14 shlokas
- 1
दैवीं ह वा एष संसदम् एति यः पवमानैर् उद्गायति
daivīṃ ha vā eṣa saṃsadam eti yaḥ pavamānair udgāyati
- 2
स यथा श्रेयांसम् अभ्यायन्न् एवं शिक्षन्न् इवोपनमस्यन्न् इव संसिद्धैश्शक्नुवन्न् उपहन्यमान उद्गायेत्
sa yathā śreyāṃsam abhyāyann evaṃ śikṣann ivopanamasyann iva saṃsiddhaiśśaknuvann upahanyamāna udgāyet
- 3
यथायन्तम् आमीवेद्यथा यद्याचेत्तद्दद्यात्तादृक्तत्
yathāyantam āmīvedyathā yadyācettaddadyāttādṛktat
- 4
अथ य एतैर् असंसिद्धैर् अशक्नुवन्न् अनुपहन्यमान उद्गायेद्यथायन्तं प्रतिमीवेद्यथा यद्याचेत्तन्न दद्यात्तादृग् उ तत्
atha ya etair asaṃsiddhair aśaknuvann anupahanyamāna udgāyedyathāyantaṃ pratimīvedyathā yadyācettanna dadyāttādṛg u tat
- 5
तद् उ हात्रैव यज्ञस्य समृद्धं च व्यृद्धं च विज्ञायते
tad u hātraiva yajñasya samṛddhaṃ ca vyṛddhaṃ ca vijñāyate
- 6
अतिहार्या ह वा एषा यत्पवमानाः
atihāryā ha vā eṣā yatpavamānāḥ
- 7
यो वा अतिहार्याम् असंवीतो ऽतिगाहते मृदा वै स लिप्यते नायति वै
yo vā atihāryām asaṃvīto 'tigāhate mṛdā vai sa lipyate nāyati vai
- 8
अथ यः संवीतो ऽतिगाहते न मृदा लिप्यते न नायति
atha yaḥ saṃvīto 'tigāhate na mṛdā lipyate na nāyati
- 9
एवम् इव वै पवमाना उपचर्याः
evam iva vai pavamānā upacaryāḥ
- 10
तद् आहुर्यद् अन्यानि स्तोत्राणि स्तोत्रियप्रतिपदो ऽथ कस्मात्पवमाना अस्तोत्रियप्रतिपद इति
tad āhuryad anyāni stotrāṇi stotriyapratipado 'tha kasmātpavamānā astotriyapratipada iti
- 11
स ब्रूयात्प्राणा वै पवमानाः
sa brūyātprāṇā vai pavamānāḥ
- 12
प्राणा उ पावमान्यः
prāṇā u pāvamānyaḥ
- 13
तद्यत्पवमानान्पावमानीभिर् एवानुप्रतिपद्येरन्पराञ्च एव प्राणान्निर्मृज्युर् इति
tadyatpavamānānpāvamānībhir evānupratipadyeranparāñca eva prāṇānnirmṛjyur iti
- 14
तान्यद् अनुष्टुभानुप्रतिपद्यन्ते वाग्वा अनुष्टुब्वाच्य् अपानो नियतो वाचैव तद् अपानं दधार
tānyad anuṣṭubhānupratipadyante vāgvā anuṣṭubvācy apāno niyato vācaiva tad apānaṃ dadhāra

