10 shlokas
- 1
स उदराद् एव मध्यतः सप्तदशं स्तोमम् असृजत जगतीं छन्दो वामदेव्यं साम विश्वान्देवान्देवतां वैश्यं मनुष्यं गां पशुम्
sa udarād eva madhyataḥ saptadaśaṃ stomam asṛjata jagatīṃ chando vāmadevyaṃ sāma viśvāndevāndevatāṃ vaiśyaṃ manuṣyaṃ gāṃ paśum
- 2
तस्माद्वैश्यो जगतीच्छन्दा वैश्वदेवो देवतया
tasmādvaiśyo jagatīcchandā vaiśvadevo devatayā
- 3
तस्माद् उ प्रजनिष्णुर् उदराद्ध्य् एनं प्रजननाद् असृजत
tasmād u prajaniṣṇur udarāddhy enaṃ prajananād asṛjata
- 4
सो ऽकामयत प्रैव जायेयेति
so 'kāmayata praiva jāyeyeti
- 5
स पद्भ्याम् एव प्रतिष्ठाया एकविंशं स्तोमम् असृजतानुष्टुभं छन्दो यज्ञायज्ञीयं साम न कांचन देवतां शूद्रं मनुष्यम् अविं पशुम्
sa padbhyām eva pratiṣṭhāyā ekaviṃśaṃ stomam asṛjatānuṣṭubhaṃ chando yajñāyajñīyaṃ sāma na kāṃcana devatāṃ śūdraṃ manuṣyam aviṃ paśum
- 6
तस्माच्छूद्रो ऽनुष्टुप्छन्दा वेश्मपतिदेवः
tasmācchūdro 'nuṣṭupchandā veśmapatidevaḥ
- 7
तस्माद् उ पादावनेज्येनैव जिजीविषति पद्भ्यां ह्य् एनं प्रतिष्ठाया असृजत
tasmād u pādāvanejyenaiva jijīviṣati padbhyāṃ hy enaṃ pratiṣṭhāyā asṛjata
- 8
एतया वै सृष्ट्या प्रजापतिः प्रजा असृजत
etayā vai sṛṣṭyā prajāpatiḥ prajā asṛjata
- 9
स य एतद् एवं वेद भूमानम् एव प्रजया पशुभिर्गच्छति
sa ya etad evaṃ veda bhūmānam eva prajayā paśubhirgacchati
- 10
तस्माद्वेतं यज्ञं भूयिष्ठं प्रशंसन्ति यद् अग्निष्टोमं प्रजापतियज्ञो ह्य् एषः
tasmādvetaṃ yajñaṃ bhūyiṣṭhaṃ praśaṃsanti yad agniṣṭomaṃ prajāpatiyajño hy eṣaḥ

