16 shlokas
- 1
देवासुरा अस्पर्धन्त
devāsurā aspardhanta
- 2
ते देवा वज्रं क्षुरपविम् असृजन्त पुरुषम् एव
te devā vajraṃ kṣurapavim asṛjanta puruṣam eva
- 3
तम् असुरान् अभ्यवृञ्जन्
tam asurān abhyavṛñjan
- 4
सो ऽसुरान् अपोप्य देवान् अभ्यावर्तत
so 'surān apopya devān abhyāvartata
- 5
तस्माद्देवा अबिभयुः
tasmāddevā abibhayuḥ
- 6
तम् अभिपद्य बृहद्रथन्तरयोः प्रौहन्
tam abhipadya bṛhadrathantarayoḥ prauhan
- 7
स एष वज्रः क्षुरपविर्बृहद्रथन्तरयोः प्रोढः पुरुष एव
sa eṣa vajraḥ kṣurapavirbṛhadrathantarayoḥ proḍhaḥ puruṣa eva
- 8
स यं द्विष्याद्बृहद्रथन्तरयोर् एनं मुखे ऽपिदध्यात्
sa yaṃ dviṣyādbṛhadrathantarayor enaṃ mukhe 'pidadhyāt
- 9
यदि राथन्तरः सोमः स्याद्रथन्तरे प्रस्तुते ब्रूयान्नमो मात्रे पृथिव्यै रथन्तर मा मा हिंसीर् इति
yadi rāthantaraḥ somaḥ syādrathantare prastute brūyānnamo mātre pṛthivyai rathantara mā mā hiṃsīr iti
- 10
यदि बार्हतः सोमः स्याद्बृहति प्रस्तुते ब्रूयाद्दिवं पितरम् उपश्रये बृहन्मा मा हिंसीर् इति
yadi bārhataḥ somaḥ syādbṛhati prastute brūyāddivaṃ pitaram upaśraye bṛhanmā mā hiṃsīr iti
- 11
अथानुमन्त्रयेत प्राणैर् अमुष्य प्राणान्वृङ्क्ष्व तक्षणेन तेक्ष्णीयसायुर् अस्य प्राणान्वृङ्क्ष्व क्रुद्ध एनं मन्युना दण्डेन जहि धनुर् एनम् आतत्येष्वा विध्येति
athānumantrayeta prāṇair amuṣya prāṇānvṛṅkṣva takṣaṇena tekṣṇīyasāyur asya prāṇānvṛṅkṣva kruddha enaṃ manyunā daṇḍena jahi dhanur enam ātatyeṣvā vidhyeti
- 12
बृहद्रथन्तरयोर् एवैनं मुखे ऽपिदधाति
bṛhadrathantarayor evainaṃ mukhe 'pidadhāti
- 13
यं द्वेष्टि तं पुरा संवत्सरात्प्राणो जहाति
yaṃ dveṣṭi taṃ purā saṃvatsarātprāṇo jahāti
- 14
यो वै देवरथं वेद रथी भवति
yo vai devarathaṃ veda rathī bhavati
- 15
यज्ञो वाव देवरथः
yajño vāva devarathaḥ
- 16
तस्य बहिष्पवमानम् एव रथमुखं बृहद्रथन्तरे अश्वाव् आज्यानि योक्त्राण्य् अभीशू पवमानौ पक्षसी
tasya bahiṣpavamānam eva rathamukhaṃ bṛhadrathantare aśvāv ājyāni yoktrāṇy abhīśū pavamānau pakṣasī

