16 shlokas
- 1
तद् आहुर्यत्पवमानवन्तो ऽन्ये यज्ञक्रतवो ऽथ केनैषां रात्रिः पवमानवती भवतीति
tad āhuryatpavamānavanto 'nye yajñakratavo 'tha kenaiṣāṃ rātriḥ pavamānavatī bhavatīti
- 2
राथन्तरेण संधिनेति ब्रूयात्
rāthantareṇa saṃdhineti brūyāt
- 3
एतेन ह वै रात्रिः पवमानवती भवति
etena ha vai rātriḥ pavamānavatī bhavati
- 4
तेन सकृद्धिंकृतेन पराचा स्तुवते
tena sakṛddhiṃkṛtena parācā stuvate
- 5
सकृद्ध्य् एव परस्तात्त्रिवृते हिंकुर्वन्ति यत्प्रायणं तद् उदयनम् असद् इति
sakṛddhy eva parastāttrivṛte hiṃkurvanti yatprāyaṇaṃ tad udayanam asad iti
- 6
रेतस्सिक्तिर्ह त्वै पूर्वस्त्रिवृत्प्रजातिर् उत्तरः
retassiktirha tvai pūrvastrivṛtprajātir uttaraḥ
- 7
आत्मा वै प्रजा पशव एतानि तृचानि
ātmā vai prajā paśava etāni tṛcāni
- 8
प्रजातिर्वै रथन्तरम्
prajātirvai rathantaram
- 9
यथा रेत एव सिक्तं स्यान्न प्रजायेत तादृक्तद्यत्सकृद्धिंकृतैः स्तुवीरन्
yathā reta eva siktaṃ syānna prajāyeta tādṛktadyatsakṛddhiṃkṛtaiḥ stuvīran
- 10
तद्यत्तृचाय तृचाय हिंकुर्वन्ति प्रजात्या एव
tadyattṛcāya tṛcāya hiṃkurvanti prajātyā eva
- 11
बहुर्भवति प्रजायते य एवं वेद
bahurbhavati prajāyate ya evaṃ veda
- 12
अथो हैषाम् एक एव पर्याय आयतनवान्स्याद् अनायतनौ द्वौ स्यातां यत्सकृद्धिंकृतैः स्तुवीरन्
atho haiṣām eka eva paryāya āyatanavānsyād anāyatanau dvau syātāṃ yatsakṛddhiṃkṛtaiḥ stuvīran
- 13
तद्यत्तृचाय तृचाय हिंकुर्वन्ति तेनैवैषां सर्वरात्रिर् आयतनवती पवमानवती भवति
tadyattṛcāya tṛcāya hiṃkurvanti tenaivaiṣāṃ sarvarātrir āyatanavatī pavamānavatī bhavati
- 14
यथा वा अहस्तथा रात्रिर्यथा रात्रिस्तथो अहः
yathā vā ahastathā rātriryathā rātristatho ahaḥ
- 15
पूर्वाह्णो मध्यंदिनो ऽपराह्णः पूर्वरात्रो मध्यरात्रो ऽपररात्रः
pūrvāhṇo madhyaṃdino 'parāhṇaḥ pūrvarātro madhyarātro 'pararātraḥ
- 16
तद्यत्तृचाय तृचाय हिंकुर्वन्त्य् अहोरात्रयोर् एव विधृत्यै
tadyattṛcāya tṛcāya hiṃkurvanty ahorātrayor eva vidhṛtyai

