26 shlokas
- 1
यदि ध्रुवः प्रवर्तेत संलिख्य न्युब्ज्य यच्छुद्धं तेनाभ्युत्पूरयेत्
yadi dhruvaḥ pravarteta saṃlikhya nyubjya yacchuddhaṃ tenābhyutpūrayet
- 2
यद्य् आग्रयणो ग्रहः प्रवर्तेतेतरेभ्यो ऽभ्युत्पूरयेत्
yady āgrayaṇo grahaḥ pravartetetarebhyo 'bhyutpūrayet
- 3
आत्मा वा आग्रयणो ग्रहः
ātmā vā āgrayaṇo grahaḥ
- 4
प्राणा इतरे
prāṇā itare
- 5
प्राणेभ्यो वा आत्मा सम्भवत्य् आत्मनो वा प्राणाः
prāṇebhyo vā ātmā sambhavaty ātmano vā prāṇāḥ
- 6
स एष सर्वाणि सवनानि परिशये यज्ञस्यैवारिष्ट्यै
sa eṣa sarvāṇi savanāni pariśaye yajñasyaivāriṣṭyai
- 7
यदि पृषदाज्यं प्रवर्तेताभ्युत्पूर्य पुनर्गृह्णीयात्
yadi pṛṣadājyaṃ pravartetābhyutpūrya punargṛhṇīyāt
- 8
यदि श्वावलिह्याद् अहविष्यं वा स्यात्तद् उत्तरवेद्यां निनीय मार्जयित्वा स्रुचम् अन्यद्गृह्णीयात्
yadi śvāvalihyād ahaviṣyaṃ vā syāttad uttaravedyāṃ ninīya mārjayitvā srucam anyadgṛhṇīyāt
- 9
यदि नाराशंसं सन्नं चमसम् अभ्युन्नयेरन्नाह सो हुतो भक्षाय नो भक्षितो होमाय
yadi nārāśaṃsaṃ sannaṃ camasam abhyunnayerannāha so huto bhakṣāya no bhakṣito homāya
- 10
तम् अन्तरा परिधींश्च भस्म च निनयेत्
tam antarā paridhīṃśca bhasma ca ninayet
- 11
हुतस्य चाहुतस्य चाहुतस्य हुतस्य च पीतापीतस्य सोमस्येन्द्राग्नी पिबतं सुतं स्वाहेति यजुषा हैके निनयन्ति
hutasya cāhutasya cāhutasya hutasya ca pītāpītasya somasyendrāgnī pibataṃ sutaṃ svāheti yajuṣā haike ninayanti
- 12
तूष्णीम् एवेति ह स्माह शाट्यायनिः
tūṣṇīm eveti ha smāha śāṭyāyaniḥ
- 13
मार्जयित्वा चमसं येनाध्वर्युर्ग्रहेण प्रतिष्ठेत तस्य लिप्सेत
mārjayitvā camasaṃ yenādhvaryurgraheṇa pratiṣṭheta tasya lipseta
- 14
प्राणं वा एतस्योपदासयन्ति यस्य चमसम् उपदासयन्ति
prāṇaṃ vā etasyopadāsayanti yasya camasam upadāsayanti
- 15
प्राणो वै ग्रहः
prāṇo vai grahaḥ
- 16
प्राणेनैवैनं तत्समर्धयन्ति
prāṇenaivainaṃ tatsamardhayanti
- 17
यदि पर्युन्नयेरन्पुनः समवनयध्वम् इति ब्रूयाद् अथ तम् एवानून्नयेरन्
yadi paryunnayeranpunaḥ samavanayadhvam iti brūyād atha tam evānūnnayeran
- 18
यद्य् उद्गायेयुर् अपि तेषाम् एव सम्प्रच्छिन्द्युः
yady udgāyeyur api teṣām eva sampracchindyuḥ
- 19
यदि परिभक्षयेयुर् उपहवम् इच्छेत
yadi paribhakṣayeyur upahavam iccheta
- 20
यदि बहिर्वेदि चरन्तम् अभ्य् अस्तम् इयाद् अपि वा श्रावयेयुर्गृहपताव् उपहवम् इच्छेत
yadi bahirvedi carantam abhy astam iyād api vā śrāvayeyurgṛhapatāv upahavam iccheta
- 21
प्रजापतिर्वै गृहपतिः
prajāpatirvai gṛhapatiḥ
- 22
प्रजापतिनैवैनं तद् उपह्वयते
prajāpatinaivainaṃ tad upahvayate
- 23
यदि ग्रावा विशीर्येत द्युतानस्य मारुतस्य ब्रह्मसाम्ना स्तुवीरन्
yadi grāvā viśīryeta dyutānasya mārutasya brahmasāmnā stuvīran
- 24
यदि वा अन्यो ग्रावा स्यात्तेनाभिषुणुयुः
yadi vā anyo grāvā syāttenābhiṣuṇuyuḥ
- 25
यदि तं न विन्देयुर् औदुम्बरं वा पालाशं वा कृत्वा तेनाभिषुणुयुः
yadi taṃ na vindeyur audumbaraṃ vā pālāśaṃ vā kṛtvā tenābhiṣuṇuyuḥ
- 26
सैव तत्र प्रायश्चित्तिः
saiva tatra prāyaścittiḥ

