28 shlokas
- 1
सवनान्य् एवेन्द्राग्नी अनुप्राविशताम्
savanāny evendrāgnī anuprāviśatām
- 2
ततो वै तान्मृत्युः पाप्मा न निरजानात्
tato vai tānmṛtyuḥ pāpmā na nirajānāt
- 3
कुतो हि तस्य मृत्युः पाप्मेशिष्यते यं न निर्जानाति
kuto hi tasya mṛtyuḥ pāpmeśiṣyate yaṃ na nirjānāti
- 4
न हैनं मृत्युः पाप्मानुविन्दति य एवं वेद
na hainaṃ mṛtyuḥ pāpmānuvindati ya evaṃ veda
- 5
छन्दांसि वाव तान्मृत्योः पाप्मनो ऽच्छादयन्
chandāṃsi vāva tānmṛtyoḥ pāpmano 'cchādayan
- 6
तद्यद् एनाञ्छन्दांसि मृत्योः पाप्मनो ऽच्छादयंस्तच्छन्दसां छन्दस्त्वम्
tadyad enāñchandāṃsi mṛtyoḥ pāpmano 'cchādayaṃstacchandasāṃ chandastvam
- 7
छादयन्त्य् एवैनं छन्दांसि मृत्योः पाप्मनो य एवं वेद
chādayanty evainaṃ chandāṃsi mṛtyoḥ pāpmano ya evaṃ veda
- 8
तद्येन येन ह वै छन्दसैवंविद् आर्त्विज्यं करोति तत्तद् एव स तर्हि प्रपन्नो भवति
tadyena yena ha vai chandasaivaṃvid ārtvijyaṃ karoti tattad eva sa tarhi prapanno bhavati
- 9
येन येन ह्य् एवैनं छन्दसा कुर्वन्तम् उपवदति तस्माद् आवृश्च्यते
yena yena hy evainaṃ chandasā kurvantam upavadati tasmād āvṛścyate
- 10
तस्य हैतस्य नैव का चनार्तिर् अस्ति य एवं वेद
tasya haitasya naiva kā canārtir asti ya evaṃ veda
- 11
य एवैनम् उपवदति स आर्तिम् आर्च्छति
ya evainam upavadati sa ārtim ārcchati
- 12
अथ होर्जो जानायनः कपिवनं भौवायनं पप्रच्छ यद्गायत्रं प्रातस्सवनं त्रैष्टुभं माध्यंदिनं सवनं जागतं तृतीयसवनम् अथ केयम् अनुष्टुब् अयातयाम्नी सवनमुखान्य् उपापतत्य् आन्ताद्यज्ञं वहतीति
atha horjo jānāyanaḥ kapivanaṃ bhauvāyanaṃ papraccha yadgāyatraṃ prātassavanaṃ traiṣṭubhaṃ mādhyaṃdinaṃ savanaṃ jāgataṃ tṛtīyasavanam atha keyam anuṣṭub ayātayāmnī savanamukhāny upāpataty āntādyajñaṃ vahatīti
- 13
स होवाच वाग्वा अनुष्टुप्
sa hovāca vāgvā anuṣṭup
- 14
वाचो यज्ञस्तायते
vāco yajñastāyate
- 15
तद्यथा वा अदो भद्रबलीवर्देन रज्ज्वभिहितेन पुनः पुनः प्रतिधावन्ति प्रतिकूलाय वा गुरवे वोद्वोढव एवं वा एतां वाचम् अनुष्टुभं सवनमुखेषु परियाणायैव युञ्जन्ति
tadyathā vā ado bhadrabalīvardena rajjvabhihitena punaḥ punaḥ pratidhāvanti pratikūlāya vā gurave vodvoḍhava evaṃ vā etāṃ vācam anuṣṭubhaṃ savanamukheṣu pariyāṇāyaiva yuñjanti
- 16
प्रतिकूलानीव वा एतानि यत्सवनमुखानि
pratikūlānīva vā etāni yatsavanamukhāni
- 17
सैषा वाग् एवायातयाम्न्य् आन्ताद्यज्ञं वहति
saiṣā vāg evāyātayāmny āntādyajñaṃ vahati
- 18
यो वा अनुष्टुभं सर्वत्रापीदं वेद सर्वत्र हास्यापि पुण्ये भवति
yo vā anuṣṭubhaṃ sarvatrāpīdaṃ veda sarvatra hāsyāpi puṇye bhavati
- 19
अष्टाक्षरा गायत्री
aṣṭākṣarā gāyatrī
- 20
एकादशाक्षरा त्रिष्टुप्
ekādaśākṣarā triṣṭup
- 21
द्वादशाक्षरा जगती
dvādaśākṣarā jagatī
- 22
वाग् इति यज्ञायज्ञीयस्य निधनम्
vāg iti yajñāyajñīyasya nidhanam
- 23
तद्द्वात्रिंशत्
taddvātriṃśat
- 24
द्वात्रिंशदक्षरानुष्टुप्
dvātriṃśadakṣarānuṣṭup
- 25
अपि वा एतस्यै प्रातस्सवने ऽपि माध्यंदिने सवने ऽपि तृतीयसवने
api vā etasyai prātassavane 'pi mādhyaṃdine savane 'pi tṛtīyasavane
- 26
अपि वा एतस्यै ब्रह्मण्य् अपि क्षत्रे ऽपि विशि
api vā etasyai brahmaṇy api kṣatre 'pi viśi
- 27
अपि वा एतस्या अस्मिन्लोके ऽप्य् अन्तरिक्षे ऽप्य् अमुष्मिन्
api vā etasyā asminloke 'py antarikṣe 'py amuṣmin
- 28
स य एवम् एताम् अनुष्टुभं सर्वत्रापीदं वेद सर्वत्र हैवास्यापि पुण्ये भवति
sa ya evam etām anuṣṭubhaṃ sarvatrāpīdaṃ veda sarvatra haivāsyāpi puṇye bhavati

