12 shlokas
- 1
तद् आहुर्यत्पुरुषो योषां सम्भविष्यन्परोक्षं निलयनम् इच्छते ऽन्त एवान्ये पशवो ऽन्योन्यस्य स्कन्दन्ति किं तद्यज्ञे क्रियते यस्मात्तत्तथेति
tad āhuryatpuruṣo yoṣāṃ sambhaviṣyanparokṣaṃ nilayanam icchate 'nta evānye paśavo 'nyonyasya skandanti kiṃ tadyajñe kriyate yasmāttattatheti
- 2
स ब्रूयाद्यस्मात्त्रिवृत्स्तोमो बहिष्पवमाने प्राङ् इवोत्क्रम्य धिष्ण्येभ्यो निलीय गायत्रीं स्कन्दति मध्य एवान्य ऋत्विजो धिष्ण्यानां यद् अन्त आसते तस्मात्तत्तथेति
sa brūyādyasmāttrivṛtstomo bahiṣpavamāne prāṅ ivotkramya dhiṣṇyebhyo nilīya gāyatrīṃ skandati madhya evānya ṛtvijo dhiṣṇyānāṃ yad anta āsate tasmāttattatheti
- 3
त्रिवृतं हि स्तोमं पुरुषो ऽन्वायत्तो धिष्ण्यान् अन्ये पशव इति
trivṛtaṃ hi stomaṃ puruṣo 'nvāyatto dhiṣṇyān anye paśava iti
- 4
तद्व् एवाहुर्यत्स त्रिवृत्स्तोमो गायत्रीं स्कन्दति किं सा ततः प्रजनयतीति
tadv evāhuryatsa trivṛtstomo gāyatrīṃ skandati kiṃ sā tataḥ prajanayatīti
- 5
इडान्तं यज्ञं सप्तनाभिम् इति ब्रूयात्
iḍāntaṃ yajñaṃ saptanābhim iti brūyāt
- 6
सा गायत्री गर्भं धत्ते
sā gāyatrī garbhaṃ dhatte
- 7
सा पुरोनुवाक्यां प्रजनयति पुरोनुवाक्या याज्यां याज्या वषट्कारं वषट्कार आहुतीर् आहुतयो दक्षिणा दक्षिणाः स्वर्गं लोकम्
sā puronuvākyāṃ prajanayati puronuvākyā yājyāṃ yājyā vaṣaṭkāraṃ vaṣaṭkāra āhutīr āhutayo dakṣiṇā dakṣiṇāḥ svargaṃ lokam
- 8
तद्यथा वित्तं प्रवाहं क्षिप्रं प्रवहेद् एवम् एवैनम् एता देवताः स्वर्गाय लोकाय प्रवहन्ति
tadyathā vittaṃ pravāhaṃ kṣipraṃ pravahed evam evainam etā devatāḥ svargāya lokāya pravahanti
- 9
त्रिवृद् एवैनं स्तोमो गायत्र्यै प्रयच्छति गायत्री पुरोनुवाक्यायै पुरोनुवाक्या याज्यायै याज्या वषट्काराय वषट्कार आहुतीभ्य आहुतयो दक्षिणाभ्यो दक्षिणाः स्वर्गं लोकं गमयन्ति
trivṛd evainaṃ stomo gāyatryai prayacchati gāyatrī puronuvākyāyai puronuvākyā yājyāyai yājyā vaṣaṭkārāya vaṣaṭkāra āhutībhya āhutayo dakṣiṇābhyo dakṣiṇāḥ svargaṃ lokaṃ gamayanti
- 10
स एष इडान्तो यज्ञः सप्तनाभिः
sa eṣa iḍānto yajñaḥ saptanābhiḥ
- 11
तस्य ह त्रिवृद् एव स्तोमो नाभिर्गायत्री नाभिः पुरोनुवाक्या नाभिर्याज्या नाभिर्वषट्कारो नाभिर् आहुतयो नाभिर्दक्षिणा नाभिः
tasya ha trivṛd eva stomo nābhirgāyatrī nābhiḥ puronuvākyā nābhiryājyā nābhirvaṣaṭkāro nābhir āhutayo nābhirdakṣiṇā nābhiḥ
- 12
उप हैनम् एष यज्ञो नमति य एवं वेद
upa hainam eṣa yajño namati ya evaṃ veda

