13 shlokas
- 1
तां प्रतिसमीक्षेत वामी नाम संदृशि विश्वा वामानि धीमहीति
tāṃ pratisamīkṣeta vāmī nāma saṃdṛśi viśvā vāmāni dhīmahīti
- 2
प्रजा वै वामम्
prajā vai vāmam
- 3
प्रजाम् एव तद् आत्मन्धत्ते
prajām eva tad ātmandhatte
- 4
वृष्णस्ते वृष्ण्यावतो विश्वा रेतांसि धीमहीतीतरा प्रतिसमीक्षते
vṛṣṇaste vṛṣṇyāvato viśvā retāṃsi dhīmahītītarā pratisamīkṣate
- 5
तद् आहुः प्रावृत उद्गायेद् अग्निर्वा एष वैश्वानरो यद्यज्ञायज्ञीयं तस्य शान्त्या अप्रदाहायेति
tad āhuḥ prāvṛta udgāyed agnirvā eṣa vaiśvānaro yadyajñāyajñīyaṃ tasya śāntyā apradāhāyeti
- 6
ईश्वरो ह तु पितृदेवत्यो भवितोर्यत्प्रावृत उद्गायेत्
īśvaro ha tu pitṛdevatyo bhavitoryatprāvṛta udgāyet
- 7
अथो आहुर्यावद् एव श्रोत्रं तावत्प्रावृत्योद्गायेद् इति
atho āhuryāvad eva śrotraṃ tāvatprāvṛtyodgāyed iti
- 8
तद् उ वा आहुः कर्णाभ्यां वै शृणोत्य् अक्षिभ्यां पश्यति
tad u vā āhuḥ karṇābhyāṃ vai śṛṇoty akṣibhyāṃ paśyati
- 9
तस्माद् आत्मानम् अन्तरियाद्यत्प्रावृत उद्गायेत्
tasmād ātmānam antariyādyatprāvṛta udgāyet
- 10
अथो आशिरं वै तृतीये सवने ऽवनयन्ति
atho āśiraṃ vai tṛtīye savane 'vanayanti
- 11
प्रजा वै पशव आशीः
prajā vai paśava āśīḥ
- 12
तस्मात्सर्वस्माद् आत्मानम् अन्तरियाद्यत्प्रावृत उद्गायेत्
tasmātsarvasmād ātmānam antariyādyatprāvṛta udgāyet
- 13
अप्रावृत एवोद्गायेद् इति
aprāvṛta evodgāyed iti

