22 shlokas
- 1
एष वा अग्निर्वैश्वानरो य एष तपति
eṣa vā agnirvaiśvānaro ya eṣa tapati
- 2
तस्य रात्रिः समिद् अहर्ज्योती रश्मयो धूमो नक्षत्राणि विष्फुलिङ्गाश्चन्द्रमा अङ्गाराः
tasya rātriḥ samid aharjyotī raśmayo dhūmo nakṣatrāṇi viṣphuliṅgāścandramā aṅgārāḥ
- 3
तस्मिन्न् एतस्मिन्न् अग्नौ वैश्वानरे ऽहरहर्देवा अमृतम् अपो जुह्वति
tasminn etasminn agnau vaiśvānare 'harahardevā amṛtam apo juhvati
- 4
तस्या आहुतेर्हुतायै सोमो राजा सम्भवति
tasyā āhuterhutāyai somo rājā sambhavati
- 5
स्तनयित्नुर् एवाग्निर्वैश्वानरः
stanayitnur evāgnirvaiśvānaraḥ
- 6
तस्य द्यौः समिद्विद्युज्ज्योतिर् अभ्राणि धूमो ह्लादुनयो विष्फुलिङ्गा अशनिर् अङ्गाराः
tasya dyauḥ samidvidyujjyotir abhrāṇi dhūmo hlādunayo viṣphuliṅgā aśanir aṅgārāḥ
- 7
तस्मिन्न् एतस्मिन्न् अग्नौ वैश्वानरे ऽहरहर्देवाः सोमं राजानं जुह्वति
tasminn etasminn agnau vaiśvānare 'harahardevāḥ somaṃ rājānaṃ juhvati
- 8
तस्या आहुतेर्हुतायै वृष्टिः सम्भवति
tasyā āhuterhutāyai vṛṣṭiḥ sambhavati
- 9
पृथिव्य् एवाग्निर्वैश्वानरः
pṛthivy evāgnirvaiśvānaraḥ
- 10
तस्यान्तरिक्षं समिद् अग्निर्ज्योतिर्वायुर्धूमो मरीचयो विष्फुलिङ्गा दिशो ऽङ्गाराः
tasyāntarikṣaṃ samid agnirjyotirvāyurdhūmo marīcayo viṣphuliṅgā diśo 'ṅgārāḥ
- 11
तस्मिन्न् एतस्मिन्न् अग्नौ वैश्वानरे ऽहरहर्देवा वृष्टिं जुह्वति
tasminn etasminn agnau vaiśvānare 'harahardevā vṛṣṭiṃ juhvati
- 12
तस्या आहुतेर्हुताया अन्नं सम्भवति
tasyā āhuterhutāyā annaṃ sambhavati
- 13
पुरुष एवाग्निर्वैश्वानरः
puruṣa evāgnirvaiśvānaraḥ
- 14
तस्य वाक्समिच्चक्षुर्ज्योतिः प्राणो धूमो मनो विष्फुलिङ्गाः श्रोत्रम् अङ्गाराः
tasya vāksamiccakṣurjyotiḥ prāṇo dhūmo mano viṣphuliṅgāḥ śrotram aṅgārāḥ
- 15
तस्मिन्न् एतस्मिन्न् अग्नौ वैश्वानरे ऽहरहर्देवा अन्नं जुह्वति
tasminn etasminn agnau vaiśvānare 'harahardevā annaṃ juhvati
- 16
तस्या आहुतेर्हुतायै रेतः सम्भवति
tasyā āhuterhutāyai retaḥ sambhavati
- 17
स्त्र्य् एवाग्निर्वैश्वानरः
stry evāgnirvaiśvānaraḥ
- 18
तस्योपस्थं समिद्योनिर्ज्योतिर् इष्या धूमो ऽभिनन्दो विष्फुलिङ्गाः संस्पर्शो ऽङ्गाराः
tasyopasthaṃ samidyonirjyotir iṣyā dhūmo 'bhinando viṣphuliṅgāḥ saṃsparśo 'ṅgārāḥ
- 19
तस्मिन्न् एतस्मिन्न् अग्नौ वैश्वानरे ऽहरहर्देवा रेतो जुह्वति
tasminn etasminn agnau vaiśvānare 'harahardevā reto juhvati
- 20
तस्या आहुतेर्हुतायै पुरुषः सम्भवति
tasyā āhuterhutāyai puruṣaḥ sambhavati
- 21
सो ऽत्र पञ्चम्यां विसृष्ट्यां पुरुषो देवेभ्यो जायते
so 'tra pañcamyāṃ visṛṣṭyāṃ puruṣo devebhyo jāyate
- 22
पञ्चम्यां विसृष्ट्यां दिव्या आपः पुरुषवाचो वदन्ति यथा यथामुं लोकम् अप्येति
pañcamyāṃ visṛṣṭyāṃ divyā āpaḥ puruṣavāco vadanti yathā yathāmuṃ lokam apyeti

