22 shlokas
- 1
प्रजापतिः प्रजा असृजत
prajāpatiḥ prajā asṛjata
- 2
सो ऽग्निम् अपि मुखाद् असिसृक्षत
so 'gnim api mukhād asisṛkṣata
- 3
सो ऽग्निर्मुखाद्बीभत्समान ऊर्ध्व उद्द्रुत्य मस्तिष्कम् उद्दिह्यासृज्यत
so 'gnirmukhādbībhatsamāna ūrdhva uddrutya mastiṣkam uddihyāsṛjyata
- 4
तं देवाश्चर्षयश्चोपसमेत्याब्रुवन्वितुन्नो ऽयं मस्तिष्को मामुया भूत्करवामेमं कस्यां चिताचितीति
taṃ devāścarṣayaścopasametyābruvanvitunno 'yaṃ mastiṣko māmuyā bhūtkaravāmemaṃ kasyāṃ citācitīti
- 5
ते बृहस्पतिम् अब्रुवन्सोमम् अस्मिन्गृहाणेति
te bṛhaspatim abruvansomam asmingṛhāṇeti
- 6
स बृहस्पतिर् अब्रवीत्स वा अयं क्रूर इवापूतो ऽमेध्यो ऽशृतंकृत इति
sa bṛhaspatir abravītsa vā ayaṃ krūra ivāpūto 'medhyo 'śṛtaṃkṛta iti
- 7
वयं त एतं पूतं मेध्यं शृतंकृतं कुर्म इत्यब्रुवन्
vayaṃ ta etaṃ pūtaṃ medhyaṃ śṛtaṃkṛtaṃ kurma ityabruvan
- 8
तं वै म आहरतेति
taṃ vai ma āharateti
- 9
तथेति
tatheti
- 10
तम् अस्मै प्रायच्छन्
tam asmai prāyacchan
- 11
तं प्रत्यगृह्णाद्देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां प्रतिगृह्णामीति
taṃ pratyagṛhṇāddevasya tvā savituḥ prasave 'śvinorbāhubhyāṃ pūṣṇo hastābhyāṃ pratigṛhṇāmīti
- 12
देवाङ्गैर्वावैनं तत्प्रत्यगृह्णात्
devāṅgairvāvainaṃ tatpratyagṛhṇāt
- 13
तं प्रतिगृह्यापवयद्वसवस्त्वा पुनन्तु गायत्रेण छन्दसा सुप्रजावनिं रायस्पोषवनिं रुद्रास्त्वा पुनन्तु त्रैष्टुभेन छन्दसा सुप्रजावनिं रायस्पोषवनिम् आदित्यास्त्वा पुनन्तु जागतेन छन्दसा सुप्रजावनिं रायस्पोषवनिम् इति
taṃ pratigṛhyāpavayadvasavastvā punantu gāyatreṇa chandasā suprajāvaniṃ rāyaspoṣavaniṃ rudrāstvā punantu traiṣṭubhena chandasā suprajāvaniṃ rāyaspoṣavanim ādityāstvā punantu jāgatena chandasā suprajāvaniṃ rāyaspoṣavanim iti
- 14
छन्दोभिश्च वावैनं तद्देवताभिश्चापवयत्
chandobhiśca vāvainaṃ taddevatābhiścāpavayat
- 15
तं पवयित्वा पश्चाद् अक्षं सादयति बार्हस्पत्यम् असि वानस्पत्यं प्रजापतेर्मूर्धात्यायुपात्रम् इति
taṃ pavayitvā paścād akṣaṃ sādayati bārhaspatyam asi vānaspatyaṃ prajāpatermūrdhātyāyupātram iti
- 16
यद् आह बार्हस्पत्यम् असीति बृहस्पतिर्ह्य् एतम् अग्रे प्रत्यगृह्णात्
yad āha bārhaspatyam asīti bṛhaspatirhy etam agre pratyagṛhṇāt
- 17
यद् आह वानस्पत्यम् इति वनस्पतिभ्यो ह्य् एनम् अधिकुर्वन्ति
yad āha vānaspatyam iti vanaspatibhyo hy enam adhikurvanti
- 18
यद् आह प्रजापतेर्मूर्धेति प्रजापतेर्ह्य् एष मूर्धासीत्
yad āha prajāpatermūrdheti prajāpaterhy eṣa mūrdhāsīt
- 19
यद् आह अत्यायुपात्रम् इत्य् अति ह्य् एतद् अन्यानि पात्राणि पात्रं
yad āha atyāyupātram ity ati hy etad anyāni pātrāṇi pātraṃ
- 20
यद्व् एव पात्रं प्रथमं युज्यत उत्तमं विमुच्यते तेनैवात्य् अन्यानि पात्राणि
yadv eva pātraṃ prathamaṃ yujyata uttamaṃ vimucyate tenaivāty anyāni pātrāṇi
- 21
प्र श्रेयसः पात्रम् आप्नोति य एवं वेद
pra śreyasaḥ pātram āpnoti ya evaṃ veda
- 22
तं पश्चाद् अक्षं सादयित्वा गायत्रं विश्वरूपासु गायति
taṃ paścād akṣaṃ sādayitvā gāyatraṃ viśvarūpāsu gāyati

