21 shlokas
- 1
अध्वर्युः प्रस्तरं हरन्सर्पति
adhvaryuḥ prastaraṃ haransarpati
- 2
तम् अनुमन्त्रयत एतद् अहं दैव्यं वाजिनं संमार्ज्मीति
tam anumantrayata etad ahaṃ daivyaṃ vājinaṃ saṃmārjmīti
- 3
संमृष्टम् एवैनं शान्तम् आरोहति नार्तिम् आर्च्छति
saṃmṛṣṭam evainaṃ śāntam ārohati nārtim ārcchati
- 4
देवक्षेत्रं वा एषो ऽध्यवस्यति यः सोमस्योद्गायति
devakṣetraṃ vā eṣo 'dhyavasyati yaḥ somasyodgāyati
- 5
य इन्नु मानुषाय क्षेत्रपतये ऽप्रोच्यावस्यति तम् इन्नु स हिनस्ति वा प्र वा यापयति
ya innu mānuṣāya kṣetrapataye 'procyāvasyati tam innu sa hinasti vā pra vā yāpayati
- 6
अथ किं यो दैव्याय क्षेत्रपतये ऽप्रोच्यावस्यात्
atha kiṃ yo daivyāya kṣetrapataye 'procyāvasyāt
- 7
सोमोद्गायोद्गाय सोमेत्य् आह
somodgāyodgāya somety āha
- 8
सोमो वै देवानां क्षेत्रपतिः
somo vai devānāṃ kṣetrapatiḥ
- 9
सोमायैव तद्देवानां क्षेत्रपतये प्रोच्योद्गायति नार्तिम् आर्च्छति
somāyaiva taddevānāṃ kṣetrapataye procyodgāyati nārtim ārcchati
- 10
मह्यं तेजसे मह्यं ब्रह्मवर्चसाय मह्यम् अन्नाद्याय मह्यं भूम्ने मह्यं पुष्ट्यै मह्यं प्रजननाय प्रजानां भूम्ने प्रजानां पुष्ट्यै प्रजानां प्रजननाय सोमस्य राज्ञो राज्याय मम ग्रामणेयायेति
mahyaṃ tejase mahyaṃ brahmavarcasāya mahyam annādyāya mahyaṃ bhūmne mahyaṃ puṣṭyai mahyaṃ prajananāya prajānāṃ bhūmne prajānāṃ puṣṭyai prajānāṃ prajananāya somasya rājño rājyāya mama grāmaṇeyāyeti
- 11
ग्रावो ह स्माह मैत्रेयः किं मम एकस्मा आगास्यामि किम् एकस्मा इति
grāvo ha smāha maitreyaḥ kiṃ mama ekasmā āgāsyāmi kim ekasmā iti
- 12
एतेन ह स्म वै स तद् आह सोमोद्गायोद्गाय सोमेदम् अमुष्मा इदम् अमुष्मा इति
etena ha sma vai sa tad āha somodgāyodgāya somedam amuṣmā idam amuṣmā iti
- 13
ते ह स्मास्मै कामाः समृध्यन्ते
te ha smāsmai kāmāḥ samṛdhyante
- 14
देवपाशा वा एते वितायन्ते यद्धिष्ण्या अग्नयो विह्रियन्ते
devapāśā vā ete vitāyante yaddhiṣṇyā agnayo vihriyante
- 15
तान्यो ऽविद्वान् अभ्यवैति देवपाशान्प्रतिमुञ्चते
tānyo 'vidvān abhyavaiti devapāśānpratimuñcate
- 16
एषा वै यज्ञस्य द्वार्यद् अन्तराग्नीध्रं च चात्वालं च
eṣā vai yajñasya dvāryad antarāgnīdhraṃ ca cātvālaṃ ca
- 17
तयाभ्यवेयात्
tayābhyaveyāt
- 18
तयोदेयात्
tayodeyāt
- 19
धा वै नाम वेदिः
dhā vai nāma vediḥ
- 20
ताम् अभ्यवयन्ब्रूयाद्धा असि सुधां मे धेह्य् आयुष्मन्तस्त्वद्वर्चस्वन्त उद्गेष्मेति
tām abhyavayanbrūyāddhā asi sudhāṃ me dhehy āyuṣmantastvadvarcasvanta udgeṣmeti
- 21
न देवपाशान्प्रतिमुञ्चते नार्तिम् आर्च्छति
na devapāśānpratimuñcate nārtim ārcchati

