22 shlokas
- 1
अस्थूरिर्वा एष यज्ञः पुरुषसम्मितः
asthūrirvā eṣa yajñaḥ puruṣasammitaḥ
- 2
यत्काम एनम् आहरते सम् अस्मै काम ऋध्यते
yatkāma enam āharate sam asmai kāma ṛdhyate
- 3
अस्थूरिणा हि तत्र गच्छति यत्र जिगमिषति
asthūriṇā hi tatra gacchati yatra jigamiṣati
- 4
प्रजापतिर्यत्प्रजा असृजत ता अग्निष्टोमेनासृजत
prajāpatiryatprajā asṛjata tā agniṣṭomenāsṛjata
- 5
दशमेन च वै स ता अग्निष्टोमस्य स्तोत्रेणासृजत दशमेन च मासा संवत्सरस्य
daśamena ca vai sa tā agniṣṭomasya stotreṇāsṛjata daśamena ca māsā saṃvatsarasya
- 6
तद्द्वादशेन चैवाग्निष्टोमस्य स्तोत्रेण पर्यगृह्णाद्द्वादशेन च मासा संवत्सरस्य
taddvādaśena caivāgniṣṭomasya stotreṇa paryagṛhṇāddvādaśena ca māsā saṃvatsarasya
- 7
तस्मात्पशवो दश मासो गर्भान्बिभ्रति
tasmātpaśavo daśa māso garbhānbibhrati
- 8
त एकादशम् अनुप्रजायन्ते
ta ekādaśam anuprajāyante
- 9
न काचन द्वादशम् अतिहरति परिगृहीता हि तेन
na kācana dvādaśam atiharati parigṛhītā hi tena
- 10
तासां परिगृहीतानाम् अश्वतरो ऽत्यप्लवत
tāsāṃ parigṛhītānām aśvataro 'tyaplavata
- 11
तस्यानुहाय रेत आदत्त
tasyānuhāya reta ādatta
- 12
तद्गर्दभे न्यमार्ट्तद्वडबायां तत्पशुषु तद् ओषधीषु
tadgardabhe nyamārṭtadvaḍabāyāṃ tatpaśuṣu tad oṣadhīṣu
- 13
तस्माद्गर्दभो द्विरेतास्तस्माद्वडबा द्विरेताः
tasmādgardabho dviretāstasmādvaḍabā dviretāḥ
- 14
तस्मात्पशवो द्वौ द्वौ जनयन्ति
tasmātpaśavo dvau dvau janayanti
- 15
तस्माद् ओषधयो ऽनभ्यक्ता रेभन्ति
tasmād oṣadhayo 'nabhyaktā rebhanti
- 16
तस्माद् अश्वतरो बर्हिषि न देयो ऽति ह्य् अप्लवताप ह्य् अक्रामत्
आत्तरेता ह्य् अप्रजा हि
tasmād aśvataro barhiṣi na deyo 'ti hy aplavatāpa hy akrāmat
āttaretā hy aprajā hi
- 17
षोडशिनः स्तोत्रे देयः
ṣoḍaśinaḥ stotre deyaḥ
- 18
अतिरिक्तो वै षोडशी स्तोत्राणाम् अतिरिक्तो ऽश्वतरः पशूनाम्
atirikto vai ṣoḍaśī stotrāṇām atirikto 'śvataraḥ paśūnām
- 19
अतिरिक्त एव तद् अतिरिक्तं दधति यज्ञस्य सलोमतायै
atirikta eva tad atiriktaṃ dadhati yajñasya salomatāyai
- 20
स य एवं विद्वान् अग्निष्टोमेनोद्गायति प्राजाताः प्रजा जनयति परि प्रजाता गृह्णाति
sa ya evaṃ vidvān agniṣṭomenodgāyati prājātāḥ prajā janayati pari prajātā gṛhṇāti
- 21
ज्येष्ठयज्ञो वा एष प्रजापतियज्ञो यद् अग्निष्टोमः
jyeṣṭhayajño vā eṣa prajāpatiyajño yad agniṣṭomaḥ
- 22
अश्नुते ज्यैष्ठ्यं श्रैष्ठ्यं य एवं वेद
aśnute jyaiṣṭhyaṃ śraiṣṭhyaṃ ya evaṃ veda

