20 shlokas
- 1
प्र वो महे महे वृधे भरध्वम् इत्य् एता वै विराजः
pra vo mahe mahe vṛdhe bharadhvam ity etā vai virājaḥ
- 2
अनुष्टुप्सु षोडशिसाम कुर्वीत यः कामयेत न मान्या वाग् अतिवदेद् इति
anuṣṭupsu ṣoḍaśisāma kurvīta yaḥ kāmayeta na mānyā vāg ativaded iti
- 3
वज्रो वै षोडशी
vajro vai ṣoḍaśī
- 4
वाग् अनुष्टुप्
vāg anuṣṭup
- 5
वज्रेणैव वाचं स्पृणोति नैनम् अन्या वाग् अतिवदति
vajreṇaiva vācaṃ spṛṇoti nainam anyā vāg ativadati
- 6
आ तिष्ठ वृत्रहन्रथम् इत्य् एता वा अनुष्टुभः
ā tiṣṭha vṛtrahanratham ity etā vā anuṣṭubhaḥ
- 7
अथैतास्त्र्यक्षरा एकपदा भवन्ति विष्णोश्छन्दो भुरिजः शक्वर्य इति
athaitāstryakṣarā ekapadā bhavanti viṣṇośchando bhurijaḥ śakvarya iti
- 8
एताभिर्वा इन्द्रो वृत्रम् अहन्न् एताभिः श्रियम् आश्नुतौषम् एव
etābhirvā indro vṛtram ahann etābhiḥ śriyam āśnutauṣam eva
- 9
द्विषन्तं भ्रातृव्यं हन्त्य् ओषं श्रियम् अश्नुते य एवं वेद
dviṣantaṃ bhrātṛvyaṃ hanty oṣaṃ śriyam aśnute ya evaṃ veda
- 10
हिरण्यं संप्रदायं षोडशिना स्तुवन्ति
hiraṇyaṃ saṃpradāyaṃ ṣoḍaśinā stuvanti
- 11
षोडशिनम् एव तज्ज्योतिष्मन्तं कुर्वन्ति
ṣoḍaśinam eva tajjyotiṣmantaṃ kurvanti
- 12
अश्व उपतिष्ठते साम्येक्ष्याय
aśva upatiṣṭhate sāmyekṣyāya
- 13
भ्रातृव्यलोकं चैवैषां तद्विधमंस्तिष्ठति
bhrātṛvyalokaṃ caivaiṣāṃ tadvidhamaṃstiṣṭhati
- 14
यस्माज्जातो न परो ऽन्यो अस्ति य आ बभूव भुवनानि विश्वा प्रजापतिः प्रजया संरराणस्त्रीणि ज्योतींषि सचते स षोडशीति षोडशिग्रहम् अवेक्षते
yasmājjāto na paro 'nyo asti ya ā babhūva bhuvanāni viśvā prajāpatiḥ prajayā saṃrarāṇastrīṇi jyotīṃṣi sacate sa ṣoḍaśīti ṣoḍaśigraham avekṣate
- 15
इन्द्रश्च सम्राड्वरुणश्च राजा तौ ते भक्षं चक्रतुर् अग्र एतं तयोर् अहं भक्षम् अनुभक्षयामि वाग्जुषाणा सोमस्य तृप्यत्व् इति
indraśca samrāḍvaruṇaśca rājā tau te bhakṣaṃ cakratur agra etaṃ tayor ahaṃ bhakṣam anubhakṣayāmi vāgjuṣāṇā somasya tṛpyatv iti
- 16
एकाक्षरं देवानाम् अवमम् आसीत्सप्ताक्षरं परमम्
ekākṣaraṃ devānām avamam āsītsaptākṣaraṃ paramam
- 17
नवाक्षरम् असुराणाम् अवमम् आसीत्पञ्चदशाक्षरं परमम्
navākṣaram asurāṇām avamam āsītpañcadaśākṣaraṃ paramam
- 18
ते देवा अकामयन्त कनीयसा भूयो ऽसुराणां वृञ्जीमहीति
te devā akāmayanta kanīyasā bhūyo 'surāṇāṃ vṛñjīmahīti
- 19
त एकाक्षरेण पञ्चदशाक्षरम् अवृञ्जत द्व्यक्षरेण चतुर्दशाक्षरं त्र्यक्षरेण त्रयोदशाक्षरं चतुरक्षरेण द्वादशाक्षरं पञ्चाक्षरेणैकादशाक्षरं षडक्षरेण दशाक्षरं सप्ताक्षरेण नवाक्षरम् अष्टाभिर् एवाष्टौ
ta ekākṣareṇa pañcadaśākṣaram avṛñjata dvyakṣareṇa caturdaśākṣaraṃ tryakṣareṇa trayodaśākṣaraṃ caturakṣareṇa dvādaśākṣaraṃ pañcākṣareṇaikādaśākṣaraṃ ṣaḍakṣareṇa daśākṣaraṃ saptākṣareṇa navākṣaram aṣṭābhir evāṣṭau
- 20
एवम् एव कनीयसा ज्यायो द्विषतो भ्रातृव्यस्य वृङ्क्ते य एवं वेद
evam eva kanīyasā jyāyo dviṣato bhrātṛvyasya vṛṅkte ya evaṃ veda

