25 shlokas
- 1
ऋचा वा असुरा आयन्साम्ना देवाः
ṛcā vā asurā āyansāmnā devāḥ
- 2
ते देवा असुरान् ऋच्य् एव निगृह्य साम्नापीडयन्
te devā asurān ṛcy eva nigṛhya sāmnāpīḍayan
- 3
ऐव पीडयेद्द्विषतो भ्रातृव्यस्य व्यधाय
aiva pīḍayeddviṣato bhrātṛvyasya vyadhāya
- 4
इन्द्रां सबाध ऊतो या इति बृहद्गायन्तः सुतसोमे धोरो इति रथन्तरसाम्नः
indrāṃ sabādha ūto yā iti bṛhadgāyantaḥ sutasome dhoro iti rathantarasāmnaḥ
- 5
धोरो इति बृहत्साम्नः
dhoro iti bṛhatsāmnaḥ
- 6
उभे ह वा एते एतद् अनु
ubhe ha vā ete etad anu
- 7
तस्माद् उभे रूपे गायेद्यच्च राथन्तरं यच्च बार्हतम्
tasmād ubhe rūpe gāyedyacca rāthantaraṃ yacca bārhatam
- 8
नाना वा एनयोर्ब्रह्मसामनी भवतः
nānā vā enayorbrahmasāmanī bhavataḥ
- 9
अथैतद् उभे अनु
athaitad ubhe anu
- 10
तस्माद् उभे एव रूपे गायेत्
tasmād ubhe eva rūpe gāyet
- 11
तद् ऐडं भवति
tad aiḍaṃ bhavati
- 12
पशवो वा इडा
paśavo vā iḍā
- 13
पशुभिर्वाव ते तान् अकालयन्त
paśubhirvāva te tān akālayanta
- 14
तस्माद्यत्पशुमांश्चापशुश्च भ्रातृव्यौ स्पर्धेते य एव पशुमान्भवति स एव तयोर् अभिभवति
tasmādyatpaśumāṃścāpaśuśca bhrātṛvyau spardhete ya eva paśumānbhavati sa eva tayor abhibhavati
- 15
एतद्ध वै साम प्रजा इमा अनुव्यास
etaddha vai sāma prajā imā anuvyāsa
- 16
ते तस्यैतां नितताम् इडाम् अन्तत उपयन्ति प्रजानां यथायतनाद् अनुद्घाताय
te tasyaitāṃ nitatām iḍām antata upayanti prajānāṃ yathāyatanād anudghātāya
- 17
तस्मात्प्रजा यथायतनाद् अनुद्धताः
tasmātprajā yathāyatanād anuddhatāḥ
- 18
देवाः पितरो मनुष्यास्ते ऽन्यत आसन्न् असुरा रक्षांसि पिशाचा अन्यतः
devāḥ pitaro manuṣyāste 'nyata āsann asurā rakṣāṃsi piśācā anyataḥ
- 19
त एषु लोकेष्व् अस्पर्धन्त
ta eṣu lokeṣv aspardhanta
- 20
अथ ह कलयो गन्धर्वा अन्तःस्थां चेरुर्नेतरान्नेतरान् आद्रियमाणाः
atha ha kalayo gandharvā antaḥsthāṃ cerurnetarānnetarān ādriyamāṇāḥ
- 21
ते देवाः पितरो मनुष्या असुरान्रक्षांसि पिशाचान् अभ्यभवन्
te devāḥ pitaro manuṣyā asurānrakṣāṃsi piśācān abhyabhavan
- 22
त इमान्लोकान्व्यभजन्त देवलोकम् एव देवा अभजन्त पितृलोकं पितरो मनुष्यलोकं मनुष्याः
ta imānlokānvyabhajanta devalokam eva devā abhajanta pitṛlokaṃ pitaro manuṣyalokaṃ manuṣyāḥ
- 23
तान्कलयो गन्धर्वा एत्याब्रुवन्न् अनु न एषु लोकेष्व् आभजतेति
tānkalayo gandharvā etyābruvann anu na eṣu lokeṣv ābhajateti
- 24
ते ऽब्रुवन्न् अनाद्रियमाणा वै यूयम् अचारिष्ट नेतरान्नेतरान् आद्रियमाणा इति
te 'bruvann anādriyamāṇā vai yūyam acāriṣṭa netarānnetarān ādriyamāṇā iti
- 25
अथ वै वो मनसान्वासिष्महीत्य् अब्रुवन्न् अन्व् एव न आभजतेति
atha vai vo manasānvāsiṣmahīty abruvann anv eva na ābhajateti

