19 shlokas
- 1
प्रजापतिर् उद्गाता
prajāpatir udgātā
- 2
ऊर्ग् उदुम्बरः
ūrg udumbaraḥ
- 3
स एष ऊर्जि श्रितः प्रजापतिः प्रजाभ्य ऊर्जम् अन्नाद्यं विभजति
sa eṣa ūrji śritaḥ prajāpatiḥ prajābhya ūrjam annādyaṃ vibhajati
- 4
उदङ्ङ् आसीन उद्गायति
udaṅṅ āsīna udgāyati
- 5
उदीचीम् एव तद्दिशम् ऊर्जा भाजयति
udīcīm eva taddiśam ūrjā bhājayati
- 6
प्रत्यङ्ङ् आसीनः प्रस्तौति
pratyaṅṅ āsīnaḥ prastauti
- 7
प्रतीचीम् एव तद्दिशम् ऊर्जा भाजयति
pratīcīm eva taddiśam ūrjā bhājayati
- 8
दक्षिणासीनः प्रतिहरति
dakṣiṇāsīnaḥ pratiharati
- 9
दक्षिणाम् एव तद्दिशम् ऊर्जा भाजयति
dakṣiṇām eva taddiśam ūrjā bhājayati
- 10
प्राञ्चो ऽन्य ऋत्विज आर्त्विज्यं कुर्वन्ति
prāñco 'nya ṛtvija ārtvijyaṃ kurvanti
- 11
प्राचीम् एव तद्दिशम् ऊर्जा भाजयन्ति
prācīm eva taddiśam ūrjā bhājayanti
- 12
तस्माद् एषा दिशां वीर्यवत्तमोपजीवनीयतमा भूयिष्ठैः प्रीता
tasmād eṣā diśāṃ vīryavattamopajīvanīyatamā bhūyiṣṭhaiḥ prītā
- 13
तस्माद्यत्प्रजा अवृत्तिं नियन्ति प्राचीर् एव यन्ति
tasmādyatprajā avṛttiṃ niyanti prācīr eva yanti
- 14
एषा हि दिशां वीर्यवत्तमोपजीवनीयतमा भूयिष्ठैः प्रीता
eṣā hi diśāṃ vīryavattamopajīvanīyatamā bhūyiṣṭhaiḥ prītā
- 15
यद् उदीचीनदेवत्या उद्गातारो ऽथ कस्माद्विपर्यावृत्य दिश आर्त्विज्यं कुर्वन्तीत्य् आहुः
yad udīcīnadevatyā udgātāro 'tha kasmādviparyāvṛtya diśa ārtvijyaṃ kurvantīty āhuḥ
- 16
स ब्रूयाद्दिशाम् अभीष्ट्यै दिशाम् अभिप्रीत्यै
sa brūyāddiśām abhīṣṭyai diśām abhiprītyai
- 17
तस्मात्सर्वासु दिक्ष्व् अन्नं विद्यत इति
tasmātsarvāsu dikṣv annaṃ vidyata iti
- 18
उद्दिवं स्तभानान्तरिक्षं पृण पृथिवीम् उपरेण दृंह द्युतानस्त्वा मारुतो मिनोतु मित्रावरुणयोर्ध्रुवेण धर्मणा घृतेन द्यावापृथिवी आप्रीणाथां सुपिप्पला ओषधीः कृधि स्वाहेत्य् औदुम्बरीम् अभिजुहोति
uddivaṃ stabhānāntarikṣaṃ pṛṇa pṛthivīm upareṇa dṛṃha dyutānastvā māruto minotu mitrāvaruṇayordhruveṇa dharmaṇā ghṛtena dyāvāpṛthivī āprīṇāthāṃ supippalā oṣadhīḥ kṛdhi svāhety audumbarīm abhijuhoti
- 19
इमान् एवैतल्लोकान्रसेनानक्ति
imān evaitallokānrasenānakti

