15 shlokas
- 1
आरुणिं ह यान्तम् उदीच्याः परिप्रजिघ्युर् आरुण आरुणे कियता बृहद्रथन्तरे प्रजाः प्रजनयतः कियता देवयशसम् आनशाते इति
āruṇiṃ ha yāntam udīcyāḥ pariprajighyur āruṇa āruṇe kiyatā bṛhadrathantare prajāḥ prajanayataḥ kiyatā devayaśasam ānaśāte iti
- 2
तद्ध न प्रत्युवाच
taddha na pratyuvāca
- 3
स होवाच वेदाहम् एतद्यन्मे ब्रह्म लिप्सध्वं यद्व् एवाहं युष्मभ्यं न वक्ष्यामीति
sa hovāca vedāham etadyanme brahma lipsadhvaṃ yadv evāhaṃ yuṣmabhyaṃ na vakṣyāmīti
- 4
तम् उ हान्तेवासिन ईक्षांचक्रिरे ऽमेधयेदम् इत्थं प्रत्यवोचत्
tam u hāntevāsina īkṣāṃcakrire 'medhayedam itthaṃ pratyavocat
- 5
अनवगतम् अह स्विद् अस्याभूत्
anavagatam aha svid asyābhūt
- 6
हन्तैनं पृच्छाम इति
hantainaṃ pṛcchāma iti
- 7
तं होचुर्यत्प्रत्यवक्ष्यः कथं प्रत्यवक्ष्य इति
taṃ hocuryatpratyavakṣyaḥ kathaṃ pratyavakṣya iti
- 8
स होवाच यद् अष्टाक्षरेण प्रथमस्या ऋचः प्रस्तौत्य् अष्टाशफांस्तेन पशून्प्रजनयतः
sa hovāca yad aṣṭākṣareṇa prathamasyā ṛcaḥ prastauty aṣṭāśaphāṃstena paśūnprajanayataḥ
- 9
यद्द्व्यक्षरेणोत्तरयोर्द्विपदस्तेन
yaddvyakṣareṇottarayordvipadastena
- 10
निधनेनैव देवयशसम् आनशाते इति प्रत्यवक्ष्यम् इति होवाच यत्प्रत्यवक्ष्यम् इति
nidhanenaiva devayaśasam ānaśāte iti pratyavakṣyam iti hovāca yatpratyavakṣyam iti
- 11
यो वै बृहद्रथन्तरयोर्देवहूती वेद यन्त्य् अस्य देवा हवम्
yo vai bṛhadrathantarayordevahūtī veda yanty asya devā havam
- 12
ऊर्ध्वा वै रथन्तरस्य देवहूतिर् अर्वाची बृहतः
ūrdhvā vai rathantarasya devahūtir arvācī bṛhataḥ
- 13
तद्यद्रथन्तरस्यर्चैवापरिष्टुभ्योर्ध्वम् इव प्रस्तौति तस्माद् अयम् ऊर्ध्वो लोक ऊर्ध्वो ऽयम् अग्निर्दीप्यत ऊर्ध्वा ओषधय ऊर्ध्वा वनस्पतयः सर्वम् एवोर्ध्वम्
tadyadrathantarasyarcaivāpariṣṭubhyordhvam iva prastauti tasmād ayam ūrdhvo loka ūrdhvo 'yam agnirdīpyata ūrdhvā oṣadhaya ūrdhvā vanaspatayaḥ sarvam evordhvam
- 14
अथ यस्माद्बृहतः स्तोभेन परिष्टुभ्यौ हो इत्य् अर्वाङ्प्रस्तौति तस्माद् असाव् अर्वाङ्लोको ऽर्वाङ् असाव् आदित्यस्तपत्य् अर्वाङ्चन्द्रमा अर्वाञ्चि नक्षत्राण्य् अर्वाची वृष्टिर् एति सर्वम् एवार्वाक्
atha yasmādbṛhataḥ stobhena pariṣṭubhyau ho ity arvāṅprastauti tasmād asāv arvāṅloko 'rvāṅ asāv ādityastapaty arvāṅcandramā arvāñci nakṣatrāṇy arvācī vṛṣṭir eti sarvam evārvāk
- 15
स य एवम् एते बृहद्रथन्तरयोर्देवहूती वेद यन्त्य् अस्य देवा हवम्
sa ya evam ete bṛhadrathantarayordevahūtī veda yanty asya devā havam

