भारत
गायतां पर्वतेन्द्रस्य दिवस्पृग् इव निस्वनः
mattānāṃ hṛṣṭarūpāṇāṃ strīṇāṃ puṃsāṃ ca bhārata
gāyatāṃ parvatendrasya divaspṛg iva nisvanaḥ
- 10
प्रमत्तमत्तसंमत्तक्ष्वेडितोत्कृष्टसंकुला
तथा किलकिलाशब्दैर्भूर् अभूत्सुमनोहरा
pramattamattasaṃmattakṣveḍitotkṛṣṭasaṃkulā
tathā kilakilāśabdairbhūr abhūtsumanoharā
- 11
विपणापणवान्रम्यो भक्ष्यभोज्यविहारवान्
वस्त्रमाल्योत्करयुतो वीणावेणुमृदङ्गवान्
vipaṇāpaṇavānramyo bhakṣyabhojyavihāravān
vastramālyotkarayuto vīṇāveṇumṛdaṅgavān
- 12
सुरामैरेयमिश्रेण भक्ष्यभोज्येन चैव ह
दीनान्धकृपणादिभ्यो दीयमानेन चानिशम्
बभौ परमकल्याणो महस्तस्य महागिरेः
surāmaireyamiśreṇa bhakṣyabhojyena caiva ha
dīnāndhakṛpaṇādibhyo dīyamānena cāniśam
babhau paramakalyāṇo mahastasya mahāgireḥ
- 13
पुण्यावसथवान्वीर पुण्यकृद्भिर्निषेवितः
विहारो वृष्णिवीराणां महे रैवतकस्य ह
स नगो वेश्मसंकीर्णो देवलोक इवाबभौ
puṇyāvasathavānvīra puṇyakṛdbhirniṣevitaḥ
vihāro vṛṣṇivīrāṇāṃ mahe raivatakasya ha
sa nago veśmasaṃkīrṇo devaloka ivābabhau
- 14
तदा च कृष्णसांनिध्यम् आसाद्य भरतर्षभ
शक्रसद्मप्रतीकाशो बभूव स हि शैलराट्
tadā ca kṛṣṇasāṃnidhyam āsādya bharatarṣabha
śakrasadmapratīkāśo babhūva sa hi śailarāṭ
- 15
ततः सम्पूज्यमानः स विवेश भवनं शुभम्
गोविन्दः सात्यकिश्चैव जगाम भवनं स्वकम्
tataḥ sampūjyamānaḥ sa viveśa bhavanaṃ śubham
govindaḥ sātyakiścaiva jagāma bhavanaṃ svakam
- 16
विवेश च स हृष्टात्मा चिरकालप्रवासकः
कृत्वा नसुकरं कर्म दानवेष्विव वासवः
viveśa ca sa hṛṣṭātmā cirakālapravāsakaḥ
kṛtvā nasukaraṃ karma dānaveṣviva vāsavaḥ
- 17
उपयातं तु वार्ष्णेयं भोजवृष्ण्यन्धकास्तदा
अभ्यगच्छन्महात्मानं देवा इव शतक्रतुम्
upayātaṃ tu vārṣṇeyaṃ bhojavṛṣṇyandhakāstadā
abhyagacchanmahātmānaṃ devā iva śatakratum
- 18
स तान् अभ्यर्च्य मेधावी पृष्ट्वा च कुशलं तदा
अभ्यवादयत प्रीतः पितरं मातरं तथा
sa tān abhyarcya medhāvī pṛṣṭvā ca kuśalaṃ tadā
abhyavādayata prītaḥ pitaraṃ mātaraṃ tathā
- 19
ताभ्यां च सम्परिष्वक्तः सान्त्वितश्च महाभुजः
उपोपविष्टस्तैः सर्वैर्वृष्णिभिः परिवारितः
tābhyāṃ ca sampariṣvaktaḥ sāntvitaśca mahābhujaḥ
upopaviṣṭastaiḥ sarvairvṛṣṇibhiḥ parivāritaḥ
- 20
स विश्रान्तो महातेजाः कृतपादावसेचनः
कथयामास तं कृष्णः पृष्टः पित्रा महाहवम्
sa viśrānto mahātejāḥ kṛtapādāvasecanaḥ
kathayāmāsa taṃ kṛṣṇaḥ pṛṣṭaḥ pitrā mahāhavam

